यहुदि आयवा विस्वासुल्कुंक कतनाता अव्सरम हिल्ले
5
1 मनम नियमकुना लोप्पो दासुनलेसिं मनामन्नि इंचि किरिस्तु मनाकुन अंटेताल इळबळिस्तोर. अदुनहाटीं विस्वासमते गट्टिगा मंटु, मिमेट नियमकुना बर्वु मर्रा दासुल्कुनलेसिं कांजमटु. 2 केंजाट, नना पौलुसुन मीकु वेहसेक मंतन, मिमेट कतना कीसि दर्मसास्त्रमता नियम मत्ताप ताकंतोम इनानय्ते, मीकु किरिस्तुनाहेंदाल बतल पाय्दा आयो. 3 सिराप कतना कीकुत्तेने पेनदा मुन्ने सत्तेमंतुड आंतन इंचि इनकुंचि कतना कीतोर मूसाना पूरा नियमकु मत्ताप ताका पींता, इंचि नना मीकु मर्रा उंदि मल्का वेहासेक मंतन. 4 मी लोप्पोटाल बोरय्ते मूसाना नियम मत्ताप ताकसि सत्तेमंतुल्क आंतोम इंचि इनकुंचेके मंतिर, मिमेट किरिस्तुनाल अलग आतिर, ओना दयाताल लक्कु आतिर. 5 बारित्ते मनम विस्वासमता हेंदाल पेनदा मुन्ने सत्तेमंतुल्क आतोम इंचि आसे इरतोम. अदे आसेताहाटीं आत्मा बलमते दाना एदुर हूळसेक मंतोम. 6 येसु किरिस्तुन लोप्पो कतना कियना, कतना कियाकोन्ना अद बाता कबळतद आयो, गानि पावरमते कबळ कियना विस्वासमे कबळतद आंद.7 मिमेट मुन्ने विस्वासमते बेस बेरस्सेक मत्तिर. गानि इंदके मीकुन बोरो आपसेक मंतुर, इंचि सत्तेम हर्दे ताकसेक हिल्लिर. 8 इद आपाना कबळ मीकुन केयता पेनदद आयो. 9 वेल्लेने बेस पिंडिते इच्चुर पुल्लाटा पिंडि वाटते, पूरा पिंडितुन पुल्लागा कीसि पोहंता इद मनाकु एरपाटे. 10 नना कराहता निजम पोल्लें मत्ताप मिमेट ताकंतिर इंचि नाकु सामिनाहेंदाल पूरा बरोसा मंता. मीवा विस्वासमतुन तप्सानोर बोरन्ना आयिर ओर्क तप्पाकुंटा सिक्सा दोर्कंता.
11 नावा विस्वासुल्कुनिटा! नना गिंटा कतना कियना इंचि वेहासेक तिरियसि मत्ते, नाकुन यहुदिल्क वेल्लेन तकलिप कियाकोन्नेर, येसु सामि क्रुसुनपोर्रो हीता मोक्कुता हेंदाले बस्केळ्क पिस्सना पिसवर मंता इंचि वेहताहेंकेने ओर्क होंग वाता. 12 मीकुन कतना कियागोम इंचि तिप्पल्क कियानोर, कुद आडिगुनलोरलेसिं आते बेस मनंता.
पेनदा आत्मा वेहताप ताकाना
13 गानि नावा विस्वासुल्कुनिटा! पेन मीकुन नियमकुना लोप्पोटाल इळबळिस्ता. अदुनहाटीं नना वेहासेक मंतन, मिमेट मीवा पापि विचाराल्कुन पूरा कियालय मीकु विचारम वाताप ताकानायो गानि पावरमते वरोंक-वरोर सहायम कीसेक मंदना. 14 बारित्ते मूसाना अन्नि नियमकु उंदे आदेसते कलियसि मंता. अद बतल इत्ते, “मीवद मिमेट बच्चोन पावरम कीकुंतिर, अचोने पावरम इंका वरोना पोर्रो कीम्टु.” 15 गानि मिमेट गिंटा नय्कुनलेसिं उंदांक-उंदि कस्कसेक, इग्गिस तिंचेके बल्हा मनंतंगो अल्हा मत्ते उसारते मंटु! उंदि रोज वरोंक-वरोर नासडेम आया परांतिर.
16 नना वेहानद बतल इत्ते, पेनदा आत्मा मीकुन ताकिस्ताप ताकट, अल्हा ताकते मीवा मनसुना पापि विचाराल्कुनाल लक्कु मनांतिर. 17 बल्हा इत्ते, मनकना पापि विचाराल्क, पेनदा आत्माता विचाराल्कुंक अड्डम मनंतां आनि पेनदा आत्माता विचाराल्क मनकना पापि विचाराल्कुंक अड्डम मनंतां. इव रोंडुना विचाराल्क बस्केने कलियों. अदुनहाटीं मिमेट बतल अय्ते कींतोम इंतिर, अद किया परिर. 18 गानि मिमेट पेनदा आत्मा ताकिस्ताप ताकते, मिमेट मूसाना नियमकुना कय्दा हिळु हिल्लिर. 19-21 मनकना पापि कबाह्क मनाकु एरपाटे मंतां. अव इव आंदुं बोगमतनम, अपवित्र कबाह्क, सिग्गु हिल्वा कबाह्क, बोम्मा पूजां, होदें, वरोंक-वरोर हय्साकोंटा मनमळ, जगडाल्क, कळ्क पोत्तमळ, होंग, नाके गावाले इनमळ, लोकुल्कुना नड्डुम पुटपाट कियमळ, वेरे गँग तयार कियमळ, कल्लु उनमळ, विद्दुरतनम इसोंटव इंका वेल्लेन पोल्लें मंतां. इसोंटा कबाह्क कियानोर पेनदा राज्येमते वारसदार आया परुर. इद पोल्ले नना मीकु मुन्नेने वेहतन, अल्हेने इंदकेगुडा वेहासेक मंतन. 22 पेनदा आत्माता कबाह्क इल्हा मंतां: पावरम कियमळ, कुसिते मनमळ, सांतिते मनमळ, ओप्के पीसि मनमळ, दया कियमळ, मंचितनम, इमानदारते मनमळ, मेत्तगा मनमळ, बसोंटा परिक्सा वायना गानि अव्टे अर्राकुंटा सततुन आपकुनमळ. 23 इल्हा ताकते इवुंक अड्डम बदे नियम हिल्ले. 24 बोरय्ते येसु किरिस्तुन नमतोर मंतुर, ओर ओरा पापि विचाराल्कुन, पापि आसेन क्रुस पोर्रो वेलळ वाटताप अवुंक लक्कु आतुर.