मिमेटगुडा पापि लोकुल्क आंदिर
2
1 अरे तप्पु दोस्सना लोकुरिटा, मिमेट बोरन्ना आम्टु! मिमेटगुडा अदे तप्पु कियानोर आंदिर. अदुनहाटीं इंकावरोन पोर्रो मिमेट तप्पु दोसमट. इल्हा वेरेतोर पोर्रो तप्पु दोस्सि, मीवद मिमेटे, “दोसिर्क” इंचि हुपिच्कुंतिर. दानहाटीं वेरेतोर पोर्रो तप्पु दोस्सि मिमेट तपिच्कुना परिर. 2 इसोंटा तप्पु कबाह्क कियानोरद पेन न्यायम कींता, कीसि ओर्क दगता सिक्सा हींता, इंचि मनाकु एरपाटे. 3 अय्ते मिमेटे वेहाट! बव कबाह्कुनहेंका मिमेट वेरेतोर पोर्रो तप्पु दोस्संतिनो, अवे कबाह्क मिमेट कीसि, पेनदा सिक्साताल तपिच्कुंतोम इन्कुंचंतिरा? 4 हिलाकोंटे दाना दयातुन, ओप्केतुन आनि मापितुन गम्मत इन्कुंचंतिरा? असल निजम बतले इत्ते, मिमेट मनसु मार्सकुनना इंचि पेने मीवा पोर्रो दया हुपिस्ता, इद मीकु तेळियोना? 5 गानि गट्टि मनसु आनि हेंडुतनमहेंका बस्केन मिमेट मनसु मार्सा हूळिर. इल्हा कीसि मीवा सिक्सातुन मिमेटे बेरसागोटसंतिर. बस्के अय्ते पेन दाना होंगुन मीवा पोर्रो हुप्पिचि, मीकु सिक्सा हिय्यार अस्के लोकुल्क दाना सत्तेमता न्यायमतुन हूळानुर. 6 आ रोजुने पेन अंटोर लोकुल्कुंक ओर कीता कबाह्कुन हूळसि ओरा न्यायम कींता. 7 बोरय्ते बस्केळ्क बेसता कबाह्क कीसेके, पेनदाहेंदाल कदर आनि दोसेम हिल्वा पिसवरतुन दोर्किच्कुनालय हूळांतुरो पेन ओर्क बस्केळ्क पिसना पिसवर हींता. 8 गानि बोरय्ते सत्तेमते ताकाकोंटा तप्पुड कबाह्क कीसेके सतताहाटीं पिस्संतुर, पेन ओर पोर्रो होंग आसि सिक्सा हींता. 9 पेन न्यायम कियना रोजुने तप्पुड कबाह्क कियना हरेक मनकंक तिप्पल्क, दुक्काल्क वांतां. अव्टे मुन्ने यहुदिल्कुन पोर्रो पज्जो यहुदि आयवोर पोर्रो. 10 गानि अवे रोजकुने बेसता कबाह्क कीसेक ताकानोर्कुंक पेद्दातनम, कदर आनि सांति दोर्कार. अव्टे मुन्ने यहुदिल्कुंक पज्जो यहुदि आयवोर्कुंक. 11 बारित्ते पेन मोकम हूळसि कबळ किय्यो.12 मूसाना नियम एरपाट हिल्वोर पापम कीते, मूसाना नियम परकारम सिक्सा आयाकोन्ना गानि सिक्सा अय्ते तप्पो. बोरय्ते मूसाना नियम एरपाट मंचि पापम कीतुर, ओर्क मूसाना नियम परकारमे सिक्सा आंता. 13 बारित्ते, सिराप मूसाना नियम केंजानोर पेनदा मुन्ने सत्तेमंतुल्क आयुर, गानि मूसाना नियम केंजसि दान परकारम ताकानोरे पेनदा मुन्ने सत्तेमंतुल्क आंदुर. 14 यहुदि आयवोर्कुंक मूसाना नियम तेळियो. गानि ओक्कला ओरा मनसु मूसाना नियमते वेहताप मनानय्ते, ओर्क मूसाना नियम तेळियाकोन्ना गानि मूसाना नियम परकारम ताकतापे आंता. 15 मूसाना नियमकु ओरा मनसुने राससि मंतां इंचि ओर कियना कबाह्के हुप्संतां. दीनकु ओरा पिसवरगुडा गवाइ मंता. बारित्ते ओर तप्पुड कबळ कियनेंके ओरा मनसे “इद तप्पु” इंचि दोसेम दोस्संता. आनि बेस कबळ कियनेंके ओरा मनसे ओर्क “इद बेस” इंचि वेहंता. 16 नना वेहना बेसता कबुर परकारम, बोर्क तेळियाकोंटा मनकलोर्क कीता कबाह्कुन पोर्रोटाल, अद रोजुने पेन येसु किरिस्तुनाहेंदाल लोकुल्कुना न्यायम किय्यार, असोंटद उंदि रोज वायनद मंता. नना वेहना बेसता कबुर परकारम, उंदि इसोंटा रोज वायनद मंता गदा, अद रोजुने पेन येसु किरिस्तुनहेंदाल लोकुल्क बोर्क तेळियाकोंटा पिसता पिसवर पोर्रोटाल ओरा न्यायम किय्यार.
