माहाटीं पारतना कीम्टु
3
1 विस्वासुल्कुनिटा! मीक आकिरते वेहानद बतल इत्ते, सामिना पोल्ले मीवा लोप्पो पैलांचतापे, वेरेटोरा लोपोगुडा बिराना पैलांचि पेद्दातनम दोर्कनाहाटीं पारतना कीम्टु. 2 अल्हेने तेडा मनसुनोर आनि दुस्ट लोकुल्कुनहेंदाल पेन माकुन पिस्सागोटि, बारित्ते अंटुर लोकुल्क विस्वासुल्क आयुर. 3 गानि सामि विस्वासम कियाना लायकतोर आंदुर; ओर मीकुन देय्यमता कयदाल कापाळसि गट्टिगा निल्हंतोर. 4 मोमोट आदेस हीताप मिमेट ताकसेके मंतिट आनि मुन्नेगुडा अल्हे ताकंतिर इंचि सामिन लोप्पो माक मीवा बारेमते बरोसा मंता. 5 सामि मीवा मनसुल्कुन पेनदा पावरमते आनि किरिस्तुना गट्टि ओपकेते ताकसा परांतोर.कबळ कियाना जिम्मेदारिं
6 विस्वासुल्कुनिटा! बोरय्ते लंडु आसि मंतुर, मोमोट वेहता रीतरिवाज परकारम ताकसेक हिल्लुर, असोंटा हरेक मनकानाल लक्कु मंटु इंचि मना सामि येसु किरिस्तुना पोर्रोलते मीक आदेस हीसेक मंतोम. 7 मोमोट मीवातोनि मतस्के लंडु आसि मना हिल्लोम, अदुनहाटीं मोमोट ताकताप बल्हा ताकाना इंचि मीक कुद एरपाटे मंता. 8 मोमोट बोनगाने पुकटता गाटो तिना हिल्लोम, मी अंटेताल बोनके बर्वु आयामन्नि इंचि नर्का-पिय्यल कबळ, कस्टम कीसि गाटो तित्तोम. 9 माक मीवापोर्रो बर्वु आयाना अदिकार हिल्ले इत्ताप आयो, गानि मिमेटगुडा मावालेसिं मंदना इंचि मीक हूप्सालय मोमोट कबळ कीसि तित्तोम. 10 मोमोट मीवातोनि मतस्के, “बोर्कन्ना गिंटा कबळ कियानद हिलाकुंटे, ओर गाटो तिना मनि” इंचि आदेस हीसि मत्तोम. 11 गानि मीहगा इच्चुर लोकुल्क लंडोर्क मंतुर, ओर बतले कबळ किय्युर, सिराप इंका वरोना जोलिक होनना कबाह्क कीसेक मनंतुर इंचि मोमोट केंजतोम. 12 असोंटा लोकुल्क चुपचाप कबळ कीसि ओरा पिस्वरता कमाइ कियिरकांटी, ओर्क मोमोट सामि येसु किरिस्तुना पोर्रोलते आदेस हींतोम आनि बुद्दि वेहंतोम. 13 दादालोर-अक्काह्कुनिटा! मिमेट बेसता कबाह्कुने नेरबळताप मनमट. 14 बोरन्ना गिंटा इद सिट्टिते रासता पोल्लेन केंजसि ताकाकोंटे, ओनपोर्रो नदर इर्राट, ओनकु सिग्गु वायागोम इंचि ओनतोनि दंटा पियमटु. 15 अय्ना ओन पगातोनलेसिं हूळमट, गानि तम्मुनालेसिं ओन्क वेर्रे वेहाट.
आकिरता पोल्लें