गलातिया एरियाते मनना विस्वासुल्कुंक पौलुसना सिट्टि
गलातिया एरियाता विस्वासुल्कुंक पौलुसुन हेंदाल नमस्कारम
1
1 नना येसु किरिस्तुना वरोर प्रेरितुनa आंदुन, नावा पोर्रोल पौलुस. नना प्रेरित इंचि मनकलोराहेंदालो हिलाकोंटे बोरो वरोर मनकल नाकुन कीताहेंका आया हिल्लेन, गानि कुद्दु येसु किरिस्तु आनि ओन हामुरताल मर्रा जीवाते तेहता आ पेन बाबाले नाकुन केयतोर. 2 इद सिट्टि गलातिया इनना एरियाते मनना विस्वासुल्कुंक, इत्ते मीवाहाटींगे नना आनि नावातोनि मनना विस्वासुल्कुनहेंदाल रासतन.3 मना पेन बाबाल आनि मना सामि येसु किरिस्तुनहेंदाल मीकु दया आनि सांति दोर्कि. 4 मनम मनना ई पापि दुनियाताल मनाकुन पिसागोटना इंचि मना पेन बाबाना इच्चा मत्ता. अदुनहाटीं येसु किरिस्तु मनाहाटीं ओना जीवा हीसि पेन बाबाना इच्चातुन पूरा कीतोर. 5 दुनियाता लोकुल्क बस्केळ्क ओने तल्सकुन्निर.
निजमाता बेसता कबुर उंदे आंदु
6 बद पेन अय्ते येसु किरिस्तुना दयाहेंदाल मीकुन दग्गेरे कीकुत्ता, असोंटा पेनदुन इच्चोन बिराना होळसिसि, बदो वेरे बेसता कबुरतेके तिरियतिर. इदुन केंजसि नाकु वेल्लेन इचंत्रम आसंता. 7 असल निजम बतल इत्ते, वेरे बदे बेसता कबुर हिल्ले. गानि इच्चुर लोकुल्क मंतुर ओर मीकुन गयबेत कीसंतुर आनि किरिस्तुना बारेमता बेसता कबुरतुन बदलांचलय हूळसंतुर. 8 ओक्कला मोमोट आयि स्वर्गमताल वाता पेनदा दूता आयि, मोमोट मीकु वेहता बेसता कबुर तप्पा इंका वेरे कबुर वेहानय्ते, असंटोर्कुन पेन नासडेम कीसि पोहि. 9 मोमोट मीकु मुन्ने वेहता पोल्लेतुन इंकुंदि मल्का वेहचंतोम बेस केंजट. बोरे आयिर, मिमेट मुन्ने नम्मुता बेसता कबुर तप्पा वेरे कबुरगिंटा वेहानय्ते पेन ओन नासडेम किय्यि.
10 अय्ते नना इंदके लोकुल्क नाकुन मेच्चुकुनगोम इंचि हूळसंतना मरि पेनदा आसिर्वादम दोर्कगोम इंचि हूळसंतना? हिलाकोंटे लोकुल्कुन कूस कियानसंटोना? ओक्कला नना लोकुल्कुन कूस कियानसंटोन आसि मत्ते किरिस्तुना सेवाकुन आयाकोन्नेन.
पौलुस वेहना बेसता कबुर पेनदागटाल वाता
11 नावा विस्वासुल्कुनिटा, नावा पोल्ले बेस केंजट! नना वेहता बेसता कबुर मनकनहेंदाल आयो, इद मिमेट मतिते तासकुंटु. 12 इंका इद नाकु बोर मनकलोरहेंदालगुडा दोर्का हिल्ले आनि बोर मनकल नाकु कराह हिल्लोर. इदु नाकु कुद्दु येसु किरिस्ते कुल्ला कीसि वेहतोर.
13 नना यहुदि रिवाजते पिसनेंके नावा पिसवर बल्हा मत्ता मीकु एरपाटे. अस्के विस्वासुल्कुन नना इरगा तकलिप कीतन आनि ओर्कुन नासडेम कियालय बस्केळ्क ओरा पज्जो अरसि मनुंदुन. 14 यहुदिल्कुना रीति-रिवाजकुने ताकमळते नना नावा वय्सुनोरकन्ना उंद अळ्गु मुन्नेन मनुंदुन. नावा तादो-बाबुरहेंदाल दोर्कता रीति-रिवाजकुन पोर्रो ताकमळ नाकु वेल्लेन इस्टम मत्ता.
15 गानि पेन मात्रम नना यावाना पीटे मननेंकेन नाकुन पेरता. पजा दाना दयाते नाकुन केयसि, दाना मर्रि येसु किरिस्तुना बारेमते तेळियागोट्सि वेहता. 16 अदुनहाटीं नना यहुदि आयवा लोकुल्कुन लोप्पो होंचि दाना मर्रिना बारेमता बेसता कबुरतुन वेहा परतन. इल्हा जर्गतस्के नना बोरे मनकंक होंचि कलिया हिल्लेन आनि बोने बतल पूसकिया हिल्लेन. 17 आनि नाकन्ना मुन्ने आता प्रेरितुल्कुंक कलियना इंचि येरुसलेमगुडा होना हिल्लेन. दाना बदुल, अस्केटद अस्केन नना अरब इनना देसेम होंचि, पजा दमिस्क सहरतेन मल्सि वातन.
18 पजा मूड वर्सां आतंका नना पत्रुंक कलियालय येरुसलेम होत्तन. होंचि ओनतोनि नना पदहेन रोजकु मत्तन. b 19 गानि याकोब इनना सामिना तम्मुंक तप्पा इंका बोरे प्रेरितुंक कलिया हिल्लेन. 20 नना पेनदा ओट्टु तिंचि वेहचंतन, बतल अय्ते नना मीकु रासेक मंतन, अव्टे गिचचोगुडा आबद्दम हिल्ले. 21 पजा नना सिरिया आनि किलिकिया इनना एरियाने होत्तन.
22 गानि यहुदिया एरियाते मनना विस्वासुल्क अय्ते नाकुन बस्केन हूळा हिल्लुर. 23 ओर नाकुन एरपाट कियाकोन्ना, “बोर मनकल अय्ते मना लोकुल्कुन मुन्नेटा कालमते तकलिप कीसि नासडेम कियालय हूळुंदुर, ओरे इंदके किरिस्तुना बारेमता बेसता कबुरतुन वेहचंतोर,” इंचि वेरेतोर वळकनेंके मात्रम केंजतुर. 24 इल्हा इंचेके ओर नावाहेंदाल पेनदुन तल्सकुनुंदुर.