विस्वासम कियानोंके पेनदा आसिर्वादम दोर्कंता
3
1 ए गलातिया एरियाता लोकुरिटा, मिमेट निजमे बुद्दि हिल्वोर आंदिर. येसु किरिस्तुन क्रुसुनपोर्रो बारि वेलाड वाटतुर? दाना अर्तम बतल? इदंता नना मीकु बेस तेळियानाल वेहचि मत्तन. असल मीकुन तप्पुड हर्दुक तिराहतोर बोर? 2 इंदके मिमेटे वेहाट, मूसाना नियम परकारम ताकताहेंका मीकु पवित्र आत्मा दोर्कतना मरि किरिस्तुना बारेमता बेसता कबुरपोर्रो विस्वासम इरताहेंकाना? 3 पवित्र आत्माता सहायमतोनि सुरुव कीता मीवा पूना पिसवरतुन मिमेट मीवा बलमतेन पुरागा कियालय हूळसंतिरा? मीकु गिचचोगुडा बुद्दि हिल्लेना? 4 बेसता कबुरताहेंका मिमेट वेल्लेन तिप्पल्क अरतिर, अदंता एर्तमेना? नना मात्रम ओप्कुन्नोन. 5 पेन मीकु दाना पवित्र आत्मातुन हीसि मीवा नड्डुम पेद्दा-पेद्दा अद्बूताल्क कींता. अद बल्हा? मिमेट मूसाना नियम परकारम पिस्संतिट इंचा? हिल्ले. मिमेट किरिस्तुना बारेमता बेसता कबुर केंजसि दानपोर्रो विस्वासम कीतिर इंचि अल्हा कींता.6 दर्मसास्त्रमते वेहताप, अब्राहाम पेनदा पोल्ले केंजसि विस्वासम कीतोरa, इंचि पेन ओन सत्तेमंतुड इत्ता. इदगुडा अल्हेन आंद. 7 अदुनहाटीं बोरय्ते पेनदापोर्रो विस्वासम इर्रंतोर, ओरे अब्राहामुना निजमाता वंसमतोर आंदुर, इद मीकु तेळियना. 8 यहुदि आयवोर अंटोर्कुन पेन ओरा विस्वासमतुन हूळसि सत्तेमंतुल्क कींता इंचि दर्मसास्त्रमते रासि मंता. इदुना बारेमते पेन अब्राहामुंक, “अन्नि जातिनोर्कुंक नीवाहेंदाले आसिर्वादम दोर्कंता,”b इंचि मुन्नेन वेहचि मत्ता. 9 इंचि अब्राहामुनलेसीं पेनदा पोल्लेपोर्रो बोरय्ते विस्वासम इर्रंतोर, ओन्के अब्राहामुंक दोर्कताप पेनदाहेंदाल आसिर्वादम दोर्कंता.
10 गानि बोरय्ते मूसाना नियमतुन नमसि मनंतोरो, ओन्क सिराप सापनेमे दोर्कंता. बारित्ते, “मूसाना नियमते रासि मत्ता अन्नि नियमकुन अन्नि वेलाते बरोबर पीसि ताकवोर अंटोर्क पेनदा सापनेम दल्गंता,c” इंचि दर्मसास्त्रमते रासतद मंता. 11 दीनहेंदाल इंदके मनाकु तेळियता गदा, मूसाना नियमतुन पीसि ताकानोर बोरे पेनदा मुन्ने सत्तेमंतुड आयोर. बारित्ते, “पेनदुन विस्वासम कीसि सत्तेमंतुड आतोरे पिसनुर,(पेनदापोर्रो विस्वासम इरसि बोरय्ते सत्तेमंतुड आंतोर, ओन्के बस्केळ्क पिसना पिसवर दोर्कार.)”d इंचि दर्मसास्त्रमते रासि मंता.
12 इगे मूसाना नियम आनि विस्वासमकु बतले संबंदम हिल्ले. बारित्ते, “बोरय्ते अवुन पीसि ताकंतोर, ओर अवुनतोने पिसंतोर,”e इंचि दर्मसास्त्रमते रासि मंता. 13 “मराकु वेलाड वाटता हरेक मनकल सापनेम दल्गतोरे,”f इंचि दर्मसास्त्रमते रासतद मंता. अदुनहाटीं मूसाना नियमहेंका मनाकु दल्गता सापनेमतुन किरिस्तु कुद्दु येतकुत्तोर. इल्हा किरिस्तु सापनेम दल्गतोर आसि मनाकुन आ सापनेमताल कापाळतोर. 14 अब्राहामुंक पेन हीता आसिर्वादम येसु किरिस्तुनहेंदाल यहुदि आयवोर्कगुडा दोर्कना इंचि किरिस्तु मनाकुन पिसागोटतोर. दीनहेंदाल मनम ओनपोर्रो विस्वासम कीसि पेन हीता पोल्ले परकारम पवित्र आत्मातुन दोर्किच्कुना परंतोम.