यहुदिल्क आनि ओरा नियम
17 अय्ते इंदके मीवद मिमेट, “मोमोट यहुदिल्क” इंचि वेह्कुंतिर, मूसाना नियम पोर्रो विस्वासम इर्रंतिर, आनि “मोमोट पेनदुक वेल्ले दग्गेटोर्कुम” इंचि पेद्दातनम वेह्कुंतिर, 18 मिमेट मूसाना नियम करियसि मंतिर इंचि पेनदा इच्चा बल्हा मंता आनि बेस हर्रि बद्दु इंचि मीकु तेळियता. 19 मिमेट इल्हा इंतिर गदा, “गुड्डिर्कुनालेसिं मनानोर्कुंक हर्रि हूप्संतोम, हीकटा पिसवर पिसानोर्कुंक वेलगुनालेसिं मनंतोम.” 20 मूसाना नियमते राससि मत्ता पोल्लेंगें सत्तेम आनि तेल्वि हियानव इंचि मीकु तेळियताहाटीं, “मुर्कालोर्कुंक बुद्दि वेहनोरम, पिलाल्कुंक कराहनोरम,” इंचि मिमेट इनकुंतिर. 21 अय्ते मरि वेरेतोर्कुंक कराहना पोल्लें मीवद मिमेटे बारि कराहकुनिट? “दोंगातनम कियमट” इंचि कराहचि मिमेटे दोंगातनम कींतिर. 22 बोगमतनम किया मन्नि इंचि कराहचि, मिमेटे बोगमतनम कींतिर, बोम्मांक मोळ्का मन्नि इंचि कराहंतिर, गानि गुळिते होंचि दोंगातनम कींतिर. 23 महगा मूसाना नियम मंता इंचि पेद्दातनम वेहकुंतिर गानि नियमते ताकका पेनदा कदरगुडा इर्रिर. 24 “मीवा इसोंटा कबाह्कुनहेंका यहुदि आयवोरा नड्डुम पेनदा अपमानम आंता,”a इंचि दर्मसास्त्रमते रासिगुडा मंता.
25 मिमेट मूसाना नियम परकारम ताकानय्ते, कतना यहुदि आनि मुसलमान लोकुल्कुनद उंदि रिवाज आंद. इद रिवाज परकारम उळकानगटा कोस्सा तोलदुन कोय्यांतुर. इसंटा रिवाज कीते पेनदातोनि करार कीताप इंचि ओर नम्मंतुर.b कीतद मीकु पाय्दा आंता. गानि मिमेट गिंटा मूसाना नियम परकारम ताकाकोंटे मिमेट कतना कीसिगुडा बतल पाय्दा हिल्ले. 26 बोरन्ना कतना कियवोर गिंटा मूसाना नियम परकारम ताकते, ओर कतना कियाकोन्नागानि पेनदा नदरते कतना कीतोना लेक्कातेन वांतोर. 27 मूसाना नियम मिहगा मंचि दाना परकारम कतना आसिगुडा मिमेट नियम परकारम ताकसेक हिल्लिर. अदुनहाटीं बोरद अय्ते कतना आया हिल्ले, यहुदि आयवोर, मूसाना नियम मत्ताप ताकानोर मीवापोर्रो दोसेम दोस्सनुर. 28 सिराप यहुदि जातिते पुटतोर, पलाताल कतना आतोर ईर निजम यहुदि मनकलोर आयुर. 29 बोरय्ते पेनदा इच्चा मत्ताप ताकंतुर ओरे निजम यहुदिल्क आंदुर. आनि मूसाना नियम परकारम पलाताल आतदे कतना आयो, गानि पेनदा आत्मा हेंदाल मनसु मारियता मनकलोरे निजम कतना आता यहुदिल्क आंदुर. इसंटा मनकलोर लोकुल्कुना कदरतुन आयो गानि पेनदा कदरतुन पह्कांतुर.