सेड्डा पोल्लें जर्गंतां
2
1 विस्वासुल्कुनिटा! इंदके मना सामि येसु किरिस्तु मर्रा वायाना बारेमते, आनि मनम जमा आसि ओनतोनि कलियाना बारेमते मीक विनंति कीसेक मंतोम. 2 अद बतल इत्ते, सामि मल्सि वायाना रोजु वाता इंचि मिमेट आत्माताa हेंदाल आयि, पोल्लेता हेंदाल आयि, मावा हेंदाले सिट्टि वाता इत्ताप आयि मीक केंजा वाते, मीवा मनसुन हीके-हेके आया हियमटु, वेरियमट. 3 बोरे आयिर बदे रीतुने मीकुन दोका किया हियमटु; बारित्ते मुन्ने वरोना पोल्ले वरोर केंजवा कालम वायार, पजा पेनदा पोल्लेतुन विरोदम कियाना नासडेमता मर्रि दिस्सानुर, दाना पजाने किरिस्तु मर्रा वायाना रोजु वायार. 4 ओर पेन इंचि इनानवुन अन्निन, मनकलोर मोळ्कानवुन अन्निन विरोदम कीसि, ओनद ओरे पेद्दोन इंचि वेहकुंतोर. ओर पेनदालेसिं पेनदा गुळिते होंचि उद्दानुर, आनि ननाने पेनदुन इंचि वेहकुनानुर.5 नना मीवातोनि मतस्के इव पोल्लें वेहतन, मीक मति हिल्लेना? 6 पेनदा पोल्लेक विरोदमते तिरियानोर ओना वेला वातारितेने दिस्सानुर, इंदके ओन बतल आपसेके मंतानो मीक एरपाटे मंता. 7 पेनदा पोल्लेतुन विरोदम कियानोना मर्ममता ताकत इंदकेगुडा कबळ कीसेकेने मंता; गानि दान आपानोन पक्कक कियानादाका पेन ओन आपसेकेने मनंता. 8 बस्के अय्ते पेनदा पोल्लेतुन विरोदम कियानोर दिस्सानुर, अस्के येसु सामि ओना तोळदा ऊपिरते ओन हव्कानुर आनि ओर वायानेंके दिस्सना वेलगुने ओन नासडेम कियानुर. 9 पेनदा पोल्लेतुन विरोदम कियानोर वायमळ इत्ते, देय्यमतदे उंदि कबळ आंदु, ओर वासि आबद्दम पोल्लेने देय्यमतव अन्नि ताकतकुतोनि चिन्हां आनि इचंत्रमता कबाह्क कियानुर. 10 आनि नासडेम आयानोर्कुन अन्नि तीरुकुने पसांचंतोर. बारित्ते बद सत्तेमतुन अय्ते पावरमते ओप्कुंचि मत्ते मुक्ति दोर्किस मनवळ, ओर अदुन ओप्पकुन्ना हिल्लुर. 11 अदुनहाटीं ओर आबद्दमतुने विस्वासम कियिर इंचि पेन ओरा लोप्पो गयबेत कियाना सक्तितुन लोहंता. 12 बचुटुर अय्ते सत्तेम पोल्लेतुन विस्वासम कियवा, कराब कबाह्कुने कूस आंतुर, ओर अंटोर्क पेन सिक्साता आदेस हियार. 13 गानि मना विस्वासुल्कुनिटा आनि सामिना पावरमगल्लोरिटा! मिमेट पवित्र आत्माता हेंदाल पवित्र आनि सत्तेमते विस्वासम इर्सि पिस्सालय पेन मीकुन मुन्नेने पेरता. अदुनहाटीं माकु मीवा बारेमते पेनदुक बस्केळ्क दन्यवाद कियमळ गावाले. 14 इल्हा मिमेट मना सामि येसु किरिस्तुना महिमातुन दोर्किचकुनना इंचि, पेन मोमोट वेहता बेसता कबुरताहेंदाल मीकुन केयता. 15 अदुनहाटीं दादालोर-अक्काह्कुनिटा! गट्टिगा निल्सि मंटु, मावा तोळदाल पेय्सता पोल्लेहेंदाल, सिट्टिताल बव रीतरिवाजकु अय्ते मीक कराहतोम अवुन पीसि ताकट. 16 मना सामि येसु किरिस्तु आनि पेन बाबाल मनाकुन पावरम कीसि, ओना कृपाता हेंदाल बस्केळ्क मनना सांति आनि बेसता आसे हीतोर. 17 मीवा हरेक कबाटे, हरेक पोल्लेते पेन मीकुन गट्टिगा कियकांटी, इंका मीवा मनसुने सांति हियिकांटीं.