पेनदा आत्माता ताकतते पिसमळ
8
1 अदुनहाटीं बोरय्ते येसुन नम्मिसि ओनतोनि कलियतुर, ओर्क पेन सिक्सा हिय्यो. (बारित्ते येसुन विस्वासम कीतोर, ओर ओरा बुद्दि मत्ताप आयो गानि आत्मा वेहताप ताकंतुर.)a 2 बारित्ते पेनदा आत्मा येसु किरिस्तुनाहेंदाल मनाकु पूना पिसवर हीता. मनाकुन पापम आनि हामुरता कय्दाल तपिस्ता. 3 मनकलोरा बुद्दि पापमता कय्दा हिडु मत्ताहेंका मनम मूसाना नियमतुन केंजाकोंटा मत्तोम. अदुनहाटीं अद मनाकुन पिसागोटा परा हिल्ले. मूसाना नियम किया परवदुन पेन कीता. अद दाना मर्रिन लोहचीता. दाना मर्रि मनकना रूपमते मारियसि मनासोंटा पापि मनकलोरा नड्डुम इद बूमिते वातोर. मनकलोरा पापमतुन तेंडसि पोहनाहाटीं ओना जीवातुन हियालय ओर वातोर. इल्हा मना जेगाते पेन दाना मर्रिना मेंदुलतुन तिप्पल्कुने अराह्चि सिक्सा हीता. पजा पापमता ताकत मनापोर्रो ताकाकोंटा कीसि, पापमताल मनाकुन होळसीता. 4 अल्हा बारि कीता इत्ते, मूसाना नियमते राससि मत्ता आदेसकु मनाहेंदाल पूरा आयना इंचि. दीनहेंदाल इंदके मनम मना मनसुंक वाताप पिस्सेक हिल्लोम गानि पवित्र आत्मा वेहताप पिस्सेक मंतोम.5 पापि गुनाल्कुना मनकल, पापि विचाराल्के कीसेक मनंतोर, गानि पेनदा आत्मा वेहताप ताकाना मनकल आत्माकु गावाले मत्तावुना बारेमते विचाराल्के कीसेक मनंतोर. 6 इंका बोर मनकल अय्ते पापि गुनाल्कुने पिस्सेक मनंतोरो, ओना हामुर तप्पो. आनि बोर मनकल अय्ते आत्मा वेहताप कींतोरो, ओन्क पिसवर आनि सांति दोर्कंता. 7 इल्हा, बोर मनकल अय्ते पापि गुनाल्कुने पिस्संतोर ओर पेनदा पोल्ले केंजोर, अदुनहाटीं अल्हा विचारम कियानोर पेनदा कय्दा हिळु हिल्लोर, आनि मना परोरगुडा. 8 आनि पापि गुनाल्कुने पिस्सना मनकल पेनदुन कूस किया परोर.
9 गानि मीवा लोप्पो गिंटा पेनदा आत्मा मत्ते, मिमेट पापि गुनाल्कुने पिस्सेक हिल्लिर गानि आत्मा वेहताप पिस्संतिर. बोना पिसवरते अय्ते किरिस्तुना आत्मा हिल्ले, ओर किरिस्तुना मनकल आयोर. 10 मीवा लोप्पो गिंटा किरिस्तु मनानय्ते, मीवा मेंदुल पापम कीसि हासि होनिना गानि पेन मीकुन सत्तेमतोर कीताहाटीं, मीवा आत्मा बस्केळ्क पिस्सि मनंता. 11 येसु किरिस्तुन हातोरव्टेटाल मर्रा जीवाते तेहता पेनदा आत्मा मीवा लोप्पो गिंटा मनानय्ते, मीवा नासडेम आसि होनना मेंदुलतुनगुडा, मीवा लोप्पो मनना दाना आत्मा हेंदाल जीवाते इर्रंता.
12 अदुनहाटीं नावा विस्वासुल्कुनिटा, मनम मना पापि गुनाल्कुंक बाकि मत्ताप, अव वेहताप पिसना अक्केर हिल्ले. 13 बारित्ते मिमेट पापि गुनाल्कुने पिसानय्ते तप्पाकोंटा हांतिर. गानि आत्माता सहायमतोनि मीवा पापि गुनाल्कुन हव्कानय्ते मिमेट पिस्संतिर.
