रोम सहरतोरहाटीं पौलुसना सिट्टि
पौलुस रोमि विस्वासुल्कुंक सतता परिचयम कींतोर
1
1 नना पौलुस, येसु किरिस्तुना दासुaन आंदुन. नना मीकु इद सिट्टि रासेक मंतन. येसु किरिस्तुना कबाह्क कियालय पेन नाकुन प्रेरितb इंचि पेरता. पेरसि दाना बेसता कबुर वेहालय लोह्ता. 2 पेन बाबाल हींतन इत्ता इदे बेसता कबुरता बारेमते पेनदा कबुरतोर मुन्नेने पवित्र दर्मसास्त्रमते रासि इरतुर. 3 इद बेसता कबुर, मनकना रूपमते पुटसि वाता पेनदा मर्रिना बारेमते मंता. ओर दाविद राजाना वंसंमते पुटतोर. 4 गानि मना सामि येसु किरिस्ते पेनदा मर्रि आंदुर इंचि हुप्सालय पेन दाना पवित्र आत्माता ताकतहेंदाल ओन हातोरव्टेटाल मर्रा जीवाते तेहता.5 अंटोर लोकुल्क ओन विस्वासम कियना, आनि ओर वेहताप ताकना इंचि पेन नावा पोर्रो दया हुपिच्चि नाकुन येसुनहेंदाल प्रेरित इंचि निलाहता. 6 येसु किरिस्तुना लोकुल्क आयनाहाटीं केयतोरव्टे मिमेटगुडा मंतिर.
7 रोम सहरते मनना मीकु अंटोर्कु ई सिट्टि राससि नना बतल वेहासेक इत्ते, पेनदुक मिमेट इत्ते वेल्लेन पावरम. इंका अद मीकुन दाना पवित्र लोकुल्क आयालय केयता. मना पेन बाबाल आनि येसु किरिस्तु सामिन हेंदाल मीकु दया आनि सांति दोर्कि.
पौलुस पेनदुक पारतना कींतोर
8 मोदाला नना मीकु वेहानद बतल इत्ते, मीवा विस्वासम बारेमते पूरा दुनियाक तेळियसि होत्ता. इदुन मति कीसेक मीवा अंटोराहाटीं किरिस्तुनहेंदाल पेनदुक दन्यवाद कींतन. 9 पेनदा मर्रिना बारेमता बेसता कबुरतुन वेहासेक नना नावा पूरा मनसुनाल पेनदा सेवा कीसेक मंतन. 10 नना पारतना कियानस्के बस्केळ्क मीकुन मति कींतन. दीनकु आ पेने गवाइ मंता. पेनदा इच्चा मत्ते, ई मल्का अय्ना मिहगा वायना हर्रि दोर्कि इंचि इल्हागुडा नना पेनदुक पारतना कीसंतन. 11 सामिनाहेंदाल नाकु दोर्कता आत्माता वराल्कुन मीवातोनि पंचकुनना इंचि नावा मनसु मंता. दीनहेंदाल मिमेट पेनदा लोप्पो गट्टिगा बेर्सकिर, अदुनहाटीं नना मिहगा वायालय हूळसंतन. 12 इत्ते मीकु, नाकु मना लोप्पो मत्ता विस्वासमता हेंदाल मनम वरोंक-वरोर प्रोत्साहन कीकुनना इंचि नावा मनसु मंता.
13 नावा विस्वासुल्कुनिटा! नना मीकु वेहानद बतल इत्ते, यहुदि आयवोर लोकुल्कुंक बेसता कबुर वेह्चि ओर्क सहायम कीतन, अस्के ओर ओरा विस्वासमता पिसवरते बेस बेर्सतुर. अल्हेन मिमेट इंका मीवा विस्वासमता पिसवरते बेस बेर्सना इंचि नना ऊके-ऊके मिहगा वायालय हूळुंदुन, गानि इदवेरादाका बतलन्ना-बतल अड्डम वासेक मत्ता, इद पोल्ले मीकु तेळियना इंचि नना वेहासेके मंतन.
14 युनानि बासा आनि युनानि रीति-रिवाजकु तेळियतोर, तेळियवोर लोकुल्कुंक आनि करियतोर्क, करियवोर्क इल्हा अंटोर्के पेनदा पोल्ले वेहना जिम्मेदारि ना पोर्रेन मंता. 15 अदुनहाटीं रोम सहरते मनना मीकगुडा नना बेसता कबुर वेहालय तयार मंतन.
16 विस्वासम कियना अंटोर्कुंक, इत्ते मुन्ने यहुदिल्कुंक पजा यहुदि आयवोर लोकुल्कुंक मुक्ति हियालय ई बेसता कबुरते पेनदा ताकत मंता. अदुनहाटीं नना पेनदा बेसता कबुर वेहालय सिग्गु अर्रोन. 17 बारित्ते पेनदा मुन्ने मनकल सत्तेमंतुड बल्हा आंतोर इत्ता पोल्ले बेसता कबुर मनाकु वेहंता. सुरुवनाल आकिरदाका विस्वासमतेन इद आया परंता. “सत्तेमंतुल्क विस्वासमतोनि पिसंतुर,” इंचि दर्मसास्त्रमते राससि मंता.
