बोन्क बद बोदा कराहना
2
1 निमे मात्रम बस्केळ्क सत्तेम बोदाकु ओप्पनालायक पोल्लें करहा. 2 मात्रलोर्क ओप्केते, इमानदारते, सततुन आपकुनमळते, पावरमते, दैरनेमते आनि ओर्सकुनमळते गट्टिगा मंदालय करहा.3 अल्हेने मातरिह्कुंक करहा गदा, अवुना पिसवर पवित्र लोकुल्कुना पिसवरलेह्का मंदना. वेरेतोरा पोर्रो दोसेल्क दोस्साकोंटा, कल्कु उनाकोंटा, अव बस्केळ्क बेसता बारेमतेन कराहगोम. 4 अल्हेने अव लेय्या मुर्ताह्कुंक, अवुना मुय्दुर्कुन, पिलाल्कुन पावरम कियाना, 5 सततुन आपकुंचि पिस्साना, पवित्र मंदना, बस्केळ्क बेसे कियाना आनि मुय्दोना पोल्लेपोर्रो मंदना, इंचि कराहना. अल्हा कराहते, अवुनाहेंदाल पेनदा पोल्ले बदनाम आयाकोंटा मनंता.
6 अल्हेने लेय्युर्कुंक जोर हीसि वेहा गदा, ओर सततुन आपकुंचि पिस्सिरकांटि. 7 बेस कबाह्क कीसि निमे अन्नि पोल्लेने ओराहाटीं उंदि उदाहरनलेह्का मन्नु. आनि नीवा कराहमळते सत्तेम, इमानम मनगोम. 8 निमे कराहना बोदा इच्चोन सत्तेम मनना गदा, अव्टे बोरे तप्पु तेंडामन्नि आनि नीवा विरोदमते वळ्कानोर्कुंक मना बारेमते बतले तप्पु दोर्कका ओर्क सिग्गु वायगोम.
9 दासुल्कुंक करहा गदा, बस्केळ्क ओर ओरा माल्कुंल्कुना पोल्लेपोर्रो मंदना आनि अन्नि परिस्तितिने माल्कुल्कुंक तिरियसि वळ्काकोंटा, ओर्कुन कूस कियना. 10 इंका मालकुल्कुनगटाल दोंगातनम किया मन्नि गानि अन्नि पोल्लेने बेस नम्मनालायक ओर मंदना. अल्हा मत्ते, मनाकुन कापाळना मना पेनदा बारेमता कराहमळतुक ओर इंकिच्चो कदर तर्रांनोर आंतुर. 11 बारित्ते अंटोर लोकुल्कुंक मुक्ति हियनाहाटीं पेन दाना दयातुन हूपिस्ता. 12 आनि अद दया मनाकु, मनम पेनदुक नच्चुवा पिसवर आनि सततुन आपकुंचि, इद दुनियाते बेस बक्तिते, सवरटा हर्दे आनि पेनदुक नच्चना पिसवर पिसगोम, इंचि कराहंता. 13 अचोने आयका मना कदरगल्ला पेन आनि मनाकु मुक्ति हियना येसु किरिस्तु ओना पेद्दातनमते वांतोर इत्ता आ सक्कटा आसेतुन मनम एदुर हूळसेके मंदना इंचेकगुडा कराहंता. 14 इंका किरिस्तु मनाकुन अन्नि तीरकुना तप्पुड कबाह्कुनाल तपिच्चि, बस्केळ्क बेसता कबाह्के कियगोम इंचि मनसु इर्राना ओना सतता लोकुल्क मनम आयगोम इंचि, मनाकुन पवित्र कियनाहाटीं येसु सामि ओना सतता जीवातुन हीतोर.
15 इव अन्नि पोल्लें निमे, पूरा अदिकारमते दटांचि तेळियागोट्सि वेहा आनि करहा. नीकुन बोरे सिन्नगा हूळा हियमा.