अदिकारिना कय्दा हिळु मंदना
13
1 इदु दुनिया पोर्रो मननव अन्नि अदिकाराल्क पेनदा हेंदाले वातव आंदु, इंदके राज्येम कियनोर्कगुडा पेने अदिकारम हीता. अदुनहाटीं राज्येम कियनोर वेहाताप अंटोर बेस केंजिस ताका पींता. 2 बारित्ते, अदिकारि वेहाताप ताकवोर बारे पेन निलाहता पद्दतुंक विरोद कीताप आंता. अल्हा ताकवोर ओनद-ओरे सिक्सा दोर्किच्कुंतोर. 3 सत्तेमते ताकानोंकु अदिकारिना वेर्रे मन्नो, तप्पु कबळ कियानोंक अदिकारिना वेर्रे मनंता. अदुनहाटीं अदिकारिंक वेरियाकोंटा मंदना इत्ते, मिमेट सत्तेमते ताकट. अस्के ओर मीकुन मेच्चुकुंतोर. 4 मीवा बेसताहाटींगे अदिकारिल्क पेनदा सेवकुल्कुनालेसिं कबळ कीसेक मंतुर. ओक्कला मिमेट गिंटा बतलन्ना तप्पु कीते ओर मीकु सिक्सा हींतुरे, इंचि मिमेट ओर्क वेरियसि मना पींता. तप्पु कबळ कियानोर्कुंक सिक्सा हियनाहाटींगे पेन ओर्कुन निलाहता. 5 अदुनहाटीं मिमेट सिक्साताल सिराप तपिच्कुनालय आयो गानि, मना आत्मातुन कूस इर्रलय ओर वेहाताप ताका पींता.6 देसेमतुन ताकसना अदिकारिल्क पेनदा सेवाकुल्के आंदुर. अदुनहाटीं मिमेट ओर्क कर दोहसेक मंतिर. 7 सरकारुंक बतलय्ते हियना मंतांगो अव हीसीम्टु, कर दोहनद दोहटु, तासिल दोहनद दोहटु, अदिकारिल्कुंक वेरियसि मनना इत्ते ओर्क वेरियट, बोर्क कदर हियना मंता ओर्क कदर हीम्टु. 8 मिमेट इंकावरोन पावरम कीम्टु, पावरम कियमळ तप्पा बोर्के आयि बदे पोल्लेता बाकि मनमट. अल्हा मत्तोर मूसाना नियमतुन पालन कीताप आंतोर. 9 अदुनहाटीं, “बोगमतनम कियमट, बोर्कुन हव्कमट, दोंगातनम कियमट, इंका वरोनदुना पोर्रो आस्ति कियमट,”a इंचि मूसाना नियमते रासि मंता. इंका बवन्ना वेरे नियमकु मत्ते, अव अन्निगुडा उंदे पोल्लेते कलियंतां, अद बद पोल्ले इत्ते, “निवद निमे बच्चोन पावरम कीकुंतिनो अचोने वेरेतोर्कुनगुडा पावरम कीम.”b 10 इंका वेरेतोर पोर्रो पावरम हूपिचनोर, ओरा नुकसान किय्योर. अदुनहाटीं पावरमता पोल्लेने, दर्मसास्त्रमता पोल्लें निजम आंतां.
11 मिमेट इवन्नि तप्पकोंटा कियना. बारित्ते ई दुनियाताल मनाकु मुक्ति हियना पेनदा वेला वेल्लेन दग्गेरे एव्ता. मनम सामिन मोदाला नम्मुता वेलाकन्ना ओर वायना वेला वेल्ले दग्गेरे मंता. अदुनहाटीं मिमेट निद्रते मत्ताप मनमट, तेदाट. तेदसि वेलातुन एरपाट कीसि ताकट. 12 इंदके हीकट मारालय आता आनि पोळ्द पेय्सालय आता, अदुनहाटीं हीकटते कियानसोंटव कराब कबाह्कुन होळसिसि वेलगुने कियानसोंटा बेसता कबाह्कुन मना जीवाते एतकुनकोम. 13 पोद्दला ओप्पनालायक मनम ताकाना. अदुनहाटीं लावारिस तिरिया मनि, रिम्मा वायनव उना मनि, बोगम कबाह्क किया मनि, जगडाल्क किया मनि, इंकावरोन पोर्रो कळ्क पोत्ता मनि, गानि मनम बेसता हर्दे ताकाना. 14 इत्ते, येसु किरिस्तुना पोल्लेन मना जीवाते, मना मनसुनाल एतकुनना. मना मनसुने कराब गुनाल्कुंक हर्रि हियमटु.