पिलिपिया सहरता विस्वासुल्कुंक रासता सिट्टि
पौलुसुन हेंदाल पिलिपिया सहरता विस्वासुल्कुंक नमस्कारम
1
1 पिलिपिया सहरते येसु किरिस्तुना लोप्पो मनना पेनदा अंटोर पवित्र लोकुल्कुंक, पेद्दाल्कुंक आनि अदिकारिल्कुनाहाटीं नना पौलुस आनि नावा दंटातोर तिमोति, मोमोट येसु किरिस्तुना दासुल्कुम इद सिट्टि रासेक मंतोम.2 मना पेनबाबानाहेंदाल आनि मना सामि येसु किरिस्तुनहेंदाल मीकु दया आनि सांति दोर्कि.
पौलुसना पारतना
3 मीकुन नना बस्के-बस्के अय्ते मति कींतन, अस्के-अस्के पेनदुक दन्यवाद कींतन. 4-5 बेसता कबुर केंजसि नम्मुता रोजुनाल अय्ते इदवेरदाकागुडा बेसता कबुरतुन वेहना नावा कबळते मिमेट नाकु तोळ मंतिर. अदुनहाटीं नना बस्के-बस्के अय्ते पारतना कींतन अस्के-अस्के वेल्लेन कुसिते मीवाहाटीं पारतना कींतन. 6 मीवा नड्डुम इच्चोन बेसता कबळतुन पेने सुरुव कीता. आनि इद कबळ पुरागा आयनदाका, इत्ते येसु किरिस्तु मर्रा तिरियसि वायना रोजुनदाका पेने इद कबाटुन ताकिच्चेक इर्रंता इंचि नाकु पुरागा बरोसा मंता.
7 नना मीवा बारेमते इल्हा विचारम कियमळ बेसे आंद. बारित्ते, नना जेलने मत्तस्के आयि, बेसता कबुर वेहचि अव्टे मत्ता निजमतुन हुपिच्चि कापाळसेके तिरियतस्के आयि, इव अन्निटवुने पेनदाहेंदाल दया दोर्कता, अव्ने नावातोनि मिमेटगुडा तोळ मंतिर. अदुनहाटीं मिमेट इत्ते नाकु वेल्लेन पावरम! 8 येसु सामिनलेह्का ननागुडा मीकुन पावरम कींतन, इंचि नावा जीवा मीकुन हूळानाहाटीं बस्केळ्क तंलाडंता. आनि दीनकु कुद्दु पेने गवाइ मंता.
9 मीवा पावरम बेस बेरसेक मनना, पेनदाहेंदाल मीकु बुद्दि, मंचि-सेड्डातुन एरपाट कियना तेल्वि बेरसना इंचि नना बस्केळ्क पेनदुक पारतना कीसेक मनंतन. 10 दीनहेंदाल मिमेट मंचितुन-सेड्डातुन एरपाट कीसि बेस पिसवर पिसकिट. अस्के किरिस्तु वातस्के मिमेट अंटोरगुडा ओना मुन्ने सत्तेमंतुल्क आनि दोसेम हिलवोर आसि निलकिट. 11 मीवा पिसवरते येसु किरिस्तु मत्ताहाटीं, मिमेट बस्केळ्क बेस कबाह्के कीसेक मंदना. दीनहेंदाल पेनदा पोर्रोल आनि कदर वेल्लेन बेरसेक दांता.
किरिस्तुना बारेमता कबुर बेरस्ताहाटीं पौलुसना कुसि
12 नावा विस्वासुल्कुनिटा! मिमेट उंदि पोल्ले अर्तम कीकुंटु, नावा पिसवरते जर्गता अन्नि गटनां किरिस्तुना बारेमता बेसता कबुर बेरसालये सहायम आतां. 13 इल्हा जर्गताहेंकेन, किरिस्तुनाहाटींगे नाकुन जेलने वाटतुर इंचि राजवाडाते कावेल कियना अंटोर सिपाइल्कुंक आनि अगा मत्ता अंटोर लोकुल्कुंक तेळियसोत्ता. 14 इचोने आयका, नना जेलने मत्ताहेंका सामिनाहाटीं वेल्लेन मंदि विस्वासुल्कुंक दैरनेम दोर्कता. ओर बोर्के वेरियाकोंटा वेल्लेन दैरनेमते किरिस्तुना बारेमता पोल्लेतुन वेहालय तयार आतुर.
