पेनतोनि सत्तेमते मनमळ
5
1 इल्हा, मना विस्वासमहेंदाल पेन मनाकुन सत्तेमंतुल्क कीता. येसु किरिस्तु मना पापाल्कुनाहाटीं मोक्कु आसि मनाकुन मर्रा पेनतोनि कल्पतोर, कल्पसि सांति हीतोर. 2 इंदके मनम पेनतोनि कलियसि पिसना पिसवरगुडा पेनदा दयातेन दोर्कतद आंद. इंका पेनदा महिमाता वेलगुने मनम उंदि रोज मनांतोम इत्ता आसेते वेल्लेन कुसिते मंतोम. 3 इच्चोने आयाका, विस्वासम कीताहेंका मनाकु तिप्पल्क वायना गानि वेल्ले कुसिते मनंतोम. बारित्ते तिप्पल्क वातेने ओप्के पुट्टंता. 4 इल्हा ओप्के पीसि मत्ते मना लोप्पो बेसता गुनम वांता. दीनहेंदाल मनाकु मुक्ति हियना आसे दोर्कंता. 5 इद आसे मनाकुन नाराज किय्यो, बारित्ते पेन दाना पवित्र आत्मातुन मना पिसवरते हीसि, अद मनाकुन वेल्लेन पावरम कींता इंचि हूपिस्ता.6 असल बस्के अय्ते मनद मनम पिसागोटकुना पराकोंटा आतोम, असोंटा वेलाते मना पापि लोकुल्कुनाहाटीं किरिस्तु ओना जीवा हीतोर. 7 वरोर सत्तेमंतुनाहाटीं बोरन्ना जीवा हिय्यालय तयार मनमळ वेल्लेने कस्टम, गानि वरोर बेसता मनकनाहाटीं बोरन्ना जीवा हिय्यालय तयार आया परांतुर आयावच्चु. 8 मनम बस्केटालो पापमतेन मत्तोम गानि पेन मनापोर्रो पावरम हुपिच्चि, किरिस्तुन मनाहाटीं ओना जीवा हियालय लोहचीता.
9 पेन मनाकुन येसु सामिना नेत्तुरहेंदाल सत्तेमंतुल्क कीता. अदुनहाटीं ओनाहेंदाले पेनदा होंगुनाल मनाकुन तप्पाकोंटा पिसागोटमळ जर्गंता. 10 उंदास्के मनम अंटोरम पेनदा पगातोरमे मत्तोम. अल्हा मननेंकेगुडा अद दाना मर्रिन मोक्कु हीसि मनाकुन दाना दग्गेर्क कीकुत्ता. इंदके अय्ते मनम पेनतोनि कलियसि मंतोम. अदुनहाटीं किरिस्तुना पिसवरता हेंदाल अद मनाकुन आकिर सिक्साताल तप्पाकोंटा कापाळंता. 11 सिराप इच्चोने आयो गानि मना येसु सामिनाहेंदाल मनम पेनतोनि मर्रा कलियतोम, अदुनहाटीं मनम वेल्लेन कुसिते मंतोम.
आदाम आनि येसु
12 इद दुनियाते पापम आदामुनाहेंदाल वाता. पापमता हेंदाल हामुर वाता. आनि दुनियाता अंटोर लोकुल्कगुडा पापम कीतुर, अदुनहाटीं अंटोर्के हामुर वाता. 13 मूसाना नियम वायका मुन्नेन इद दुनियाते पापम मत्ता. गानि अस्के मूसाना नियमकु मनवाहेंका पेन पापमतुन लेक्का किया हिल्ले. 14 अय्नागानि आदामुनस्केटाल अय्ते मूसाना कालमदाका मनकलोर पोर्रो हामुर राज्येम कीसेकेन मत्ता. आदाम पेनदा पोल्लेपोर्रो ताका हिल्लोर, ओनालेसीं लोकुल्क पेन हीता पोल्लेतुन नेम्हा हिल्लुर, गानि लोकुल्क हायुंदुर. ईर आदाम इत्ते मुन्ने वायाना किरिस्तुना चिन्हालेसिं मंतोर. 15 गानि पेनदा वरम आनि आदामुना पापम, इव रोंड पोल्लेन नड्डुम मात्रम वेल्लेन परक मंता. वरोर कीता पापमहेंदाल वेल्लेन मंदिक हामुर वाता. गानि दानकन्ना एक्को पेनदा वरमa आनि दया मंता. ई दया येसु किरिस्तुनाहेंदाल वेल्लेन मंदिक दोर्कंता. 16 पेन हीता वरम आनि आदाम कीता पापमता पलम, इव रोंड पोल्लें उंदेतीर हिल्लें. बारित्ते आदामुना उंदि पापम अंटोर पोर्रो सिक्सातुन तत्ता. गानि मनम वेल्लेन पापाल्क कीसिगुडा पेन हीता वरमनाहेंदाल सत्तेमंतुल्क आतोम. 17 आदाम कीता पापमता हेंदाल अंटोर हामुरता कय हिळु मंतुर. गानि इंका वरोर इत्ते येसु किरिस्तुनहेंदाल मनाकु पेनदुक नच्चना बेस पिसवर दोर्कता. बोर्क अय्ते पेनदा वरम आनि दाना दया दोर्कता, ओर्क अंटोर्क ई पिसवर दोर्कंता. 18 इल्हा आदाम कीता पापमता हेंदाल अंटोर लोकुल्कुंक सिक्सा दोर्कता. अल्हेने इंका वरोर इत्ते येसु किरिस्तु कीता बेस कबाटाहेंदाल, पेन अंटोर्कु सत्तेमंतुल्क आयालय उंदि हर्रि तयार कीसि ओर्क बस्केळ्क पिसना पिसवर हीता. 19 वरोर आदाम पेनदा पोल्ले केंजवाहेंका वेल्लेन लोकुल्क पापिर्क आतुर. अल्हेन इंका वरोर मनकल इत्ते येसु किरिस्तु पेनदा पोल्ले केंजताहेंका, वेल्लेन लोकुल्क सत्तेमंतुल्क आंतुर. 20 लोकुल्क बल्हा इरगा पापम कीसेक होंचंतुर अदुन ओर्क हुप्सनाहाटीं मूसाना नियम वाता. गानि लोकुल्क बच्चोन वेल्ले पापम कीसेक होत्तुर अचोने वेल्ले दया पेन कीसेक होत्ता. 21 इल्हा बारि आता इत्ते, बल्हा पापम हामुरताहेंदाल राज्येम कीसेक मत्ता, अल्हेन पेनदा दयागुडा सत्तेमतोनि मना सामि येसु किरिस्तुनहेंदाल बस्केळ्क पिसना पिसवरताहाटीं राज्येम कींता.