विस्वासमतेन सत्तेमंतुल्क आया परांतुर
3
1 नावा विस्वासुल्कुनिटा! आकिरते नना इंकुंदि मल्का वेहांतन, पेनदा पोर्रोटा मीवा विस्वासमते मिमेट कूस मंटु. रासता पोल्लेंगें ऊके-ऊके रासालय नाक बतल तकलिप आयो. बारित्ते इव पोल्लें मीकुन तप्पुड बोदानाल कापाळंतां. 2 अदुनहाटीं तप्पुड कबाह्क कियना नयकस्केल गुनमतोरगटाल जेगर्ता मंटु. कतनाa रिवाज कीतेन सत्तेमंतुल्क आंतुर इंचि ओर कराहंतुर. 3 गानि मनकलोरा कबाह्कुन पोर्रो बरोसा इरताहेंका मनाकु मुक्ति दोर्कता इंचि आयो. येसु सामि मनाकुन पिसागोटतोर इंचि ओन्क मनम बस्केळ्क कदर हींतोम. अदुनहाटीं पेनदा आत्मा वेहताप दान मोळकानोरम मनमे निजम कतना आतोरम आंद, ओर आयुर. 4 बोरन्ना गिंटा सतता कबाह्कुनपोर्रो बरोसा इरसि पोंगसेके तिरियानय्ते, नावा कबाह्कुनपोर्रो बरोसा इरसि पोंगालय ओनकन्ना एक्को कारनाल्क नहगा मंतां. 5 अद बल्हा इत्ते, नना पुट्ता एनिमिदि रोजकुंके नावा कतना आता, नना इस्राएल देसेमते पुट्ता पिव्वर यहुदि जातितोन आनि बिन्यामिनना गोत्रमतोन आंदुन, मूसाना नियमकुन उंदि पोल्लेगुडा तप्पाकोंटा पीसि ताकाना परिसिल्कुना गुंपुनोन आंदुन, इब्रानि कुंटुबते पुट्ता इब्रानि मनकन आंदुन. 6 जोसने वासि, नना येसु किरिस्तुन नम्मुतोर्कुन वेल्लेन तकलिप कियुंदुन. इंका मूसाना नियम परकारम ताकमळते अय्ते नना बदे तप्पु किया हिल्लेन.7 इव अन्नि पोल्लें नाकु वेल्लेन पाय्दातव इंचि नना मुन्ने इनकुनुंदुन. गानि इंदके किरिस्तु नावाहाटीं कीतदुन मुन्ने, अव अन्नि एर्तमे इंचि नाक तेळियसोत्ता. 8 अचोने आयाका, नावा सामि येसु किरिस्तुन एरपाट कीतदे पेद्दा पोल्ले आंद. कळमतव अन्नि अट्टि पोल्लेंगें, येसु किरिस्तुन दोर्किच्कुनालय अव अन्निन नना लेक्का किय्योन कचरा इनकुंतन. 9 इंका किरिस्तुनतोनि उंदि आसि मनमळे नावा उद्देसम. मूसाना नियम पोर्रो बरोसा कीसि सत्तेमंतुड आया परा हिल्लेन, गानि किरिस्तुन पोर्रो विस्वासम कीताहाटीं पेनदा नदरते सत्तेमंतुड आतन. 10-11 येसु किरिस्तुन आनि ओर हाता पजो ओन मर्रा जीवाते तेहता ताकततुन तेलपिचकुनना इंचि नाकु मंता. ओर बोगांस्ता तकलिपकु आनि हामुरतुनगुडा बोगांचि, ओनलेह्केन नाकु आयगोम. बल्हा अय्नागानि उंदि रोजु पेन नाकुन हामुरताल जीवाते तेहंता इंचि नावा आसे.
पेनदा इनामतुन दोर्किच्कुनालय वित्सेक मनना
12 पोर्रो बव पोल्लें अय्ते रासतन, अव नावा पिसवरते पूरा आतां इंचि वेहोन. अगा एवतन इंचि इनोन, गानि बगा एवालय अय्ते किरिस्तु नाकुन पीतोर, अगा एवालय नना वित्सेक मंतन. 13 नावा विस्वासुल्कुनिटा! नना अगा एवतन इंचि विचारम किय्योन, गानि इद कबळ कींतन. पज्जो जर्गता पोल्लेन मति मरंग्सि, मुन्ने जर्गना पोल्लेन अंदकुनालय वित्सेक मंतन. 14 स्वर्गमतगा एवानोर्कुंक पेन बद इनाम हींतन इंचि केयता, अद इनामतुन येसु किरिस्तुनाहेंदाल दोर्किच्कुनालय नना वित्सेक मंतन.
15 अदुनहाटीं मना लोप्पोटाल विस्वासमते बेस बेरस्तोरम मनम अंटोरम, इव अन्नि पोल्लेना बारेमते उंदासि मंदकोम. ओक्कला बद्दना पोल्ले बारेमते मीवद वेरे बतलन्ना विचारम मत्ते, अदुनगुडा पेन मीकु समजांचि वेहंता. 16 अय्नागानि मनम मात्रम पेन मनाकु इदवेरादाका हुपिस्ता सत्तेमतुन पीसे ताकसेक मनना.
17 नावा विस्वासुल्कुनिटा! मिमेट अंटोर उंदासि, नना ताकतापे ताकट. इंका मोमोट वेहताप बोरय्ते ताकसंतुरो, ओर्कुन हूळसि मिमेट करियट. 18 बारित्ते वेल्लेटुर लोकुल्क किरिस्तु क्रुसुनपोर्रो हातोर इत्ता पोल्लेक विरोदमते ताकसेक मंतुर. ओरा बारेमते नना मीकु बच्चुंगो मल्कां वेहतन, इंदकेगुडा अळसेक वेहासेक मंतन. 19 आकिरते ओर नासडेमb आयानुर, ओरा पिसवर पीटाहाटींगे. सिग्गु होनना कबाह्क कीसेके ओर पोंगसेके वेलियंतुर. दुनियाता पोल्लेन पोर्रेन ओरा मनसु मनंता. 20 गानि मनम अय्ते ई दुनियाता लोकुल्कुम आयोम, मनम स्वर्गमता लोकुल्कुम आंदुम. अगाटाले मनाकुन पिसागोटानोर सामि येसु किरिस्तु वांतोर इंचि मनम ओना एदुर हूळसेक मंतोम. 21 अन्निटवुन ओना कय्दा हिळु इर्रना ताकत ओनगा मंता. ओर वातस्के आ ताकततोने मना नासडेम आयाना इद मेंदुलतुन बदलांचि ओर हासि तेदतस्के ओन्क दोर्कतसोंटा अद्बूतामाता मेंदुललेसिं कियानुर.