14 बोरय्ते पेनदा आत्मा वेहताप ताकंतोर, ओर अंटोर पेनदा मर्क-मियाह्क आंदुर. 15 पेन मीकुन मर्रा दासुल्क कीसि वेराहलय दाना आत्मातुन हिया हिल्ले. गानि अद मीकुन दाना मर्क-मियाह्क इनालय तयार कीता. दानहेंदाल मनम पेनदुन, “ना बाबाल,” इंचि केया परंतोम. 16 इंका पेनदा आत्मा मना आत्मातोनि कलियसि, मनम पेनदा मर्क-मियाह्कुम इंचि गवाइ हीसेक मंता. 17 आनि मनम पेनदा मर्क-मियाह्क आताहाटीं वारसदार्कगुडा आंदुम. पेनदा वारसदार्क आताहेंका किरिस्तुनतोनि इंका मनम वारसदार्के. मनम ओनतोनि कलियसि ओना महिमाता वेलगुन पंचकुंतोम इनकुनानय्ते, ओना तकलिपतुनगुडा पंचकुनापींता.
मनाकु पेनदा महिमाता वेलगु दोर्कंता
18 नना मीकु इद बारि वेहचंतन इत्ते, मनाकु इंदके तकलिपकु, दुक्काल्क वांतंगे, गानि वायाना कालमते पेन दाना महिमाता वेलगुन हीसि बच्चोन मनाकु कदर हिय्यार, दाना मति कीते इंदकेटा तकलिपकु बग्गेने दल्गों इंचि नना इनकुंचंतन. 19 पेन दाना मर्क-मियाह्कुंक हीता कदरतुन बस्के हुप्सार इंचि अद पुटिस्तव अन्निटवे वेल्लेन आसेते एदुर हूळसेक मंतां. 20 बारित्ते पेन पुटिस्तव अन्निटव अवुना इच्चा परकारम बतक ओज्जाकोंटा आया हिल्लें, गानि पेने दाना इच्चा परकारम अवुन बतक ओज्जाकोंटा कीता. 21 इंचि पेन पुटिस्तव अन्निटव नासडेम आयालय मंतां. अदुनहाटीं आ नासडेमताल तप्पीसि, पेनदा मर्क-मियाह्कुनतोनि कलियसि पेनदा कदर दोर्किच्कुनालय पूरा दुनियंता आसेते एदुर हूळसेक मंता.
22 उंदि मुरतळ एर पूराना वेलाते नोप्पिं तेदसि बल्हा तनलाळंता, अल्हेने इद दुनियंता इदवेरादाका गुडा तनलाळसेक मंता, इद मनाकु एरपाटे. 23 पेन पुटिस्तवे आयाका, पेनदाहेंदाल मोदाटा पलम इंचि आत्मा दोर्कतोरम मनमगुडा, दाना मर्क-मियाह्क आयालय मना कराब मेंदुलतुन होळसिसि पूना मेंदुल बस्के दोर्कार इंचि तनलाळसेक मंतोम. 24 मुक्ति दोर्कता इंचि इसोंटा आसेते मनम मना परंतोम. गानि मनम बद आसेते अय्ते मंतोम, अद आसेतुन मनम मना कळ्कुने हूळसेके मननेंके, अद आसे बल्हा आया परंता? आनि बतल अय्ते मनाकु दोर्कता, अदुन एदुर हूळसेके बोरन्ना मनांतुरा? मन्नुर. 25 गानि बतल अय्ते मनाकु दोर्का हिल्ले, अदुनहाटीं मात्रम मनम वेल्लेने ओप्केते आनि विस्वासमते एदुर हूळसेके मनांतोम.
26 पारतना बल्हा कियमळो तेळियवस्के पवित्र आत्मा मनाकु सहायम कींता. मनाकु इनावायो असोंटा पोल्लेन पवित्र आत्मा मनाहाटीं पेनदागा तनलाळसेक विनंति कीसेक मंता. 27 मना पीटे मत्ता विचाराल्कुन पेन बेस एरपाट कींता. अल्हेन आत्माता विचाराल्क बतल दानकु बेस एरपाट. अदुनहाटीं पेनदा लोकुल्कुंक गावाले मत्तदुनहाटीं पवित्र आत्मा विनंति कियनेंके पेनदा विचारम मत्तापे कींता.
