पापमहेंदाल हामुर आनि किरिस्तुनहेंदाल पिसवर
6
1 अय्ते मरि बतल इनकोम! मनम पापम कीताहेंके पेन मनापोर्रो वेल्लेने दया हुपिचंता इंचि पापम कीसेकेन दाकोमा? 2 बस्केन कुदुरो. मनम पापि गुनाल्कुनाल उंदि मल्का बस्केळ्ताहाटीं वेरे आसि हासोत्ताप आतोम. मर्रा असोंटा पापि गुनाल्कुने बल्हा पिसकोम? 3 मनम अंटोरम येसु किरिस्तुनतोनि कलियतोम इंचि हूप्सालय बापतिस्मा एततोम. अस्केने मनम ओनतोनि हाताप आतोम. इद संगति मीकु तेळियोना? 4 बापतिस्मा हेंदाल मनम येसु सामिनतोनि हासि बोंदा दोसताप आतोम. आनि बल्हा अय्ते पेन बाबाना महिमाता ताकतते किरिस्तु हामुरताल मर्रा जीवाते तेदतोर, अल्हेने मनमगुडा बापतिस्मा एतसि पूना पिसवरते ताका परांतोम.5 बारित्ते बल्हा मनम ओना हामुरते ओनतोनि उंदि आतोम, अल्हेन ओना मर्रा जीवाते तेदमळतेगुडा मनम ओनतोनि उंदि आयनुम. 6 पापमतोनि निंडिस मत्ता मना गुनम नासडेम आसि होत्ता आनि इंदके मनम पापमता अदिकारमते हिल्लोम. बारित्ते मना पडना पिसवर येसुनतोनि क्रुसुनपोर्रो हाता, इद मनाकु एरपाटे. 7 बोरय्ते पडना पिसवरतुन हाताप होळसींतोरो, ओर ओना पापाल्कुनाल मुक्ति दोर्कीसि सत्तेमंतुड आंतोर.
8 ओक्कला मनम किरिस्तुनतोनि हायानय्ते ओनतोने मनम पिसंतोम इंचि मनाकु विस्वासम मंता. 9 किरिस्तु हामुरताल मर्रा जीवाते तेदतोर, आनि ओर इंका बस्केन हायोर. अचोने आयका हामुरता ताकत ओन बस्केन बतल किया परो, इद मनाकु एरपाटे. 10 पापमता अदिकारमतुन ओळिच्चनाहाटीं ओर उंदे मल्का हातोर. गानि ओर इंदके पिसना पिसवर मात्रम पेनदाहाटीं पिस्सेक मंतोर. 11 इल्हा मिमेटगुडा पापमताहाटीं हातोरलेह्का मंचि, पेनदाहाटीं येसु किरिस्तुने जीवाते मंतिर.
12 अदुनहाटीं रोंड रोजकु पिस्सना मीवा पिसवरते पापमता राज्येम वायाकोंटा जेगर्ता मंटु. इंका दाना सेड्डा आसेनाल लक्कु इर्रट. 13 मीवा मेंदुलतुन सेड्डा कबाह्क कियालय पापमता कय्दुक हियमट. अल्हा कियाकोंटा, “मनम हामुरताल जीवाते तेदतोरम,” इद पोल्लेतुन मति कीसि, मीवा पोर्रो पेनदुक अदिकारम हीम्टु आनि मीवा मेंदुलतुन बेसता कबाह्क कियनाहाटीं पेनदा कय्दुक हीम्टु. 14 अस्के मीवापोर्रो पापम दाना अदिकारम ताकसो. बारित्ते मिमेट मूसाना नियमता कय्दा हिळु हिल्लिर गानि पेनदा दयाते पिस्सेक मंतिर.
सत्तेमता सेवा कियना
15 इंदके पेनदा दया मनाकु दोर्कताहाटीं मनम मूसाना नियमता कय्दा हिळु हिल्लोम, अय्ते इंदके मनम पापम कीकोमा मरि? अल्हा बस्केने किया मन्नि. 16 सेवा कींतन इंचि मीवद मिमेट ओप्कुत्ते मिमेट बा मालकुनगा अय्ते सेवा कीसंतिरो, ओन्क मिमेट निजमे दासुल्क आंतिर. इद पोल्ले मीकु तेळियोना? मिमेट पापमता दासुल्क अय्ते अद मीकु हामुरता हर्रि हुप्संता. गानि मिमेट पेनदा पोल्ले केंजते अद मीकुन सत्तेमंतुल्क कींता. 17 मुन्ने मिमेट पापमता दासुल्के मत्तिर, गानि मीकु एवता पेनदा पोल्लेन मिमेट बेस केंजसि, करियसि इंदके अवुन पीसि ताकसंतिर. इंचि पेनदुक नना दन्यवाद कींतन. 18 इंदके पेन मीकुन पापमता कय्दाल होळसिता इंचि मिमेट सत्तेमता कबाह्क कियालय पेनदा दासुल्क आतिर. 19 इव पोल्लेन अर्तम कीकुनना ताकत मीकु हिल्ले इंचि नना उंदि उदाहरन हीसि मीकु वेहासेके. दीनकन्ना मुन्ने मिमेट मीवा मेंदुलतुन रोता कबाह्क, तप्पुड कबाह्क कियालय अप्पाजेपसि मत्तिर. दानहेंदाल वेल्लेन पापम आता. अल्हेने इंदके मिमेट मीवा मेंदुलतुन सत्तेमता कबाह्क कियालय अप्पाजेप्पटु, अस्के मिमेट पेनदा पवित्र लोकुल्क आकिट. 20 मिमेट पापमता कबाह्क कीसेक मत्तिर अस्के मी पोर्रो सत्तेमता कबाह्क कियालय दबाव मनाहिल्ले. 21 अयना मिमेट कीता कबाह्कुनाहाटीं इंदके मीकु सिग्गु वासंता. मिमेट अव कीतिर अस्के मीकु बतल इनाम दोर्कता? अव कबाह्कुना हेंदाल सिराप नरकमे दोर्कुंदु. 22 गानि इंदके पेन मीकु पापमता कय्दाल होळसीताहेंका मिमेट दाना दासुल्क आतिर. अदुनहाटीं इंदके मीकु दोर्कना इनाम बतल इत्ते, पेन मीकुन दाना पवित्र हर्दे ताक्किचि, आकिरते बस्केळ्क पिसना पिसवरताहेके ओंता. 23 पापि कबाह्कुना कूलि इंचि मनाकु हामुर दोर्कंता. गानि पेन मनाकु मना सामि येसु किरिस्तुनहेंदाल इनाम इंचि बस्केळ्क पिसना पिसवर हींता.