मनम दासुल्क आयोम पेनदा मर्कुम
4
1 नना वेहानद बतल इत्ते, वारसदार बदवेरादाका सिन्ना पेडल मनंतोर, अदवेरदाका ओर लोता मालक आसिगुडा जीतागानलेसिं मनंतोर. 2 इत्ते, बाबो निरनायम कीता वेला एवनदाका ओर ओन कापाळनोरा आनि दनमता कावेल कियानोरा कय्दा हिळु मनंतोर. 3 अल्हेने मनमगुडा सिन्ना पेडनलेसिं तेळियवोर्कुम मत्तस्के, दुनियाता नियमकुने दोहचि वाटताप मत्तोम. 4 गानि बस्के अय्ते पेन निरनायम कीता वेला एवता, अस्के दाना मर्रिन ई दुनियाते लोहता. ओर मूसाना नियम परकारम ताकानोरा लोप्पो उंदि मुरतटा पीटे पुटतोर. 5 बारित्ते, मनम पेनदा पिलाल्क आयना इंचि, मूसाना नियमकुने दोह्चि वाटताप मत्ता मनाकुन लेहलाये पेनदा मर्रि वातोर. 6 मनम पेनदा पिलाल्क आताहाटीं अद मना लोप्पो दाना मर्रिना आत्मातुन लोह्ता. अद आत्मा मना लोप्पो मंचि पेनदुन, “बाबा! बाबा!” इंचेके केयसेक मनंता. 7 अदुनहाटीं मिमेट इंदके दासुल्क आयिर, गानि पेनदा मर्क आंदिर. मिमेट मर्क आताहाटीं पेन मीकुन दाना वारसदार्कगुडा कीता.पेनदुन एरपाट कीसि ताकाना
8 दीनकन्ना मुन्ने मिमेट निजम पेनदुन एरपाट किया हिल्लिर, अदुनहाटीं अट्टि पेनकुना कय्दा हिळु मत्तिर. 9 मिमेट पेनदुन एरपाट कीतिर. निजम हूळते असल पेने मीकुन एरपाट कीता. अदुनहाटीं मिमेट दुनियातां अंगळमतव रीति-रिवाजकुने पजोळ्क बारि होंचंतिर? मर्रा मीकु अवुना कय्दा हिळे मनना मंताना? 10 मिमेट रोजकु, नेलां, कालाल्क, वर्सां इवुन नोमसेक मंतिर. 11 नना मीवाहाटीं कीता कस्टम वट्टिदे आंता बारे इंचि नाकु मीवा बारेमते बादा अनपिचेके मंता.
12 नावा विस्वासुल्कुनिटा, नना मीवालेसिं नियमकुन नोमवोन आतन, मिमेटगुडा नावालेसिं आम्टु नियमकुनेके मल्मटु, इंचि मीकुन विनंति कीसेक मंतन. इदवेरादाका मिमेट नाकुन बतले तकलिप किया हिल्लिर. 13 मुन्नेटा मल्का नना वातस्के, ना जीवा बेस मनाहिल्ले, अस्के मीकु किरिस्तुना बेसता कबुर वेहतन. अद मीकु एरपाटे. 14 ना जीवा बेस हिल्वका मीकु कस्टम आयाना गानि मिमेट नाकुन सिन्ना हूळा हिल्लिर, बेस हूळतिर. नाकुन पेनदा दूतालेसिं, नाकुन येसु किरिस्तुनालेसिं बेस हूळतिर. 15 नना निजम वेहंतन, अद वेलाते ना सेवाहाटीं नाक कळ्दा अव्सरम मंचि मत्ते, कळु इंका तेंडिस हियालय मिमेट तयार मत्तिर. अचोने नावा पोर्रो पावरम कियिंदिर इंचि नना वेहा परांतन, अय्ते अद कुसि इंदके बेके होत्ता? 16 नना मीवातोनि निजम वळ्कताहाटीं मीकु पगातोन आताना?
