विस्वासुल्कुंक पौलुस नमस्कार वेहतोर
16
1 मना विस्वासि अक्कल पीबे इनानद बच्चोरो बेसतद आंद. अद किंकरिया नाटेना विस्वासुल्कुनगा सेवा कीसेक मंता. 2 अद वेल्लेटोर्क सहायम कीता, अल्हेने नाकगुडा सहायम कीता. अद मिहगा वायानय्ते पेनदुक ओप्पनालायक मिमेट दान बेस हूळकुंटु. अल्हेने दान्क बतलन्ना अव्सरम मत्ते सहायम कीम्टु.3 पिरिस्किला आनि दाना मुय्दो अक्विलांकु नावाहेंदाल नमस्कार वेहाटु. ओर नावातोनि येसु किरिस्तुना सेवा कियानोर आंदुर. 4 ओर नाकुन पिसागोटनाहाटीं ओरा जीवातुन हियालय इंका तयार मत्तुर. नना ओर्क दन्यवाद कींतन. सिराप ननाने आयो गानि यहुदि आयवोर विस्वासुल्कगुडा दन्यवाद कींतुर. 5 ओरा लोतगा जमा आयानोर विस्वासुल्कुंकगुडा नावाहेंदाल नमस्कार वेहाटु. एसिया एरियाते अंटुर्कन्ना मुन्ने किरिस्तुन विस्वासम कीतोर ना दंटागाल इपेनितुस इननोंक, नावा नमस्कार वेहाटु. 6 मीवाहाटीं वेल्ले कस्टपळतद मरियमुंक नावा नमस्कार वेहाटु. 7 अन्द्रनीकुस आनि युनियास ओर नावा जीवातोर आंदुर, ओर नातोनि जेलने मत्तुर, ओर प्रेरितुल्कुना लोप्पो पोर्रोल पेय्सतोर इंचि अंटुर ओर्कुन एरपाट कींतुर, ओर नाकन्ना मुन्नेने किरिस्तुन विस्वासम कीतुर, ओर्क नावा नमस्कार वेहाटु.
8 सामिन लोप्पो ना पावरमगल्ला अम्पलियातुसुंक नमस्कार. 9 मनातोनि कलियसि किरिस्तुना सेवा कियानोर उरबानुसुंक नावा नमस्कार, अल्हेने नावा पावरमगल्ला इस्तुकुसुंकगुडा नावा नमस्कार वेहाट. 10 किरिस्तुन लोप्पो तकलिप वायाना गानि होळसाकोंटा इमानदारते मत्ता अपिलेस इनानोंक नावा नमस्कार. आनि अरिस्तुबुलुना लोतोर्कुंकगुडा नमस्कार वेहाट. 11 मावा जीवातोर हेरेदियोंकु नमस्कार वेहाट. नरकियुसुना लोतोर बोरय्ते विस्वासम कीतुर ओर्क नमस्कार वेहाटु. 12 तिरुपेना आनि तिरुपोसा इनना अक्काह्क सामिनाहाटीं कस्टपळंतां, अवुंक नमस्कार वेहाट. नावा पावरमगल्ला परिसिस इनना अक्कल इंका सामिनाहाटीं वेल्ले कस्टपळता, दान्क नमस्कार वेहाट. 13 बोनय्ते पेन पेरकुत्ता, आ रुपीसि इनानोंक आनि ओना यावल इत्ते नावा यावानसोंटद, ओर्क नावाहेंदाल नमस्कार वेहाट. 14 असुकिरितुसुंक, पिलगोनिंक, हिर्मेसुंक, पत्रुबासुंक आनि हिर्मोसुंक नमस्कार वेहाट, ओरतोनि मनना विस्वासुल्कुंकगुडा नमस्कार. 15 पिलुलगुसुंक, युलियंक, नेरयुसुंक आनि ओना हेलळ्कु नमस्कार वेहाट, उलुम्पासुंक आनि ओरतोनि मनानुर पेनदा लोकुल्कुंक नमस्कार. 16 मिमेट वरोंक वरोर कलियतस्के पावरमते नमस्कार कीम्टु. किरिस्तुना अंटुर विस्वासुल्कुना हेंदाल मीकु नमस्कार. 17 नावा विस्वासुल्कुनिटा! इच्चुर लोकुल्क मिमेट करियता पोल्लेन हेळाहलय ई पोल्लेंक विरोदमते वेरे पोल्लें वेहाचि मी लोप्पो वरोनद-वरोंक अर्राकुंटा कींतुर. असंटोरतोनि उसारते मंचि, ओर्क लक्कु मंटु इंचि नना मीकु विनंति कीसेक मंतन. 18 असंटोर मना सामि किरिस्तुना सेवा किय्युर, गानि ओरा पीटाहाटीं सेवा कींतुर. ओरा तिय्यटा पोल्लेनाहेंदाल सीदा-सादा लोकुल्कुन मुळहंतुर. 19 मिमेट बेसता कबुरता पोल्लें मत्ताप ताकसेक इंचि अंटुर केंजतुर, अदुनहाटीं नना वेल्ले कुसिते मंतन. मिमेट बेसता पोल्लेनहाटीं बुद्दितोर आसि मंटु, सेड्डा पोल्लेनहाटीं लक्कु मंटु इंचि नना मीकु वेहासेक मंतन. 20 मनाकु सांति हियना पेन बिराने देय्यमतुन मीवा काल्कुनगा तच्चि जारसि पोहंता. मना सामि येसु किरिस्तुनद मीवा पोर्रो दया मन्निकांटी, आमेन.
21 नावातोनि कलियसि किरिस्तुना सेवा कियानोर तिमोतिना हेंदाल मीकु नमस्कार. नावा जीवातोर लुकियुस, यासोन आनि सोसिपत्रु ईरा हेंदाल मीकु नमस्कार. 22 पौलुस वेहताप इद सिट्टितुन नना तिरतियुस इननोन रासतन आनि सामिना लोप्पो कलियताहाटीं मीकु अंटुर्क नमस्कार. 23-24 नाकुन, विस्वासुल्कुन हेळमितोरालेसिं बेस हूळानोर गयुसना हेंदाल मीकु नमस्कार. इद नाटेना कोत्तना व्यवहार कियानोर, इरास्तुना हेंदाल मीकु नमस्कार. अल्हेने कवारतुस दादाना हेंदाल मीकु नमस्कार.
25-27 पेनदुक वेल्लेन कदर दोर्कि. येसु किरिस्तुना बारेमते नना वेहता बेसता कबुर परकारम, पेन मीकुन विस्वासमते इंका गट्टिगा किया परांता. इद बेसता कबुर एनकाटा कालमताल मर्ममते मत्ता. गानि इंदके पेनदा कबुरतोर रासता सास्त्रमता हेंदाल मर्ममते मत्तद अद बेसता कबुरतुन बय्यारा कियालय माकु वेहता. अंटुर लोकुल्क इद कबुरतुन विस्वासम कीसि, पेनदा पोल्लेने ताकाना इंचि पेन हुकुम हीता. येसु किरिस्तुन मनागा लोहताहाटीं आ बस्केळ्क मनना पेनदुन मनम बस्केळ्क तल्सकुनकोम. आमेन.