विस्वासमते कमजोर मत्तोर्कुंक सहायम कियना
15
1 अदुनहाटीं, विस्वासमते गट्टिगा मत्तोरम मनम सिराप मनाकु सुकम हियना कबाह्के कियाकोंटा विस्वासमते कमजोर मत्तोर्कुना कबाह्कुन हूळसि ओप्के पीसि मंदगोम. 2 मना दंटातोर्कुना बेसताहाटीं ओरा विस्वासम बेर्सना इंचि ओर्कुन कूस इर्रना लायक मनम मनमळ गावाले. 3 किरिस्तु इद बूमिपोर्रो वातस्के ओनद ओरे कूस कीकुनालय वाया हिल्लोर. गानि दर्मसास्त्रमते, “पेन बाबल, ओर नीकुन अपमानम कीतुर गानि अद अपमानम नाक आया पीता.”a इंचि किरिस्तुना बारेमते रासि मत्ताप जर्गता. 4 दर्मसास्त्रमते मुन्नेटाले रासि मत्तद उंदि-उंदि पोल्ले मनाकुन कराहना हाटींगे मंता. अदुन करियते मनम ओप्के पीसि दैरनेमते पिसा परांतोम इत्ता आसे दोर्कंता. 5 अदुनहाटीं मिमेट येसु किरिस्तुना विचारम मत्ताप अंटुर कूळसि मंदालय पेन मीकु दैरनेम आनि ओप्के हियिकांटीं. 6 इल्हा मिमेट अंटुर उंदे मनसु, उंदे लेंग आसि मना सामि येसु किरिस्तुना पेनबाबन तल्सकुना परांतिर.7 किरिस्तु मीकुन बल्हा स्विकार कीतोरो, अल्हेने मिमेटगुडा विस्वासमते कमजोर मत्तोर्कुन पेनदुक पेद्दातनम दोर्कना इंचि स्विकार कीम्टु. 8 नना वेहानद बतल इत्ते, एनकटा यहुदि पेद्दाल्कुंक पेन पोल्ले हीसि मत्ता, अद पोल्ले निजम आयाना इंचि किरिस्तु यहुदिल्कुना लोप्पो सेवक आसि वातोर. इद पोल्लेतुन मर्गमटु. 9 अचोने आयाका यहुदि आयवोरगुडा पेन ओरापोर्रो हूपिस्ता दयाहेंदाल दान तल्सकुनना इंचि किरिस्तु वातोर. भजन संहिताते इल्हा मंता:
“नना यहुदि आयवोरतोनि कलियसि,
नीकुन तल्सकुंतन.”b
10 इंका इल्हागुडा रासि मंता.
“ए यहुदि आयवा लोकुरिटा, मिमेट सामिन तल्सकुंटु.
पूरा देसेमतोर ओन तल्सकुंटु.”c
12 मर्रा यशायाहल रासतोर:
“यिशै वंसंमताल वरोर पुट्टानुर,
अंटुर पोर्रो ओर राज्येम कियानुर, इंका अंटुर ओन पोर्रो आसे इर्रनुर.”d
13 मिमेट विस्वासम कीताहाटीं, मीकु आसे हियना पेन अन्नि तीरुकुना कुसि आनि सांति हियिकांटीं. इल्हा पवित्र आत्मा हेंदाल मीवा आसे बेरस्सेक होंदार.
14 नावा विस्वासुल्कुनिटा! मीवा लोप्पो वेल्ले बेसतनम आनि तेल्वि मंता. अदुनहाटीं मिमेट वरोंक-वरोर बुद्दि वेहकुना परांतिर इंचि नाक पुरागा बरोसा मंता. 15-16 पेनदा दयाता हेंदाल यहुदि आयवोरा नड्डुम येसु किरिस्तुना सेवक आसि पेर्मनालेसिं बेसता कबुर वेहालासि नाकु अदिकारम दोर्कता. अदुनहाटीं कोन्नि पोल्लें मीकु मति कीसि हियना इंचि मीकु दैरनेमते रासतन. ना मनसुने बतल मंता इत्ते, यहुदि आयवोर पेनदा आत्मातेंदाल पवित्रम आयाना आनि पेन ओर्कुन ओप्कुननालायक कियना.