17 आबद्दम पोल्ले कराहनोर मीकुन ओरा पट्टुने अराहलय वेल्लेन कोसिस कीसेक मंतुर. ओरा अद कोसिस मीवा बेसताहाटीं आयो गानि मिमेट ओरा लोप्पो कलियसि मंचि मावाहेंदाल अलग आयना इंचि ओरा विचारम मंता. 18 नना मिहगा मनना हिलाकुना गानि बस्केळ्क बोरन्ना बेसता पोल्लें कराहते वेल्लेने कुसिते ओना पज्जो होनना. 19 ना पिलाल्कनिटा, मीकु बदवेरादाका किरिस्तुनालेसिं गुनम वायोनो अदवेरदाका, उंदि तल्लुंक एरपूरनेंके बल्हा नोप्पिं वांतांगो अल्हेने नना मीवाहाटीं मर्रा उंदि मल्का तकलिप अरसेक मंतन. 20 मीवा बारेमते नना बतल कीकन नाक तोस्सेक हिल्ले. अदुनहाटीं इंदके नना मिहगा वासि, मीतोनि वेरे तरिकाते वळ्कना इंचि नावा आसे मंता.
21 मूसाना नियमते ताकंतोम इननोर्कुन नना पूसकींतन, अवने बतल राससि मंता मीकु एरपाट मंताना? 22 अब्राहामुंक इव्वुर मर्क मत्तुर, वरोर दासिदानकु पुटतोर, इंका वरोर बारे ओना मरमिना मुत्तोंक पुटतोर, इंचि सास्त्रमते राससि मंता. 23 दासिदानकु पुटता पेडल इस्माइल इत्ते, मनकना विचारमताल पुटतोर. आनि मरमिना मुत्तोंक पुटता पेडल इसाक इत्ते बारे पेन हीता पोल्ले परकारम पुटतोर. 24 इव पोल्लें उंदि उदाहरनलेसिं मंतां. इव रोंड मुत्तोह्कु इत्ते, पेन लोकुल्कुनतोनि कीता रोंड करारकुनालेसिं मंतां. उंदि करार इत्ते सिनाय गुट्टाता करार आंदु.a ई करारता हेंदाल पुटता पिलाल्क, हाजिरानालेसिं दासुल्क आतुर. 25 हाजिरा अरब देसेमता सिनाय गुट्टालेसिं मंता इनकुंटु, हाजिरा इत्ते इंदकेटा येरुसलेमतोर्कुनलेसिं आंद. बारित्ते हाजिरा आनि दाना मर्कगुडा सिनाय गुट्टातगा हिता आ नियमकुना कय्दा हिळे मंतुर. 26 गानि स्वर्गमता येरुसलेम बारे मरमिना मुत्तो सारानालेसिं मंता, अद मना विस्वासुल्कुना तल्लुर आंदु. 27 दर्मसास्त्रमते इल्हा राससि मंता:
“गोड्डुमुर्रा होंचि मत्ता मुरतटुना!
निमे बोर्कुन कन्ना हिल्लिन, निमे कूस आम.
एर पूराना तकलिप आयवादाना,
निमे कुसिते केया.
बारित्ते मुय्दो मत्ता मुरतळकन्ना,
मुय्दो होळसीता मुरतळके वेल्लेटुर पिलाल्क मंतुर.”b
28 अदुनहाटीं नावा विस्वासुल्कुनिटा, मनम मनकल विचारम कीताप आयो गानि पेन करार कीताप इसाकुनालेसिं दाना मर्क आतोम. 29 अस्के मनकना विचारमते पुटतोर, पेन करार कीता परकारम पुटतोन बल्हा तकलिप कियुंदुरो अल्हेने इंदकेगुडा जर्गसेक मंता. 30 गानि दर्मसास्त्रमते बतल राससि मंता? “दासिदानकु पुटता मर्रिंक, मरमिना मुत्तोंक पुटता मर्रिनतोनि वारसान हक्क दोर्का परो. अदुनहाटीं दासिदान आनि दाना मर्रिन पलाते पेचहट!” इल्हा राससि मंता. 31 अदुनहाटीं नावा विस्वासुल्कुनिटा, मनम दासिदानोर्कुम आयोम गानि मरमिना मुत्तोना पिलाल्कुम आंदुम.