तेसलोनि सहरतोर्क पौलुस रासता रोंडो सिट्टि
जोहर
1
1 नना पौलुसुनa, सिलवानुस आनि तिमोति मोमोट इद सिट्टि मीक तेसलोनि सहरता मंदना चर्चतोर्कुंक रासेक मंतोम.2 मना पेन बाबाल आनि सामि येसु किरिस्तुनाहेंदाल कृपा आनि सांति दोर्कि.
तेसलोनि सहरता विस्वासुल्कुना विस्वासम आनि पिस्वर
3 विस्वासुल्कुनिटा! मीवा विस्वासम वेल्ले बेरस्सेके मंता, मिमेट वरोन-वरोर कीकुनना पावरम वेल्ले बेरस्सेक मंता. अदुनहाटीं मोमोट बस्केळ्क मीवा बारेमते पेनदुक दन्यवाद कियमळ गावाले. इदे बरोबर मंता. 4 अचोने आयाका मिमेट तकलिपकुन, बादन ओप्के पीसि पेनदा लोप्पो गट्टिगा विस्वासमते निल्सि मंतिर. अदुनहाटीं मोमोट मीवा बारेमते पेनदा चर्चुकुने पेद्दातनम वेहकुंचेके मंतोम. 5 इद पेनदा सत्तेम न्यायमता रुजुव आंदु. मिमेट पेनदा राज्येमते होनना लायक आयागोम इंचि इवन्नि बादां अर्सेके मंतिर. 6 बोरय्ते मीकुन तकलिप कींतुर, दानकु बदुल पेन ओर्क तकलिप हीयमळ न्यायमे आंद. 7 बस्के अय्ते सामि येसु ओना बलमगल्ला दूतानतोनि पोत्तना तळमिते स्वर्गमताल दिस्सानुर, अस्के तकलिपते मत्तोर्कुंक आनि माकु सांति हियानुर. 8 बोरय्ते पेनदुन एरपाट किय्युर आनि बोरय्ते मना सामि येसुना बेसता कबुरतुन पालन किय्युर, ओर्क पेन सिक्सा हियार. 9 ओर सामिना मुन्नेटाल आनि ओना ताकतता महिमाताल लक्कु आसि ओर्क मार्वा नासडेमता सिक्सा आयार. 10 बस्के अय्ते येसु सामि मर्रा वायानुर अस्के ओना पवित्र लोकुल्कुने महिमा एतंतोर आनि विस्वासम कीतुर अंटोरा हेंदाल ओर पेद्दातनम दोर्किच्कुंतोर. बारित्ते मोमोट वेहता गवाइतुन मिमेट विस्वासम कीतिट. 11 इदुनहाटीं, मना पेन मीकुन बाताहाटीं अय्ते केयता अदुन लायक मिमेट मनालय, अन्नि बेसता कबाह्क पूरा कियालय आनि विस्वासमतव पूरा कबाह्क पेनदा ताकततोनि पूरा आयालय मोमोट मीवाहाटीं बस्केळ्क पारतना कीसेक मंतोम. 12 इल्हा मना पेन आनि मना सामि येसु किरिस्तुना कृपा परकारम, मीवाहेंदाल मना येसु सामिना पोर्रोल्क पेद्दातनम दोर्काना आनि ओनहेंदाल मीक पेद्दातनम वायाना.