17 येसु किरिस्तुना लोप्पो कलियसि मंचि, इल्हा पेनदा सेवा कीसेके इंचि नना वेल्लेन कुसिते मंतन. 18-19 यहुदि आयवोर नना वेहता पोल्लेन केंजतुर, नना कीतव इचंत्रमाता कबाह्कुन हूळतुर. केंजसि, हूळसि ओर किरिस्तुन पोर्रो विस्वासम कीतुर. इल्हा नना पवित्र आत्माता बलमते येरुसलेम सहरताल इलुरिकुम एरिया एवनदाका किरिस्तुना बेसता कबुरतुन वेहतन. अदुनहाटीं किरिस्तुनाहेंदाल कीता पोल्लेंगें नना दैरनेमते वेहंतन. इवुंक तप्पा वेरे बवे पोल्लें वेहोन. 20 किरिस्तुना पोर्रोल बगाय्ते केंजा हिल्लुर अगा होंचि नना बेसता कबुर वेहना इंचि नावा मनसु तनलाळसेक मंता. बारित्ते इंका वरोर दोहता पुनादि पोर्रो लोन दोहमळ इस्टम हिल्वाप, इंका वरोर वेहता नाहकुने होंचि वेहमळ नाकु इस्टम हिल्ले. 21 गानि दर्मसास्त्रमते इल्हा रासि मंता:
“ओना बारेमते बेसता कबुर एरपाट हिल्वोर, ओन हूळानुर.
ओना बारेमते केंजवोर, ओर्क तेळियार.”e
पौलुस रोम सहरते होत्तोर
22 इल्हा बेसता कबुर एववगा नना होनना इत्ता विचारमतेने मनुंदुन, अदुनहाटीं नना मिहगा वाया परा हिल्लेन. 23 गानि इंदके, हींदा एरियाने येसु किरिस्तुना बेसता कबुर वेहना कबळतुन महतन, इगे बतल कबळ हिल्ले. अल्हेने वेल्लेने वर्सानाल मिहगा वांतन इंचि नावा जीवा तनलाळसेक मंता. 24 अदुनहाटीं नना इसपानिया देसेम होननेंके मिहगा वांतन इंचि आसे पळसंतन. मीवातोनि कोन्नि रोजकु मंचि नावा मनसु निंडता पजा नाकुन अगटाल मुन्नेटा पय्नमताहाटीं नाकुन सार्ला कीम्टु. 25 गानि इंदके नना पेनदा लोकुल्कुंक सेवा कियालय येरुसलेम दांतन. 26 बारित्ते मकिदुनिया एरियातोर आनि अकाया एरियातोर विस्वासुल्क संदा वाटसि, येरुसलेम सहरते पेनदा लोप्पो मत्ता गरिब लोकुल्कुंक सहायम कियना इंचि विचारम कीसि नाक हीतुर. 27 ओर इल्हा कीसि कूस मत्तुर, इल्हा कियमळे गावाले. बारित्ते यहुदि आयवोर्क पेनदा लोप्पो कलियालय आसिर्वादम दोर्कता, अय्ते ओर यहुदि लोकुल्कुंक अव्सरम मत्तवुनद इंका सेवा कियमळ गावाले. 28 अदुनहाटीं जमा कीता कोत्तन नना बेस ओसि ओर्क अप्पजेपंतन, पजा अगटाल होनानेंके मीकु कलियसि इसपानिया देसेम दांतन. 29 नना मिहगा वातस्के मनम अंटुरम किरिस्तुना आसिर्वादमते निंडांतोम इंचि नाकु एरपाटे.
30-31 नावा विस्वासुल्कुनिटा! मना येसु किरिस्तु सामिनाहेंदाल आनि पवित्र आत्माता पावरम हेंदाल मीकु बतल विनंति कीसेक इत्ते, यहुदा एरियाते मनना विस्वासम कियवा लोकुल्कुना कय्दाल नना पिस्सना आनि येरुसलेमते नना कियना सेवातुन पेनदा लोकुल्क ओप्कुनना, इंचि मिमेट नावाहाटीं उंदे मनसुने पेनदुक पारतना कीम्टु. 32 मनम पारतना कीताप पेनदुक इस्टम मत्ते, नना मिहगा वासि कोन्नि रोजकु मीवातोनि कुसिते मनंतन. 33 सांति हियना पेन मीवा अंटोरतोनि मन्निकांटि. आमेन.