मरमिना उदाहरन
7
1 नावा विस्वासुल्कुनिटा, नना मूसाना नियम तेळियसि मत्तोरतोनि वळ्कसेक मंतन. वरोर मनकल जीवाते मत्ताचूं रोजके ओन पोर्रो मूसाना नियमता अदिकारम मनंता इंचि मीकु तेळियोना? 2 सरे, उंदि उदाहरन वेहांतन. मूसाना नियम परकारम उंदि मुरतळ दाना मुय्दो पिस्सि मत्ताचूं रोजके अद ओना मुत्तो आसि मनंता. गानि दाना मुय्दो हासोत्ते, मूसाना नियम परकारम अद मुरतळ मुय्दोंक संबंदिस्ता नियमताल पलाते अर्रंता. 3 दाना मुय्दो जीवाते मननेंकेन अद वेरे बोनतोनना मरमिं आते, दान बोगमतनम कीता मुरतळ इंतुर. गानि दाना मुय्दो हासोननय्ते मात्रम आ नियमताल अद पलाते अर्रंता. आनि अद वेरे मरमिं अय्नागानि दान बोगमतनम कीता इंचि इन्नुर.4 अय्ते नावा विस्वासुल्कुनिटा, इल्हेन मिमेटगुडा बस्के अय्ते किरिस्तुनतोनि हातिर अस्के मूसाना नियमताल पलाते अरतिर. इंदके बोरय्ते हातोरव्टेटाल मर्रा जीवाते तेदतोर आ किरिस्तुनतोनि मिमेट कलिया परंतिर. दीनहेंदाल मनम पेनदा सेवाताहाटीं बेसता कबाह्क किया परांतोम. 5 मुन्ने मनम मना इस्ट परकारम ताकुंदुम अस्के मना मेंदुलतुन मना लोप्पो मत्ता पापि आसें वाळकुनुंदुं, मूसाना नियम मनाकु तेळियता अस्के आ आसें इंका बेरसेक होत्तां. दीनहेंदाल मनाकु हामुर दोर्कता. 6 मनम बद नियमते अय्ते दोह्चि वाटताप मत्तोमो, आ मूसाना नियमताहाटीं मनम हातोम. इंदके मनम मूसाना नियमताल पलाते अरतोम. दानहाटीं मनम आ राससि मत्ता पडना नियम परकारम इंदके पिस्सेक हिल्लोम. गानि पेनदा आत्मा हूपिस्ता पूना हर्दुन एरपाट कीसि अद वेहताप ताकसेके दाना सेवा कीसंतोम.
मूसाना नियम आनि पापम
7 अय्ते मूसाना नियम तप्पु इंचि नना वेहसेक इन्कुंचंतिरा? अल्हा असले आयो. ओक्कला मूसाना नियम हिलाकोंटा मंचि मत्ते, असल तप्पु बतलो नाकु बस्केन तेळिया कोनवळ. ओक्कला मूसाना नियम, “वेरेतोरा दानपोर्रो आसे पळमा,” इंचि वेहाकोंटा मंचि मत्ते, आसे पळमळ तप्पु इंचि नाकु aतेळिया कोनवळ. 8 गानि पापम मूसाना नियमते मत्ता आदेसकुन वाळकुंचि नावा लोप्पो अन्नि तीरुकुना तप्पुड आसें पुटिस्ता. मूसाना नियम हिलाकोंटे पापमकु जीवा हिलवापे. 9 दीनकन्ना मुन्ने मूसाना नियमतुन एरपाट कियाकोंटेन पिस्सेक मत्तन. गानि बस्के अय्ते मूसाना नियमते मत्तव अन्नि आदेसकुb नाकु तेळियतां, अस्के नावा लोप्पो पापम कबळ कियालय दल्गता आनि नना पेनदा मुन्ने हासोत्ताप आतन. 10 बद आदेस अय्ते नाकु जीवा हियानद मत्ता, अदे आदेस नाकु हामुर हीता. 11 पापम मोका हूळसि आदेसतुन वाळकुत्ता आनि नाकु दोका कीता. पजा अदे पापम नावा पिसवरतुन नासडेम कीता. 12 गानि मूसाना नियम पवित्रमातद आंद. आनि अव्टे राससि मनना आदेसाल्कगुडा पवित्र, सत्तेम आनि बेसतव आंद. 13 अल्हा अय्ते आ पवित्रमाता मूसाना नियमहेंदाले नाकु हामुर वाता इंचंतिरा? अल्हा असले आयो. आ पवित्रमाता मूसाना नियमतुन वाळकुंचि पापम नाकु हामुरतुन हीता. अल्हा कीसि अद दाना असल रूपमतुन हूपिस्ता. आनि मूसाना नियमहेंदाल पापम इत्ते बच्चोन कतरनाक आंद इंचि पुरागा तेळियनाहाटीं अल्हा आता.
