वरोंक-वरोर बेस हूळाना
2
1 किरिस्तुनतोनि कलियसि मीवा दैरनेम बेरस्ता, ओना पावरम हेंदाल मीकु समादानम दोर्कता, मिमेट ओना आत्माते उंद आतिर इंका ओना दया मीतोनि मंता. 2 इव अन्नि पोल्लें निजमे गदा! अय्ते मीवा अंटोरा विचाराल्क बस्केळ्क उंदे मनिंकांटि, मिमेट वरोंक-वरोर उंदच्चोने पावरम कीम्टु, मीवा अंटोरद उंदे मनसु आनि उंदे उद्देसम मनना. इल्हा पिसतिरित्ते नना निजमते पुरागा कूस मनंतन. 3 सतता पाय्दाताहाटीं आयि, पेद्दातनम हुप्सालय आयि बदे कबळ कियमट. गानि वेरेतोरा कदर कीसेके मनम कुद्दु ओरा मुन्ने सिन्नोड आसि मनना. 4 बोरे आयिर, सिराप सतता इस्टाल्कुना बारेमतेन आयो, गानि वेरेतोरा बारेमतेगुडा विचारम कियगोम.येसु सामिनलेसीं सिन्नागासि पिसना
5 येसु किरिस्तुना गुनम मत्तापे मीवा गुनमगुडा मनना. 6 ओर अय्ते कुद्दु पेने आंदुर, अयना पेनदालेह्का मनना विचारमगुडा किया हिल्लोर. 7 दान्क बदुल ओर ओनगा मत्ता अदिकाराल्कुन होळ्सीतोर. होळसिसि वरोर दासुनालेह्का आसि मनकन रूपमते इद बूमिपोर्रो पुटतोर. 8 इल्हा मनकना रूपमते पुटसि ओनद ओर सिन्नगा कीकुत्तोर. इच्चोने आयका पेन बाबाना इच्चातुन पूरा कियालासि क्रुसुनपोर्रो जीवातुनगुडा हीतोर.a 9 अदुनहाटीं पेन ओन अन्निटवुंकन्ना पेद्दोड कीसि ओना पोर्रोल्तुन अन्नि पोर्रोलींकन्ना पेद्दा कीता. 10 बारित्ते, मब्बुन पोर्रोटव, बूमि पोर्रोटव, बूमि हिळतव अन्नि ओना मुन्ने टोंग्रा ऊनसि ओन्के मोळकना. 11 इंका “येसु किरिस्ते सामि आंदुर,” इंचि हरेक नाल्के ओप्कुनगोम. इल्हा पेनबाबांक कदर दोर्कना इंचि अल्हा कीता.
इद बूमिपोर्रो वेडसींलेसीं पिस्सट
12-13 अदुनहाटीं नावा पावरमगल्ला विस्वासुल्कुनिटा! नना मीकु वेहनद बतल इत्ते, नना मीवातोनि मत्तस्के बस्केळ्क मिमेट नना वेहतापे ताकतिट. इंदके नना मीवातोनि हिलाकोन्ना गानि अस्केटदानकन्ना एक्को जेगर्ताते सामिना आदेसकुन पीसि ताकट. पेनदा इच्चा परकारम बतलन्ना कीकुनगोम इंचि मीवा मनसुने वाता इत्ते, अद इच्चा पेने मीवा मनसुने वाटता. अदुन पूरा कियालय गावाले मत्ता ताकतगुडा मीकु पेने हींता. इंचि पेनदुन बेस कदर कीसेके, वेर्रे कोद्दिगा पेन हीता मुक्ति परकारम मत्ता कबाह्क कीसेके पिस्सट.
14 बद कबळ कियिनागानि गुल्गाकोंटा, जगडम कियाकोंटा कीम्टु. 15 अस्के मिमेट बतले दोसेम हिलवा बेस लोकुल्क आकिट. तप्पुड कबाह्क कियना ई दुनियाता लोकुल्कुना नड्डुम आनि पापि लोकुल्कुना नड्डुम मिमेट बतले तप्पु कियवोर आसि पेनदा मर्क-मियाह्कुनलेह्का मंदकिट. इंका मिमेट हीकटते पिसवर पिस्सना लोकुल्कुना नड्डुम पोत्तना वेडसीलेसीं दिसकिट. 16 पिसवर हियना पेनदा पोल्लेतुन गट्टिगा पीसि ताकट. इदुना हेंदाल किरिस्तु वायाना रोजुने, मीवाहाटीं नना कीता कस्टम, वितलाटा एर्तम आया हिल्ले इंचि कुसिते वेहंतन.