मूसाना नियम आनि पेनदा पोल्ले
15 अय्ते नावा विस्वासुल्कुनिटा! मना रोजता पिसवरताल उंदि पोल्ले नना मीकु वेहांतन. अद बतल इत्ते, मनकलोरा नड्डुम आता करारतुनगुडा, “इद करार ताको, हिलाकोंटे इदुन बदलांचा पींता,” इंचि मनम इना परोम. 16 अल्हेन अब्राहाम आनि ओना वंसंमतोनतोनि पेन कीता करारता बारेमते मंता. गानि दर्मसास्त्रमते, “वंसंमतोर्क” इंचि रासि हिल्ले. अगा अल्हा रासि मंचि मत्ते वेल्लेन मंदिताहाटीं आसि मनवळ. गानि अल्हा रासाकोंटा वरोनाहाटीं इत्ताप, “नीवा वंसंमतोन्क” इंचि रासि मंता. आनि आ वरोर इत्ते किरिस्तु आंदुर. 17 इंदके इदुन बेस केंजाट! नालूं नुह्कुना मुप्पै वर्साना पज्जो वाता मूसाना नियम, पेन मुन्नेन कीसि मत्ता करारतुन बल्हा बदलांचा परंता? बदलांचा परो. अदुनहाटीं अद इंदकेगुडा ताकसंता.
18 ओक्कला वारसान हक्क गिंटा मूसाना नियमतुन पीसि ताकताहेंका दोर्कता इनानय्ते, अद पेन हीता पोल्ले परकारम दोर्कतद आयो. गानि अब्राहामुंक अय्ते अद पेन हीता पोल्ले परकारमे दोर्कता.
19 अय्ते मर्रि पेन मूसाना नियमकु बारि हीता इंतिर? पेन अब्राहामुनतोनि उंदि करार कीता. अद करार परकारम ओना वंसंमताल वरोर वायनद मत्ता. ओर वायनजेम पापम इत्ते बतल मनाकु तेळियनाहाटीं पेन अव नियमकु हीता अचोने. पेन ई नियमकुन दाना दूतानहेंदाल मूसाना कय्दुक हीता. बारित्ते मूसाल पेन आनि लोकुल्कुनाहाटीं नड्डुम मनकल मत्तोर. 20 इव्वुर्कुन कल्पालय नड्डुमतोना अव्सरम मनंता. गानि इगे पेन सीदा अब्राहामुनतोनि करार कीता.
मूसाना नियमते पिसवर हिल्ले
21 अय्ते मरि मूसाना नियमकु पेन हीता पोल्लेना विरोदमते मंतंगा? असले हिल्ले. ओक्कला मूसाना नियमकु पिसवर हियानव अय्ते, मनम अवुनतोने सत्तेमंतुल्क आसि मन्नेरम. 22 गानि दर्मसास्त्रम अय्ते, “पूरा दुनिया पापमते दोह्चि मंता,” इंचि वेहंता. अल्हा बारि आता इत्ते, हीता पोल्ले परकारम दोर्कना आसिर्वादम, येसु किरिस्तुन पोर्रो विस्वासम कीतोर्के दोर्कना इंचि. 23 गानि येसु किरिस्तुन पोर्रो विस्वासम कियना कालम वायका मुन्ने मनम मूसाना नियमकुने दोह्चि वाटताप मत्तोम. इंदके बोर मनकल अय्ते अव नियमकुने दोह्चि वाटताप मंतोरो, ओर येसु किरिस्तुन पोर्रो विस्वासम कीसि अव नियमकुनाल पलाते अर्रा परंतोर इंचि पेन मनाकु हुपिस्ता. 24 इत्ते मनम किरिस्तुन पोर्रो विस्वासम कीसे सत्तेमंतुल्क आयना इंचि, ओर वायनदाका मूसाना नियमकु मनाहाटीं वरोर बेस ऊळगेम कियानोन लेह्का मनाकुन किरिस्तुंक दग्गेरे कियना कबळ कीसेक मत्तां. 25 इंदके किरिस्तुन विस्वासम कियना कालम वाता, अदुनहाटीं मनाकु मूसाना नियमता कय्दा हिळु मनना अव्सरम हिल्ले. 26 येसु किरिस्तुन पोर्रो विस्वासम कीताहेंका मिमेट अंटोर इंदके पेनदा पिलाल्क आतिर. 27 अद बल्हा इत्ते, बोरय्ते किरिस्तुना पोर्रोल्ते बापतिस्मा येतंतुरो, ओर अंटोर किरिस्तुने कलियसोत्तुर. 28 इंदके यहुदि, यहुदि आयवोर, जीतागाड, मालक, मांड्सा, मुरतळ इल्हा बतले परक हिल्ले. किरिस्तुने मिमेट अंटोर उंदे. 29 मिमेट किरिस्तुना लोकुल्क आतिर, इत्ते अब्राहामुना वंसमतोर आंदिर. दीनहेंदाल पेन अब्राहामुंक हीता पोल्ले परकारम, पेन ओन्क हियना आसिर्वादमता वारसदार्कगुडा आंदिर.