यहुदिल्कुनपोर्रो पौलुस होंग आंतोर
9
1-3 नावा यहुदि लोकुल्क पेनदाल बल्हा लक्कु आसि मंतुर मरि? ओर अल्हा आताहाटीं मनसुने नाकु वेल्लेन दुक्कम, बादा अनपिच्चंता. नना किरिस्तुना मनकन इंचि इदु पोल्ले निजम वेहचंतन, आबद्दम आयो. नावा लोप्पो मनना पवित्र आत्मागुडा इद निजम इंचि गवाइ हीसंता. पेन नाकु सापनेम हीसि, नाकुन किरिस्तुनाल लक्कु किय्यिना बेसे! नावा मनसु मात्रम नावा इस्राएल जातितोर लोकुल्क पिसगोम इंचि मंता. 4 पेनदा मर्क-मियाह्क आयना हक्क असल इस्राएलना वंसंमते पुटतोरदेa आंद. पजा बय्लि बूमिते मत्तस्के पेनदा महिमा पेद्दा वेल्गासि इस्राएलना वंसंमतोर्के दिसता. करार्क ओरतोने कीता, मूसाना नियमिंका ओर्के हीता, मोळकना बेस रिवाजकु हीता, अचोने आयका ओर्क पोल्लेगुडा हीता. 5 एनकटा पेद्दाल्क अब्राहाम, इसाक आनि याकोब ईरगुडा ईरोरे आंदुर. अचोने आयका येसु किरिस्तुगुडा मनकन रूपमते ईरा वंसंमतेन पुटतोर. अन्निन ताकसना अदिकारम मत्ता पेने ई येसु किरिस्तु आंदुर. अव अन्नि बस्केळ्क ओने तल्सकुन्निं. आमीन.6 पेन इस्राएलना वंसंमतोर्क हीता पोल्ले तपता इंचि नना इंचेक हिल्लेन, गानि इस्राएल देसेमते पुटतोर अंटोर इस्राएलना वंसंमतोर आयुर इंचि नना वेहचंतन. 7 अचोने आयका अब्राहामुना वंसंमतोर अंटोरगुडा ओना निजम वंसंमतोर इंचि मनम इनानायो. बारित्ते इदुना बारेमते दर्मसास्त्रमते, “सिराप इसाकुना वंसंमतोरे नीवा वंसंमतोर इंचि लेक्का कियमळ जर्गंता,”b इल्हा राससि मंता. 8 दीना अर्तम बतल इत्ते अब्राहामुना वंसंमते पुटतोर अंटोर अब्राहामुना मर्क-मियाह्क आया परुर. गानि पेन हीता पोल्ले परकारम बोरय्ते पुटतुर ओरे अब्राहामुना निजम मर्क-मियाह्कुना लेक्काते वांतुर. 9 अब्राहामुंक पेन हीता पोल्ले इल्हा मत्ता, “इत्ता वेलाक नना मर्रा मल्सि वांतन, आनि सारालc वरोर मर्रिन कनंता.”d
10 आ मर्रि इत्ते मना एनकटा पेद्दा मनकल इसाक आंदुर. ओर रेबेका इनानदानतोनि मरमिं आतोर अस्के अद नेला तप्सि एमडाल्कुन कंता. 11-12 गानि आ पिलाल्क पुट्टका मुन्नेन, ओर बद्दे मंचि-सेड्डा किय्यका मुन्नेन पेन रेबेकांकु, “मुन्ने पुट्टना पेडल पज्जो पुट्टनोना सेवा कियानुर,”e इंचि वेहचि मत्ता. पेन मनकलोर्कुन ओर कीता कबाह्कुन पोर्रोटाल केयो, गानि दाना इच्चा मत्ताप ओर्कुन केयंता, इंचि मनाकु दीनहेंदाल तेळियता. 13 दीना बारेमते, “नना याकोबुन कीतच्चोन पावरम, एसावुन किया हिल्लेन,”f इंचि दर्मसास्त्रमते राससि मंता.
14 इदुन केंजसि मनम बतल इंदकोम मर्रि? पेन अन्यायम कीता इंदकोमा? असले आयो. 15 बारित्ते, “नना बोन पोर्रो दया हुपिच्कन आनि बोन पोर्रो दया कीकन, अद नावा इस्टम मत्ताप नना कींतन,”g इंचि पेन मूसांक वेहचि मत्ता. 16 इल्हा बोन पोर्रो दया हुप्सना इंचि पेने निरनायम कींता. इद मनकना कय्दे हिल्ले. दान दोर्किच्कुननाहाटीं मनम बच्चोन कस्टम कियना एर्तमे. 17 पेन पिरोनh राजानतोनि इत्ता पोल्ले दर्मसास्त्रमते इल्हा राससि मंता: “नावा ताकततुन नीवाहेंदाल हुप्संतन अस्के नावा पोर्रोल पूरा दुनियामेळ तेळियसि होन्नार. इदुनहाटींगे नना नीकुन राजाल इंचि निलाह्तन.”i 18 दीनहेंदाल मनाकु बतल तेळियंता इत्ते, पेन अद इनकुत्तोन पोर्रो दया हुप्संता आनि अद इनकुत्तोन कटकेलमरि कींता.
