इंका वरोना कदर कीम्टु
14
1 बोरय्ते विस्वासमते कमजोर मंतोर, ओन बेस कदर हीसि मीवा लोप्पो कल्पटु. गानि ओनतोनि बद बेसतद, बद बेसतद आयो इंचि वळ्कसेक मनमट. 2 तिनमळ बारेमते केंजट. विस्वासमते मनानोरव्टेटाल इच्चुर बारे, “तिननव बवय्ते मंतांगो, अन्नि तिना परांतोम,” इंचि इंतुर, गानि विस्वासमते पूनें वातोर इच्चुर बारे, “हव्विंग तिना मनि, सादा कुसिर तिनमळे बेस,” इंचि इंतुर 3 गानि हव्विंग तिनानोर आयि, तिनवोर आयि, ओर इव्वुर्कुन पेन दाना मनकलोर इंचि पेर्कुत्ता. अदुनहाटीं हव्विंग तिनानोर तिनवोन पास्कमनि, हव्विंग तिनवोर तिनानोन इंका पास्कमनि. 4 इंका वरोना जीतागान हूळसि, “निमे बेस कबळ कीसेकेना हिल्लेना” इंचि वेहानद मीकु अव्सरम हिल्ले. अद कबटा लेक्का ओना मालके हूळांतोर. असोंटा विस्वासुल्क गट्टिगेन निलंतुर बारित्ते पेन दाना मनकलोर्कुन गट्टिगा निलहा परांता.5 बोरो-बोरो बदाना उंदि रोजुन अन्नि रोजकुंकन्ना बेसता रोजु इंचि इंतुर, गानि बोरो-बोरो बारे अन्नि रोजुक उंदेतीर समानमे इंचि इंतुर. बोरे आयिर मी मनसुने बद बेसतद इंचि अनपिस्ता अल्हेन कीम्टु. 6 बोरन्ना बदाना उंदि रोजुन अन्नि रोजकुंकन्ना बेसता रोज इंचि नोमते, सामिना हाटींगे नोमंतोर. अन्नि तिनानोर इंका ओर सामिंक दन्यवाद कीसेकेने तिंतोर. हव्विंग तिनवोर, ओर इंका सामिनहाटींगे तिनाकुंटा दन्यवाद कीसेके मनांतोर.
7-8 मना लोप्पो बोरे आयिर संतम ओनाहाटींगे इंचि पिस्सोर, सामिनाहाटीं पिसंतोर. हायना गानि सामिना हाटींगे हांतोर. इल्हा मनम हायना, पिस्सिना सामिना लोकुल्कुमे आंदुम. 9 जीवाते मत्तोर आयि, हासोत्तोर आयि, अंटोर्कुंक सामि आसि मनना इंचि किरिस्तु हासि मर्रा जीवाते तेदतोर.
10 अदुनहाटीं विस्वासमते गट्टिगा मननोर आयि, विस्वासमते कमजोर मननोर आयि निमे ओरापोर्रो तप्पु बारि दोस्संतिन? ओर्कुन सिन्नतनमते बारि हूळंतिन? बारित्ते मनद अंटोरद उंदि रोज पेनदा राजगद्देता मुन्ने न्यायम आयना मंता. 11 दीना बारेमते पेन वेहता पोल्ले पुस्तकोमते इल्हा रासि मंता:
“नना ओट्टु तिंचि वेहासेक मंतन,
अंटुर लोकुल्क नावा मुन्ने टोंग्रा ऊनसि,
ननाने पेन इंचि एरपाट कियानुर.”a इंचि मंता.
12 अदुनहाटीं मनम अंटोर्क पेनदा मुन्ने नित्तिसि मना लेक्का हियापींता.
इंकावरोन पापमते अराहमट
13 इंदकेटाल मनम वरोना पोर्रो वरोर तप्पु दोस्सा मनि. इच्चोरे आयाका, मीवा विस्वासि दादलोर्कुन विस्वासमताल होळसियाना कबाह्क, पापमते अराहना कबाह्क मिमेट कियमट, दीन मति इर्रट. 14 नना येसु सामिनतोनि कलियसि मंतन इंचि अन्नि तिंडिं नाक ओज्जंतां, इदु नना एरपाट कीकुत्तन. गानि बोर्क अय्ते बदाना तिंडि ओज्जाकोंटे, ओर अदुन तिनाकुंटा मत्तेने बेस मनंता. 15 निमे तिनानवुन हूळसि, पूना विस्वासुल्कुना मनसु नाराज आसि पेनदुन होळसीते, नीवा लोप्पो पेनदा पावरम हिल्ले इत्तापे. असल ओरा हाटींगुडा किरिस्तु हातोर, गानि निमे नि गाटोतेंदाल ओर्कुन नासडेम कीसेके मंतिन. 16 इत्ते, “नना बेस कीसंतन, बिल्कुल तप्पा हिल्लेन इनकुंतिन,” गानि इंका वरोना नदरते निमे तप्पंतिन. दीनहेंदाल निवदे बदनाम आंता. इंचि तिनुळ-उनुळते जेगर्ता मन्नु. 17 पेनदा राज्येम इत्ते मना पिसवर पोर्रो किरिस्ते राज्येम कियना. दाना राज्येम इत्ते तिनमळ-उनमळता पोल्लेंगें अचोने इंचि इनकुनमट गानि पेनदा मुन्ने सत्तेमते पिसमळ, पवित्र आत्मा हेंदाल दोर्कना सांति आनि आनंदमते मनमळ आंद. 18 ई परकारम किरिस्तुना सेवा कीतोन पेन मेच्चुकुंता, आनि लोकुल्कुना लोप्पो इंका ओनकु कदर दोर्कंता.
19 अदुनहाटीं मनम बस्केळ्क सांति दोर्कानव आनि विस्वासमते बेर्सना कबाह्क कीकोम. 20 तिंडिहाटीं पेनदा कबळतुन नासडेम कियमट. अन्नि तिंडिं बेसतवे गानि बदाना तिंडि बोनकन्ना इस्टम हिलाकोंटे अद मनम तिंचि ओन विस्वासमताल अराहमळ मनद तप्पे आंदु. 21 हव्विं तिनमळ आयि, अंगुर कल्लु उनमळ आयि, इंका बतलन्ना आयि पूना विस्वासुल्कुंक इस्टम हिलाकोंटे, निमे इव अन्निना हेंदाल लक्कु मत्तेने बेस मनंता. 22 इवुना बारेमते मीवा विस्वासम बल्हा मंतानो, अद मीकु आनि पेनदुके एरपाट मनना. बोर मनकल अय्ते ओना विस्वासमतुन पीसि “तप्तन-हेळतन” इंचेके अनमानम कियाकोंटा मनांतोर, ओर वेल्लेन आसिर्वादम दोर्कतोर आंदुर. 23 गानि अनमानम कीसेक तिनानोर पेनदा मुन्ने तप्पु कीतोना लेक्कातेने वांतोर. बारित्ते ओर पेन पोर्रो विस्वासम कियाका तिंचेके मंतोर. पेन पोर्रो विस्वासम कियवा कबाह्क, ओन पापमते अरहंतां.