पौलुस कराहता पोल्लेन प्रेरितुल्क येरुसलेमते ओप्कुंतुर
2
1 पजा पडनालूं वर्सां आतंका नना मर्रा येरुसलेम होत्तन. अस्के नातोनि बरनाबास मत्तोर. मोमोट होननेंके नातोनि तितुस इनानोनगुडा पीसि ओतन.a 2 नाकु अगा तप्पाकोंटा होनापींता इंचि पेन वेहचि हूपिस्ताहाटीं नना होत्तन. पेनदाहाटीं नना कीता कस्टम एर्तम आयानायो इंचि यहुदि आयवोर्क नना वेहता बेसता कबुरतुन अगटा लीडर्कुन बाजुंक केयसि ओर्क वेहतन.3 नातोनि मत्ता तितुस यहुदि आयोर. अयना ओना कतना कियनाहाटीं ओर लीडर्क जबरदस्ति किया हिल्लुर. 4 गानि मावा लोप्पो इच्चुर लोकुल्क विस्वासुल्कुनलेसीं आसि मक्किस होळियतुर. येसु किरिस्तु माकुन यहुदिल्कुना नियमाल्कुना गुलामगिरिताल पलाते पेचाह्तदुन चुपचाप हूळसि, माकुन मर्रा गुलामगिरिते अराहचि नासडेम कियना उद्देसमते ओर वातुर. 5 गानि येसु सामिना बेसता कबुरता सत्तेम बस्केळ्क मीवा लोप्पो मनना इंचि मोमोट मात्रम ओरा पोल्लेन असले नम्मा हिल्लोम.
6 अगा मत्ता लीडर्क, नना वेहतव्टे बवे पोल्लें कल्पा हिल्लुर. आनि पेनदा मुन्ने अंटोर समानमे. अदुनहाटीं ओर लोकुल्क बच्चोर पेद्दोर्क अयना बेसे, नाकु बतल पिकिर हिल्ले. 7-9 गानि यहुदिल्कुंक बेसता कबुर वेहना जिम्मेदारि पेन पत्रुंक हीतापे, यहुदि आयवोर्कुंक बेसता कबुर वेहना जिम्मेदारि पेन नाकु हीता, इंचि याकोब, कयपालb आनि योहान ई पोर्रोल होत्ता पेद्दा मनकलोर तेलपिच्कुत्तुर. यहुदिल्कुनाहाटीं प्रेरित इंचि पेन पत्रुन पेरता आनि ओन्क बेस हिम्मत हीता. अल्हेन नाकगुडा अदे पेन यहुदि आयवा लोकुल्कुनाहाटीं प्रेरित इंचि सेवा कियालय हिम्मत हीता. पेन नाकु हीता आसिर्वादमतुन मतिते इरसि ओर नाकुन आनि बरनाबासुन स्वीकार कीतुर. पजा ओर बारे यहुदिल्कुनगा आनि मोमोट बारे यहुदि आयवा लोकुल्कुनगा होनना इंचि ओर निरनायम कीतुर. 10 ओर माकु उंदे पोल्ले वेहतुर अद बतल इत्ते मोमोट अगा होत्तस्के गरिब लोकुल्कुंक सहायम कियना इंचि. आनि नाकगुडा अदे कबळ कियना आसे मत्ता.
पौलुस पत्रुंक विरोद कींतोर
11 कोन्नि रोजकुंक पत्रु अंताकिया सहरते वातोर. अगा वातस्के ओर उंदि तप्पु कीतोर. अदुनहाटीं ओर कीतद तप्पु इंचि ओन्क मोकोम मुन्नेन वेहातन. 12 असल बतल आता इत्ते, याकोबनगटाल इच्चुर यहुदि विस्वासुल्क पत्रुनगा वातुर. आ लोकुल्क वायनदाका पत्रु यहुदि आयवा विस्वासुल्कुनतोनि कलियसि तिनुड-उनुळ कियुंदुर. गानि बस्के अय्ते ओर वातुर, अस्केटाल मात्रम यहुदि रिवाजकुन पीसि ताकना लोकुल्कुंक वेरियसि, पत्रु यहुदि आयवा विस्वासुल्कुनाल लक्कु आतोर. 13 इंका ओर कियनद हूळसि वेरे यहुदि विस्वासुल्कगुडा अल्हे कियालय दल्गतुर. अचोने आयका बरनाबासगुडा ओरव्टेन कलियतोर. 14 पजा ओर बेसता कबुरता सत्तेमतुन एरपाट कीसि ताकसेक हिल्लुर इंचि नाकु तेळियतस्के नना पत्रुन, “निमे यहुदि जातितोन आसिगुडा यहुदिल्कुना रीति-रिवाजकुन पीसि ताकसेक हिल्लिन. असोंटस्के यहुदि आयवोर्कुन यहुदिल्कुना रीति-रिवाजकुन पीसि ताकालय बारि जबरदस्ति कीसंतिन?” इंचि अंटोर मुन्नेन पूसकीतन.
15 बोर्कुन अय्ते मना यहुदिल्क पापिर्क इंचि इंतुर आ जातिते मनम पुट्टा हिल्लोम, मनम पुटतस्केटाल यहुदिल्कुमे. 16 अयना मूसाना नियमतुन पीसि ताकते आयो, गानि येसु किरिस्तुन नम्मुतेन वरोर मनकल सत्तेमंतुड आंतोर इंचि इंदके मनाकु एरपाट मंता. अदुनहाटीं येसु किरिस्तुन विस्वासम कीताहेंका सत्तेमंतुल्क आयगोम इत्ता उद्देसमते मनम यहुदिल्क येसुनपोर्रो विस्वासम कीतोम. बारित्ते मूसाना नियमतुन पीसि ताकतोर बोरे मनकल सत्तेमंतुड आयोर.
17 सत्तेमंतुल्क आयनाहाटीं नियमाल्कुन पीसि ताकका, मनम किरिस्तुन विस्वासम कींतोम. इंचि इच्चुर यहुदिल्क मनाकुन पापिर्क इंचि इन्कुंतुर. इत्ते बतल किरिस्तु पापम किया वेहालय वातोरा? अल्हा असले आयो. 18 यहुदिल्कुना बव नियमकुन अय्ते नना होळसीतनो, अवे नियमकुन पोर्रो मर्रा ताकानय्ते नना मूसाना नियमाल्क तपतोने आंतन. 19 इत्ते मुन्ने नना मूसाना नियम परकारम ताकसेके पिसालय हूळुंदुन, गानि बस्केळ्क अवुन पीसि ताका पराकोंदुन. इंदके पेनदाहाटीं पिसना इंचि अवुनंता होळसतन. दीना अर्तम बतल इत्ते यहुदिल्कुना रीति-रिवाजकुनाहाटीं नना हाताप आतन. 20 नाकुन किरिस्तुनतोनि क्रुसुनपोर्रो वेलाड वाटमळ जर्गता इत्ते, इंदके नावा पळाना पिसवर हासोत्ता. गानि नावा लोप्पो किरिस्तु जीवाते मंतोर. इंदके नावा ई मेंदुलते मनना जीवा, नाकुन बच्चोनो पावरम कीसि नावाहाटीं ओना जीवातुन हीता पेनदा मर्रिनापोर्रो नना विस्वासम कीताहेंका दोर्कतद आंद. 21 पेनदा दयातुन नना विलवा हिल्ले इंचेक हिल्लेन. गानि मूसाना नियम परकारम ताकसि मनकलोर सत्तेमंतुल्क आयानय्ते मनाहाटीं येसु किरिस्तु हायना अव्सरम मनाहिल्ले मरि.