17 पेनदा सेवा कियनाहाटीं मिमेट उंदि मोक्कुनलेह्का आसि वेल्लेन तिप्पल्क अरसंतिर. इदंता मीकु पेनदापोर्रो वेल्लेन विस्वासम मत्ताहेंका आसंता. अदुनहाटीं इसोंटा मीवा मोक्कुनतोनि नावा जीवा हीसि नेत्तुर वारागिच्चालयगुडा नना पजोळ्क होन्नोन. गानि वेल्लेन कूस मनंतन. 18 इल्हा मिमेट इरगा कूस मंटु, मीवातोनि ननागुडा कूस मनंतन.
तिमोति आनि इपपरदिस ईर बेस सेवाकुल्क आंदुर
19 येसु सामिना इच्चा मत्ते तिमोतिन मिहगा बिरानेन लोहना इंचि इनकुंचंतन. ओर मीवा बारेमता कबुर नाकु वासि वेहनुर, अस्के नाकु इरगा कुसि आयार. 20 मीवा बेसताहाटीं मनसुनाल चिंता कियानोर नहगा ओन्क तप्पा वेरे बोरे हिल्लोर. 21 अंटोर ओर-ओरा कबाह्कुने मुळ्गिसि मंतुर, येसु किरिस्तुना बारेमते विचारम कियानोर बोरे हिल्लुर. 22 गानि तिमोति असंटोर आयोर. वरोर मर्रि बाबनतोनि कलियसि कबळ कीताप, ओर बेसता कबुर वेहना कबळते नावातोनि इमानदारिते कस्टपळतोर. ओना गुनम बसंटदो मीकु बेस एरपाट. 23 जेलनाल नाकुन होळसींतुरो, होळसुरो इद पोल्ले तेळियतारित्ते ओन नना मीहेके लोहना विचारमते मंतन. 24 आनि ननागुडा बिरानेन मिहगा वांतन, इंचि सामिनपोर्रो नाकु पुरागा बरोसा मंता.
25-26 नाकु अव्सरम अरतस्के सहायम कियनाहाटीं मिमेट इपपरदिसुन नाहेके लोह्तिर. बेसता कबुर वेहनेंके वरोर सिपाइन लेह्का ओर नावा तोळ मत्तोर आंदुर, ओर नावा तम्मुनसंटोर आंदुर. गानि ओन मर्रा मिहेके लोहना इंचि नावा मनसु मंता. मीकुन हूळालय ओर इरगा गाबर आसंतोर. ओर बिमार अर्ता संगति मिमेट केंजतिर इंचि ओन्क तेळियतस्के ओर वेल्लेन नाराज आतोर. 27 ओर बिमार अर्सि हायानाल आसि मत्तोर इद निजमे! गानि पेनदा दया ओनपोर्रो मत्ताहेंका ओन्क बतल आया हिल्ले. ओर बिमारताल बेस आयाकोंटा मंचि मत्ते, नावा दुक्कम इंका बेरसि मनवळ इंचि पेन नावा पोर्रोगुडा दया हुपिच्चि ओन बेस कीता. 28 अय्ते ओन मिहगा बल्हैना लोहना इंचि नना विचारम कीतन. ओर मिहगा वाते मिमेट ओन हूळसि कूस आकिट, अस्के नावा चिंतागुडा तक्को आंता. 29-30 मिमेट नावाहाटीं किया पर्वा सेवातुन ओर ओना जीवाक तेग्गिचि पूरा कीतोर. किरिस्तुना कबळतुन पूरा कियनाहाटीं ओर हायालय आसि मत्तोर. अदुनहाटीं ओर मिहगा वातस्के मावा दंटाता विस्वासि इंचि मिमेट ओन बेस कल्पकुंटु. ओनालेसीं सेवा कियना हरेक मनकना बेस कदर कीम्टु.