28 बोरय्ते पेनदुन पावरम कींतुर, बोर्कुन अय्ते पेन दाना पिलान मत्ताप केयता, ओर्क बसोंटा परिस्तिति वायना, पेन आ परिस्तिति ओरा बेसताहाटींगे कींता इत्ता पोल्ले माकु एरपाटे. 29 बारित्ते अद बोर्कुन अय्ते “ना पोर्रो विस्वासम कींतुर” इंचि मुन्नेटाले एरपाट कीसि मत्ता ओर्कुन दाना मर्रिनलेसिं आयागोम इंचि पेरता. ओरा अंटोरा लोप्पो येसु दाना तोल्सुर मर्रि आयगोम इंचि अद अल्हा कीता. 30 बोर-बोर्कुन अय्ते पेन पेरता ओर्कुन दाना हर्दे ताकालय केयता. इंका बोर-बोर्कुन दाना हर्दे ताकालय केयता ओर्कुन सत्तेमंतुल्क कीता. इल्हा सत्तेमंतुल्क कीतोर्कुंक वेल्लेन कदरगुडा हीता.
31 इव अन्नि पोल्लें केंजतंका मनाकु उंदि विचारम तप्पाकोंटा वांता, अद बतल इत्ते, पेने मना सायतक मत्तस्के मनाकु अड्डम तिरियनाहाटीं पगातोर बोर मनांतोर? 32 पेन दानकु मत्ता वरोर मर्रिनगुडा मनाहाटीं हीता. अब्बो, नाकु वरोरे मर्रि इंचि पज्जो-मुन्ने किया हिल्ले. अचोने बेस पेन आंदु. असोंटस्के दाना मर्रिनतोनि इंका मिगुल्तव अन्निगुडा मनाकु हिय्योना? तप्पाकोंटा हींता. 33 कुद्दु पेने मनाकुन पेरसि सत्तेमंतुल्क कीता. अय्ते मनापोर्रो दोसेम दोस्सानोर बोर आंदुर? 34 अय्ते मरि मनाकु सिक्सा तप्पो इंचि बोर इना परांतुर? सिराप पेने इना परंता. गानि येसु किरिस्तु मनाहाटीं हातोर अस्के पेने ओन मर्रा जीवाते तेहाचि दाना तिना बाजुंक उपिस्ता. इंदके ओर अगा मनाहाटीं पेनतोनि विनंति कीसंतोर. 35 अय्ते मनाकु बदे तिप्पल आयि, लोकुल्कुनाल विरोद, दुक्कम, कर्वु, कपडीं दोर्काकोंटा आयमळ, दोकाता जेगाते मनमळ आयि, कसेह्क-गोर्काने हव्कनसोंटा वेला वायना गानि इवन्नि येसु किरिस्तुना पावरमताल मनाकुन लक्कु किया परों. 36 बारित्ते दर्मसास्त्रमते, “मोमोट निवोर्क आताहाटीं रोज-रोज लोकुल्क माकुन हव्कालय हूळांतुर, मोक्कु हियालय मोळकुता गोर्रेलेह्का मावा पिसवर मंता,”b इंचि राससि मंता.
37 इवन्नि तकलिप वायिनागानि, मनाकुन पावरम कियना किरिस्तु मनातोनि मत्ताहेंका मनमे गेल्संतोम. 38 बारित्ते नाकु इंदके पुरागा तेळियसोत्ता. अद हामुर आयि, पिसवरे आयि, पेनदा दूतांगें आयिं, देय्याल्क-बूताल्क आयिं, इद कालम आयि, वायना कालम आयि, बता सक्तिंगें आयिं, 39 बूमिता लोप्पोटव आयिं, बूमि पोर्रोटव आयिं. पेन पुटिस्तव बवे आयिं मनाकुन पेनदा पावरमताल लक्कु किया परों.