अंटोर पापम कीतोरे आंदुर
18 बेसता कबुर अंटोर लोकुल्कुंक एविच्चना अव्सरम बारि मंता इत्ते, सत्तेम हर्दे ताकवा लोकुल्क कराब कबाह्क कीसि सत्तेमतुन दबांचि इरतुर. निजम पेन हिल्ले इत्ताप ताकसि, तप्पुड कबाह्क कीतुर. अदुनहाटीं पेन ओर पोर्रो स्वर्गमताल दाना होंगुन हुप्संता. 19 निजमाता पेन दाना गुनाल्कुन अंटोर लोकुल्कुना मुन्ने हूपिस्ताहाटीं इव अन्नि पोल्लें ओर्क एर्के मंतां. 20 अद बल्हा इत्ते, इद दुनिया पुटतस्केटाल पेन तयार कीता दुनियातुन हूळते, दाना बस्केन दिस्सुवा गुनम आनि बस्केने तक्को आयवा ताकत मनाकु दिसंता. अदुनहाटीं पेनदुन एरपाट किय्योम इंचि मनकलोर इना परुर. 21 ओर पेनदुन अय्ते एरपाट कींतुरे, गानि पेनदुन बल्हा अय्ते तल्सकुनागोम अल्हा तल्सकुन्नुर इंका दाना कदरगुडा किय्युर. अल्हा किय्यका ओर अट्टि विचाराल्क कीसि ओरा मनसुने हीकटा कीकुत्तुर. 22 “मोमोट तेल्विगल्लोरम,” इंचि वेहकुंचि ओर बुद्दि हिल्वोरलेह्का आतुर. 23 बारित्ते बस्केळ्क जीवाते मंदना महिमागल्ला पेनदुन मोळकका, दाना जेगाते नासडेम आयना मनकानव, पिट्टेनव, जिवरासिनव आनि तरासुनलेह्का बेंगना जिवरासिना बोम्मां कीसि मोळकालय दल्गतुर.
24 अदुनहाटीं ओरा मनसुने मत्ता बोगम विचाराल्कुन पूरा कीकुनालय पेन ओर्कुन होळसीता. अस्के ओर वरोना मेंदुल वरोंक कदर हिलाकुंटा बोगमतनाल्क कीतुर. 25 “पेनदा बारेमता सत्तेम पोल्ले आबद्दम आंद,” इल्हा इनकुंचि ओर्कुन तयार कीता पेनदुन मोळकका, अद तयार कीतवुन पेन इंचि मोळकालय दल्गतुर. गानि अवुन तयार कीता पेने बस्केळ्ताहाटीं तल्सुकुननालायक मंता, आमीन. 26 अदुनहाटीं पेन ओर्कुन ओरा मनसुंक वाता सिग्गु हिल्वा कबाह्क कियालय होळसीता. अस्के मुर्ताह्क मुय्दुरतोनि मींडानद होळसि, मुर्ताह्कुनतोनि मुर्ताह्के मींडसि बस्केन ओप्वा कबाह्क कियालय दल्गतां. 27 अल्हेने मांड्सागुडा ओरा मुत्तोह्कुनतोनि मींडानद होळसि, मांड्सातोनि मांड्सा मुत्तो-मुय्दोनलेह्का मींडसि बोगमतनम कियालय दल्गतुर. इसोंटा बोगमतनम कीताहाटीं ओर्क ओरा पिसवरते रोगाल्क-तकलिप वासि सिक्सागुडा दोर्कता.
28 ओर पेनदा सत्तेमता पोल्लेतुन एरपाट कियालय हूळा हिल्लुर. अय्ते ओर बद कबळ कियमळ बेस आयो, अदे कबळ कियालय पेन ओर्कुन होळसीता. 29 ओरा लोप्पो अन्नि तीरुकुना कराब कबाह्क, पगा, आस्ति, सीडातनम निंडिस होत्ता. आनि चुगलीं कियमळ, कळ्क पोतमळ, हव्कमळ, जगडाल्क कियमळ, विरोदम कियमळ, नळेह कियमळ इसोंटा गुनम निंडिस ओर इंका वरोना बारेमते कराब विचारम कियानोर आतुर. 30 इंकावरोन तेंडिस पोहानोर, पेनदुन हय्सवोर, गर्रा कियानोर, पोंगुळ वळ्कानोर, कराब पोल्लें पुटिच्चनोर, तल्लुर-बाबोना पोल्ले केंजवोर; 31 बुद्दि हिल्वोर, हीता पोल्लेपोर्रो ताकवोर, जीवा नोय्यवोर, दया हिल्वोर आतुर. 32 इसोंटा मनकलोर्कुंक पेनदाहेंदाल हामुरता सिक्सा तप्पो इंचि ओर्क एरपाट मंचिगुडा ओर इल्हे ताकंतुर. अचोने आयका अल्हा ताकानोर्कुन “बेस ताकसेक मंतिट”, इंचि मेच्चकुंतुर.