मीवा पिसवरतुन पेनदुक अप्पजेप्पट
12
1 अय्ते नावा विस्वासुल्कुनिटा! पेन मनापोर्रो कीता दयातुन मति कीसि, नना मीकु बतल वेहासेके इत्ते, मिमेट मीवा पिसवरतुन पवित्रम इरसि जीवाते मननेंके पेनदुक नच्चनसोंटा मोक्कु हीताप मी पिसवरतुन अप्पजेप्पट. इल्हा कीतेन मिमेट पेनदा निजम सेवा कीसि तलस्कुत्ताप आंता. 2 मिमेट इद दुनियातोर पिसताप पिसामन्नि गानि मिमेट मीवा मनसु मार्सकुंचि पेनदुक नच्चना पिसवर पिस्सट. अस्के पेनदा इच्चा बतलो एरपाट कींतिर. एरपाट कीसि, “अद इच्चा वेल्लेन बेसतद, कुसि हियानद आनि बतले तप्पु हिलवद,” इंचि मीकु तेळियंता.3 पेन दाना दयाते नाकुन सेवक इंचि निलाहता, दानहाटीं नना मीकु वरोर-वरोर्क बतल वेहसेक इत्ते, मीवा विस्वासमतुन पीसि मिमेट वळकना अचोने. दानकन्ना एक्को विचारम कियमट. 4 मना मेंदुल उंदे गानि दान्क कय्क-काल्क, कळ्क, केव्क, तोड्डि, मोसोर तल्ला इवन्नि मंतां. इवन्नि उंदे कबळ किय्यका, वेरे-वेरे कबाह्क कींतां. 5 अल्हेन मनम इंका वेल्लेन मंदि अय्नागानि किरिस्तुनतोनि कलियसि उंदे मेंदुललेह्का मंतोम. इंचि मनम कय्क-काल्कुनलेह्का उंदे मेंदुल्क अंटिस मंचि वरोंक-वरोर बेस कलियसि मंतोम. 6 पेन मनापोर्रो दया हुप्पिचि मनाकु वरोर-वरोंक उंद-उंदि वरम हीता. आ वरमतुन एरपाट कीसि मनम पेनदा सेवा किय्युळ गावाले. ओक्कला बोनकन्ना पेनदाहेंदाल कबुर तच्चि वेहना वरम दोर्कते, ओर ओना विस्वासमता लेक्कातेन अद कबळ कियगोम. 7 सेवा कियना वरम दोर्कतोर ओर विस्वासमते सेवा कियगोम, पेनदा पोल्लें कराहना वरम दोर्कतोर ओर विस्वासमते पेनदा पोल्लें कराहना कबळ कियगोम. 8 कराहचि दैरनेम हियना वरम दोर्कतोर कराहचेके दैरनेम हीसेक होनना, दानम किया परानोर ओर पूरा मनसुनाल दानम कियगोम, लीडर आसि लोकुल्कुन ताकसना वरम दोर्कतोर जिम्मेदारिते ओर्कुन ताकिच्गोम आनि दया कियना वरम दोर्कतोर ओर कुसिते दया कियगोम.
9 लोकुल्कुंक हूप्सना इंचि पावरम कियमट, निजम पावरम कीम्टु. तप्पु कबाह्कुन हय्समटु, बस्केळ्क बेस कबाह्क कीसेक मंटु. 10 उंदि कुटुंबतोरलेसीं वरोंक-वरोर बेस पावरम कीकुंटु, वरोंक-वरोर कदर हियनेंके, मनाकन्ना एक्को इंका वरोंक कदर हीम्टु. 11 कबळते बस्केन लंडु कियमट, पेनदा सेवा कियनाहाटीं मीवा जीवा बस्केळ्क उसार इर्रट. 12 पेन हीता आसेते मिमेट बस्केळ्क कूस मंटु. तिप्पल्क वायिनागानि पजोळ्क होनाकोंटा ओर्सकुंटु. बस्केळ्क पारतना कीसेके मंटु. 13 पेनदा लोकुल्कुंक अव्सरम अरतस्के मिहगा मत्तद ओर्क हीसि सहायम कीम्टु, बोरन्ना विस्वासुल्क मी लोन वातस्के ओरा सेवा कियालय बस्केळ्क तयार मंटु.
14 मीकु तकलिप हियानोर्कुंक आसिर्वादम हीम्टु. आसिर्वादम हीम्टु गानि सापनेम हियमट. 15 कुसिते मननोरतोनि मिमेटगुडा कुसिते मंटु, अळानोरतोनि मिमेटगुडा अळाटु. 16 अंटोरतोनि बेस कलियसि मंटु, पोमाडेंगि वेहकुन्मटु. कदर हिल्वा लोकुल्कुनतोनि बेस कूळसि मंटु, मोमोटे तेल्विगल्लोरम इनकुनमटु.
17 बोरन्ना मीकु तकलिप हीते, मिमेट ओर्क तकलिप हीसि बदला येतमट. अंटोरा नदरते बद बेसो, अदे कियना विचारमते बस्केळ्क मंटु. 18 कुदुरतच्चोन अंटोरतोनि बेस कलियसि सांतिते मनना कोसिस कीम्टु. 19 “बदला येतना कबळ नावद आंद, मिमेट बदला येतमट,”a इंचि पेन वेहता पोल्ले पुस्तकोमते रासि मंता. अदुनहाटीं नावा पावरमगल्ला विस्वासुल्कुनिटा, मिमेट बदला येतमट, ओरा बदला पेन येतंता, ओर्कुन पेनदुक होळसीम्टु. 20 अल्हा पगा येतन दानकन्ना
“मीवा पगातोर कर्वुने मत्तस्के ओर्क गाटो दोस्सट,
दूपाते मत्तस्के एर हीम्ट. अल्हा कीते,
अय्यो! मोमोट बच्चोन पेद्दा तप्पु कीतोम,
इनकुंचि ओरद-ओरके सिग्गु वांता.”b
21 मीवा कय्दाल सेड्डा कबाह्क आयाकोंटा उसारते मंटु, बेसता कबाह्क कीसि सेड्डा कबाह्कुन ओळिच्चट.