15 अव्टेटाल इच्चुर कळ्क पोत्सि, नावा पोर्रोटा पगा तीरिचकुनालय किरिस्तुना बारेमते वेहचंतुर, इंका इच्चुर बारे बेस उद्देसमते वेहचंतुर. 16 बेस उद्देसमते वेहानोर, नावा पोर्रोटा पावरमहेंका अल्हा कींतुर. बारित्ते येसु किरिस्तुना बारेमता बेसता कबुर सत्तेम आंद इंचि हुप्सालये नना इग्गे मंतन इंचि ओर्क एरपाट मंता. 17 गानि ना पोर्रो कळ्क पोत्सि, किरिस्तुना बारेमता पोल्लेतुन वेहना लोकुल्क मात्रम नना जेलने मननेंके नाकु इरगा तकलिप आयागोम इंचि, ओरा सतता पाय्दाहाटीं अल्हा कीसंतुर. 18 अयना बतल आयो. बेस उद्देसमते आयि, तप्पुड उद्देसमते आयि, अद बल्हे आयि! किरिस्तुना बारेमतेन वेहमळ जर्गसंता इंचि नाकु वेल्लेन कुसि आसंता. आनि नना इल्हेन कुसिते मनंतन. 19 बारित्ते मीवा पारतनां आनि येसु किरिस्तुना आत्माता सहायमतोनि नाकु वायना ई कस्टाल्के नाकुन तप्पाकोंटा पलाते पेच्हंतां इंचि नाकु एरपाट मंता. 20 नाकु बसोंटा परिस्तिति वायाना सिग्गु अर्रोन, नना इदवेरादाका दैरनेमते किरिस्तुना सेवा कीतन, अल्हेने इंदकेगुडा कीसेक मंतन. नना हायिना-पिस्सिना नावा पिसवरतेंदाल किरिस्तुना पोर्रोल्तुन अंटोर कदर कियगोम इंचि नना वेल्लेन आसेते एदुर हूळसेक मंतन. 21 बारित्ते नना पिस्संतन इत्ते किरिस्तुनाहाटींगे. नना हायना गानि किरिस्तुनगेन दांतन इंचि हामुरगुडा नावा पायदातदे आंद. 22-23 इव रोंडुन नड्डुम नना इरगा अचाह्ताप आतन. नना पिस्सि मत्ते पेनदाहेंदाल इनाम दोर्कनलायक बेस कबळ किया परंतन. इल्हा नना हामुरतुन पेरकाना मरि पिसवरतुन पेरकाना नाकु बतले तेळियसेक हिल्ले. नाकय्ते इद मेंदुलतुन होळसि किरिस्तुनगेन होंचि मंदकन बारे अन्पिच्चंता. बारित्ते इदे बच्चोनो बेस. 24 गानि नना मीवाहाटीं, पिस्सि मनमळ वेल्लेन अव्सरम. 25 नना पिस्सि मंचि, मिमेट विस्वासमते बेस गट्टि पळना इंका मीवा पिसवरते मीकु बेस कुसि दोर्कनाहाटीं सहायम कीसेके मीवातोने मनंतन इंचि नाकु पूरा बरोसा मंता. 26 इल्हा नना बस्के अय्ते मर्रा मिहगा वांतनो, अस्के सामि नावाहेंदाल बतल-बतल अय्ते कीतोर अवुन केंजसि मिमेट येसु किरिस्तुन वेल्ले कदर हीकिट.
बेसता कबुरते वेहताप पिसालय पौलुसना विनंति
27 बद बतले आयि, मीवा पिसवर मात्रम किरिस्तुना बेसता कबुरते मत्ताप मनना. अस्के बतल आंता इत्ते, नना मिहगा वायिना, वायाकोन्ना मिमेट अंटोर उंदे आत्माते गट्टिगा बेस मंतिर आनि बेसता कबुरहाटीं अंटोर कलियसि पिस्सेक मंतिर इंचि वेरेतोरा हेंदाल नना केंजना. 28 बदे पोल्लेक आयि, बेसता कबुर वेहते तकलिप कियानोर्क मिमेट वेरियमट, दैरनेमते मंटु. मीवा दैरनेमतुन हूळसि, मोमोट नासडेम आंतोम, पेन ओर्कुन कापाळंता इंचि तकलिप कियानोर्क तेळियंता. इद पेनदा कबळे आंद. 29 सिराप किरिस्तुन विस्वासम कियालये आयो गानि ओनाहाटीं तिप्पल्क अर्रालयगुडा पेन किरिस्तुनहेंदाल मीकु आसिर्वादम हीता. 30 नना अर्ता तिप्पल्कुन मिमेट हूळतिर, इंदके केंजसंतिर आनि मिमेटगुडा अदे तिप्पल्कुने मंतिर.