19 इसोंटस्के, “पेन अय्ते अद इनकुत्तापे ई दुनियाते किया गोट्टंता. अयना मावा पोर्रेन बारि दोसेम दोस्संता?” इंचि मिमेट नाकुन इनकिर. 20 गानि मनका, पेनदुन मल्सि पूसकियानोन निमे बोन आंदिन? बस्केनना, “निमे नाकुन इल्हा बारि तयार कीतिन?” इंचि अळका कुम्मन पूस कींतना? 21 उंदे तोळि मुद्दाताल सगोम बेस सिंगारम अळकां आनि इंका सगोमताल सादा अळकां तयार कियना अदिकारम वरोर कुम्मांकु हिल्लेना? तप्पकोंटा मंता.
22 अल्हेने पेनदुकगुडा अद इनकुत्ताप कियना अदिकारम मंता. गानि नासडेम आसि होनानोर्कुन नासडेम कीसि पोहका ओप्के पीसि मत्ता. 23 पेन अल्हा ओप्के पीसि बारि मत्ता इत्ते, पेन दाना पेद्दातनम आनि दया बच्चोन बेसतद इंचि बोर लोकुल्कुंक अय्ते हुप्सना मत्ता, अद ओर्कुन मुन्नेन पेरता. 24 मनम अंटोरम पेन पेरता लोकुल्के. गानि पेन सिराप मना यहुदिल्कुनाले पेर्रा हिल्ले, यहुदि आयवोर लोप्पोटालगुडा पेरता. 25 यहुदि आयवोरा बारेमते पेन होशेय पोर्रोल्ता पेनदा कबुरतोना पुस्तकोमते,
“मुन्ने नना बोर लोकुल्कुन अय्ते नावा लोकुल्क इंचि इना हिल्लेन,
इंदके ओर्कुन नना नावा लोकुल्क इंचि केयकन.
इंका दीनकन्ना मुन्ने बोर्कुन अय्ते नना पावरम किया हिल्लेन,
ओर्कुन नना पावरम कीकन.”
इल्हा पेनबाबल रासा वेहतोर. अचोने आयका,
26 “आनि मिमेट नावा लोकुल्क आयिर,
इंचि नना बगा अय्ते इत्तनो,
अग्गेन मिमेट जीवाते मनना पेनदा मर्क-मियाह्क आतिट इंचि इनानुर,”j
इल्हा राससि मंता. 27 इंका यशायाह इनना पेनदा कबुरतोरगुडा इस्राएल लोकुल्कुना बारेमते बतल इत्तोर इत्ते,
“इस्राएल लोकुल्क समुद्रमते मनना उस्केलेह्का लेक्का परवच्चुर मंतुर.
अयना पेन हियना सिक्साताल इच्चुर मात्रमे पिस्संतुर.
28 बारित्ते ई दुनियाते मनना अंटोर लोकुल्कुंक पेन बिरानेन सिक्सा कियानद मंता,
अद पुरागा कींता,”k
“अन्निटकन्ना ताकतवार पेन ओक्कला मनाहाटीं मना वंसंमतोरव्टेटाल इच्चुर्कुन होळसाकोंटा मंचि मत्ते,
मनम सदोम, गमोरा नह्कुना लोकुल्कुनालेसीं नासडेम आसि मन्नेरम,”l
इल्हागुडा यशायाहल मुन्नेन वेहचि मत्तोर.
बेसता कबुर आनि यहुदिल्क
30 अय्ते मनम इंदके बतल इनकोम? यहुदि आयवोर पेनदा मुन्ने सत्तेमंतुल्क आयालय हूळा हिल्लुर गानि येसु ओराहाटीं कीतदुन ओर विस्वासम कीतुर इंचि पेन ओर्कुन सत्तेमंतुल्क कीता. 31 इस्राएल लोकुल्क बारे मूसाना नियमते वेहताप ताकसि सत्तेमंतुल्क आंतोम इंचि इनकुत्तुर. गानि ओर अल्हा सत्तेमंतुल्क आया हिल्लुर. 32 बारित्ते ओर किरिस्तुन विस्वासम किय्यका बेसता कबाह्क कीसि सत्तेमंतुल्क आयालय हूळतुर. इंचि येसु किरिस्तु इस्राएल लोकुल्कुनाहाटीं ओरा हरदे, दल्गिसि हिळु अराहना बंडालेह्का मंतोर.m 33 इदुना बारेमते दर्मसास्त्रमतेगुडा इल्हा राससि मंता,
“हूळाट, सिय्योनतेn नना उंदि बंडातुन इरसंतन,
अद बंडा इच्चुर्क दल्गंता,
इंकिच्चुर बारे दान्क दल्गिसि हिळु अर्रांतुर.
बोरय्ते दानपोर्रो विस्वासम इर्रंतुरो ओरद बस्केन सिन्नातनम आयो.”o