बस्केळ्क कुसिते मनना बारेमते पौलुस कराहंतोर
4
1 अदुनहाटीं विस्वासुल्कुनिटा! मिमेट सामिना विस्वासमते गट्टिगा मंटु. मीकुन हूळागोम इंचि नावा जीवा बच्चोरो तनलाळसेक मंता. नावा पावरमतोर मिमेटे आंदिर आनि किरिस्तु वातस्के, नना नावा कबळ महतन इंचि हूप्सानोर मिमेटे आंदिर. 2 युवादिया, सुंतुके अक्काह्कुनिटा मिमेट येसु किरिस्तुनोर आंदिर, अदुनहाटीं मिमेट जगडाल्क होळसि उंदे आसि मनना इंचि नना विनंति कीसंतन. 3 नावा दंटातोना! अव रोंड मुर्ताह्क जगडाल्क होळसि उंदासि मनालय निमे सहायम कीम इंचि नीकु विनंति कीसेक मंतन. बारित्ते किलेमेन्स आनि नावातोनि कबळ कियानोरतोनि कलियसि अव रोंड मुर्ताह्क बेसता कबुर वेहालय वेल्ले कस्टपळतां. अल्हा कबळ कियानोरा पोर्रोल्क पेनदागा मनना बस्केळ्क पिस्सना पिसवरता पुस्तकोमते राससि मंता.4 मिमेट सामिना लोप्पो बस्केळ्क कुसिते मंटु, नना मर्रा इदे पोल्ले वेहासेक मंतन मिमेट बेस कुसिते मंटु. 5 मिमेट सादा-सिंपलतोर इंचि अंटुर्क तेळियनाल पिसट, बारित्ते सामि वायाना वेला दग्गेरे मंता. 6 बदे पोल्लेक पिकिर कियमटु, गानि अन्नि पोल्लेनहाटीं पेनदुक पारतना कीसि मीवा अव्सरमतुन वेहाटु, दन्यवाद कीसि दान तल्कटु. 7 अस्के बोरे अर्तम किया परवसोंटा सांतितुन पेन मीकु हींता. मिमेट येसुनोर आताहाटीं अद सांति मीवा मनसुन, विचाराल्कुन बेस कापाळसि इर्रंता.
8 विस्वासुल्कुनिटा! आकिरते इंकुंदि पोल्ले वेहानद मंता. अद बतल इत्ते, बव पोल्लें अय्ते बेस आनि तल्सुकुननालायक मंतां, अव पोल्लेना बारेमतेन विचारम कीसेक मंटु. इत्ते, बरोसालायक पोल्लें, कदरलायक पोल्लें, सत्तेम पोल्लें, पवित्र पोल्लें, कुसिता पोल्लें, सोबांचना पोल्लें इवे पोल्लेना बारेमते विचारम कीसेके मंटु. 9 मिमेट नावाहेंदाल करियसि दोर्किच्कुत्ता पोल्लें, केंजता पोल्लें, आनि हूळता कबाह्क इव मत्ताप ताकट. अस्के सांति हियना पेन मीकुन कापाळंता.
पौलुस पिलिपिया सहरता विस्वासुल्कुंक नमस्कारम वेहंतोर
10 मिमेट मर्रा उंदि मल्का नावा बारेमते विचारम कीसि नाक सहायम कीतिर. अदुनहाटीं नना सामिना लोप्पो वेल्लेन कूस मंतन. इल्हा सहायम कियना इंचि मिमेट मुन्नेन विचारम कीसि मत्तिर, गानि मीकु मोका दोर्का हिल्ले. 11 नाकु बदुनदो अव्सरम मंता इंचि नना इल्हा इंचेक हिल्लेन. बारित्ते बसोंटा परिस्तिति वायिनागानि कुसितेन पिसमळ नना करियतन. 12 बतले हिलवस्के बल्हा पिस्सना, मत्तस्के बल्हा पिस्सना इद इंका नाक तेळियता. बसोंटा वेला वायाना, बसोंटा परिस्तिति वायाना, कर्वेसि मनना, पीर निंडिस मनना, वेल्ले मतस्के बल्हा मनना, तक्को मतस्के बल्हा मनना इव अन्नि नना करियतन. 13 किरिस्तु नाक ताकत हीसेक इंचि, बसोंटा परिस्तिति वायाना गानि नना अन्नि किया परांतन. 14 बतलन्ना आयि, मिमेट नावा तकलिपते सहायम कीतिर, बेस कीतिर.
15 नना सुरुवुने बेसता कबुर वेहचि मकिदुनिया इनना मीवा एरियाताल होत्तन. अस्के मिमेट पिलिपि विस्वासुल्क तप्पा, वेरे बदे चर्चनोर नाक सहायम किया हिल्लुर. इद पोल्ले मीकु एरपाटे. 16 इल्हेने नना बस्के अय्ते तिसलोनि सहरते मत्तन, अस्केगुडा अव्सरम मतस्के नाक मिमेट वेल्लेन मल्कां सहायम कीतिर. 17 नाक मीहेंदाल सहायम गावाले इंचि आयो, गानि मिमेट कियना बेसता कबाह्कुनहेंका मीकु पेनदाहेंदाल आसिर्वादम दोर्कसेकेन मनना इंचि नावा विचारम मंता. 18 नहगा अन्नि मंतां, नाक बच्चोर अय्ते गावाले दानकन्ना एक्को मंतां. मिमेट इपपरदिसुनतोनि लोहता सहायम नाक दोर्कता. अवुनतोनि नावा अव्सराल्क अन्नि तीरतां. बल्हा अय्ते मोक्कु हीतारित्ते पेन दाना गब्बु एतंता, अल्हेने मिमेट लोहतवुन पेन कुसिते एतकुंता. 19 नना सेवा कियना पेनदागा मनाकु गावाले मत्तादुंकन्ना एक्को संपत्ति मंता. अदुनहाटीं मनाकु बतल अव्सरम मनिना गानि, मनम येसु सामिना लोकुल्क आताहाटीं पेने अदुन पूरा कींता. 20 मना पेनबाबन बस्केळ्क तल्सुकुनकोम. आमेन.