वरोंक वरोर सहायम कीम्टु
6
1 गानि ना विस्वासुल्कुनिटा! मीवा लोप्पो बोरन्ना तप्पु कबळ कीते, मिमेट पेनदा आत्माते ताकानोर होंगुंक वायाकोंटा ओनगा होंचि ओन बेस समजांचि, सत्तेम हर्दे तटु. अल्हेने मिमेटगुडा असोंटा परिक्साते अर्रामन्नि इंचि, उसारते मंटु. 2 मिमेट तकलिपते वरोंक-वरोर सहायम कीम्टु, अल्हा कीतेने किरिस्तु हीता नियमतुन पूरा किया परांतिर. 3 बारित्ते, बोरे आयिर पेद्दातनम हिलाकुना गानि पेद्दातनम हूप्संतुर, असंटोर ओरद-ओरे पसांचकुंचेके मंतुर. 4 हरेक मनकल ओना सतता कबाह्कुन कुद्दु परिक्सा कीसि हूळना, वेरेतोना कबाह्क बल्हा मंता इंचि हूळाना आयो. अस्के ओना कबाह्क बेस मत्ते ओर सतता कबाह्कुन हूळसि कूस आयावच्चु. 5 बारित्ते बोरे आयिर, ओना जिम्मेदारि ओरे एतमळ गावाले. 6 बोरय्ते पेनदा पोल्ले करियतुर, ओर अन्नि बेसता वस्तुल्कु कराहतोंक पंचि हियमळ गावाले.7 पेनदुक बतल तेळियो इंचि नाळेम कीसि पसांचमटु, मिमेट बवय्ते वीतकिर, अवने कोयकिर. 8 बोरय्ते ओना पापि गुनम वेहताप वीतंतोर, ओर नासडेमता पंटा कोय्यंतोर. आनि बोरय्ते आत्मा वेहताप वीतंतोर, ओर आत्माता हेंदाल बस्केळ्क पिसना पिसवरता पंटा कोय्यंतोर. 9 मनम उंदेतीर बेसता कबळ कीते, पेन निरनायम कीता वेला एवतारिते मनाकु दाना पाय्दा दोर्कंता. अदुनहाटीं मनम नेरबळाकोंटा बेस कबळ कियना. 10 अय्ते मरि, मनाकु बल्हा मोका दोर्कते अल्हा अंटोराहाटीं आनि एक्कोते-एक्को मना विस्वासुल्कुनाहाटीं बेस सहायम कीकोम.
सिट्टिता आकिर पोल्लें
11 हूळाट, इद सिट्टि पेद्दा-पेद्दा अक्सराल्कुने नावा कय्दे मीकु रास्संतन.a 12 नालुरा मुन्ने नना बेसतोन इंचि हूप्सानोर, ओरे मीकुन कतना कियागोम इंचि बल्मि कींतुर. इल्हा बारि कींतुर इत्ते, किरिस्तुना क्रुसताहेंका वायाना तकलिपताल तपिच्कुननाहाटीं ओर इल्हा कींतुर. 13 बोरय्ते कतना कीसि मंतुर, ओरगुडा मूसाना नियमते ताकुर. गानि ओर वेहताप मिमेट कतना कीते ओर्क पेद्दातनम दोर्कंता इंचि, ओर मीकु इल्हा वेहांतुर. 14 गानि नना अय्ते, मना सामि येसु किरिस्तु क्रुसुनपोर्रो हातोर इंचि नमंतन आनि दीन पोर्रेने नाकु पूरा बरोसा मंता. आ क्रुसुनहाटींगे दुनियाता पोल्लें नाक कलियों, नावा पोल्लें ओर्क कलियों. 15 बारित्ते कतना कियना, कतना कियाकोन्ना बतल पाय्दा हिल्ले. पेन मना लोप्पो पूना पिसवर हीता अदे पाय्दातद आंदु. 16 अदुनहाटीं, बचुटुर अय्ते ई नियमते ताकंतुर अच्चुटुर पोर्रो, आनि पेनदुन नमतुर अंटुर इस्राएल लोकुल्कुना पोर्रो सांति आनि दया दोर्किकांटी.