मनकना परिस्तिति
14 बारित्ते मूसाना नियम पेनदाग्टद आंद इंचि मनाकु एरपाट मंता. गानि नना पापि आसेने निंडिस मत्ताहेंका पापमता सेवा कियनाहाटीं अम्मुळ होत्तोन आंदुन. 15 नना बतल कीसंतनो नाके तेळियसेक हिल्ले. नना बतल अय्ते कियगोमो, अद बारे कीसेक हिल्लेन आनि बद अय्ते कियमन्नो, अदुन बारे कीसंतन. 16 नना बतल अय्ते कियमन्नो अदुने नना कियानय्ते, मूसाना नियम बेसतद इंचि नना ओप्कुंतन. 17 गानि किया मन्नि इत्ता कबाह्कुन कियानोन नना आयोन, नाकुन अल्हा किया वेहानद नावा लोप्पो मनना पापम आंद. 18 नावा लोप्पो बदे बेसता पोल्ले हिल्ले इंचि नाकु एरपाटे मंता. बद अय्ते बेसतदो अदे कियना इच्चा नाकगुडा मंता, गानि अल्हा किया परसेक हिल्लेन. 19 बव अय्ते बेसता कबाह्को अवे नना कियना इनकुंतन, गानि अव नना किय्योन. आनि बव तप्पुड कबाह्क अय्ते कियना आयो इंचि इनकुंतनो, अवे तप्पुड कबाह्क नना कींतन. 20 गानि नना बव कबाह्क अय्ते कियानायो अवे कबाह्क कियानय्ते, आ कबाह्क कियानोन नना आयोन गानि नावा लोप्पो मनना पापम आंदु नाकुन किया वेहानद.
21 अदुनहाटीं नना बस्के अय्ते बेसता कबाह्क कियालय हूळंतन, अस्के नावा लोप्पो मनना कराब गुनाल्क अल्हा कियालय नाकुन आपंता. इल्हा बस्केळ्क नावा पिसवरते जर्गसेक मंता इंचि नाकु तेळियता. 22 नावा मनसु पेन हीता नियमते वेल्लेन कूस मंता. 23 गानि नावा मेंदुलपोर्रो मात्रम इंकुंदि बदो वेरे नियम अदिकारम ताकिस्ताप नाक दिस्सेक मंता. आ नियम, नावा बुद्दिते मनना मूसाना नियमतोनि लडाइ कीसि नाकुन पापमता कय्दे अप्पजेपसंता. 24 अय्यो, इद बच्चोन गोसा! हामुरता कय्दा हिळु मनना नावा ई पापि मेंदुलताल नाकुन बोर होळसा परंतोर? 25 मना सामि येसु किरिस्ते नाकुन होळसा परांतोर, नना पेनदुक दन्यवाद कींतन. नना मनसुनाल अय्ते पेनदा नियमतेन ताकाना इनकुंचंतन, गानि नावा मेंदुलते मनना कराब गुनाल्क नाकुन पापि कबाह्क किया वेह्चंतां.