हीता पोल्लेताल पेन पजोळ्क होन्नो
3
1 इद केंजसि मिमेट इनकुंतिर बारे, “अय्ते यहुदि आसि बतले पायदा हिल्लेना? कतनाकु इच्चोगुडा विलवा हिल्लेना?” 2 विलवा अय्ते मंता. अद बल्हा इत्ते, पेन दाना पोल्लेaन मोट्टा मोदाला यहुदिल्कुंके हीता. 3 यहुदिल्कुना लोप्पो पेनदा पोल्ले केंजवोर इच्चुर मत्तुर. ओर अल्हा मत्तुर इंचि पेनगुडा हीता पोल्ले पोर्रोटाल पजोळ्क आंता इनकुंचंतिरा? 4 हिल्ले, बस्केने आयो. लोकुल्क अंटोर आबद्दम वळकानोर आयिना, पेन मात्रम बस्केळ्क निजम मनंता. बारित्ते दर्मसास्त्रमते,निमे वळ्कते नीवा पोल्ले निजम इंचि दिस अर्रंता,
निमे न्यायम कियनेंके नीवा पोल्ले गेल्संता, इंचि राससि मंता.b
5 मना तप्पु कबाह्कुन हूळसि पेन सत्तेमंतुड इंचि एक्को एर्का आंता. इल्हा आतास्के पेन मनाकु सिक्सा हीसि अन्यायम कीसंता इंचि मनम इनकुना परंतोम. इद नना मनकना विचारम मत्ताप वळ्कसंतन. 6 गानि अल्हा बस्केने आयो, अल्हा आते पेन दुनियातोरा न्यायम बल्हा किय्यार? 7 अचोने आयका, “मावा तप्पुड कबाह्कुनहेंदाल पेने सत्तेमतद इंचि तेळियसि दाना कदर इंका वेल्लेन आसेके अय्ते, पेन माकुन पापिर्क बल्हा इना परंता?” इंचिगुडा इच्चुर लोकुल्क लोल्लि कींतुर. 8 इल्हा कियानोर, “पापम कीते बेस जर्गसेक गदा! अय्ते दट पापम कीकोम,” इंचिगुडा इंतुर. इंका इल्हा मोमोटे कराहतोम इंचि इच्चुर लोकुल्क मा पोर्रो दोसेमगुडा दोस्संतुर. गानि अल्हा कियानोर अंटोर्कुंक, पेन दगता सिक्सा हींता.
पापम हिलाकुंटा बोरे हिल्लुर
9 सरे! अय्ते मनम यहुदिल्कुम, यहुदि आयवोरकन्ना बेसतोर्कुमा? अस्सल हिल्लोम. बारित्ते यहुदिल्क आयिर, यहुदि आयवोर आयिर. अंटोर पापम कीतोरे इंचि नना मीकु मुन्नेन वेहचि मत्तन. 10 दर्मसास्त्रमतेगुडा इदुना बारेमते इल्हा राससि मंता गदा:
“बोरे सत्तेमंतुड हिल्लोर, वरोर इंका हिल्लोर!
11 निजम तेळियतोर बोरे हिल्लुर, वरोर इंका हिल्लोर.
पेनदुन पह्कानोर बोरे हिल्लुर.
12 अंटोर पेनदा निजम हरदाल तपसि तप्पुड हर्दुक होत्तुर.
कबळ्क ओज्जनलायक बोरे हिल्लुर,
बेसता कबळ कियानोर बोरे हिल्लुर, वरोर इंका हिल्लोर.c
13 ओरा तोळदाल पेय्साना पोल्लें, बोंदा कुल्ला मत्ते पीनगुना बल्हा गब्बु वांता अल्हा मंतां,
ओरा तोळदाल पेय्साना पोल्लें, इंकावरोन मुळाहनव आंदुं.d
तरासुना विसम वरोन बल्हा हव्कंता,
अल्हेन ओरा पेदविनाल पेय्सना पोल्लें इंका तकलीप कियनद आंदe
14 ओरा पोल्लें सापनेम आनि कयमुलतोनि निंडिस मंतां.f
15 ओर बस्केळ्क इंकावरोन हव्कालय हूळसेक मनांतुर.
16 ओर बगा अय्ते दांतुर अगा नासडेम कीसि दुक्कमतुन हीसि दांतुर.
17 सांति बगा दोर्कंता अद हर्रि ओर्क एरपाट हिल्ले.g
18 ओर्क पेनदा वेर्रे हिल्ले.”h
19 मूसाना नियम परकारम बोरय्ते ताकंतुर ओराहाटींगे मूसाना नियम मंता, इद मनाकु एरपाटे. अयना पेन न्यायम कियनेंके दुनियातोर अंटोर, इत्ते यहुदिल्क आयिर यहुदि आयवोर आयिर, अंटोर पेनदुक लेक्का हियमळे, बोरे तप्पिच्कुना परुर. 20 मूसाना नियमता हेंदाल मनम अंटोरम पापिर्के इंचि तेळियंता अच्चोरे. गानि अव्टे वेहचि मत्ताप ताकसि पेनदा मुन्ने बोरे सत्तेमंतुल्क आयुर.
पेन मनकलोर्कुन सत्तेमंतुल्क कींता
21 गानि इंदके मूसाना नियमते रासि मत्ता पोल्लेन कियाकोंटेन मनकलोर्कुन सत्तेमंतुल्क कियनाहाटीं पेन इंकुंदि हर्रि तयार कीता. अद हरदा बारेमते, मूसाल आनि पेनदा कबुरतोर पोल्ले हीसि मुन्नेन दर्मसास्त्रमते राससि इरतुर. 22 अद हर्रि बतल इत्ते, बोरे आयिर येसु किरिस्तुन पोर्रो विस्वासम इरते पेन ओर्कुन सत्तेमंतुल्क कींता. इव्टे कुलम, जाति इल्हा बतल हिल्ले.
23 बारित्ते अंटोर लोकुल्क पापम कीसि, पेनदाहेंदाल दोर्कना कदरताल लक्कु आतुर. 24 गानि येसु किरिस्तु हासि अंटोर लोकुल्कुन पापाल्कुना सिक्साताल तप्पिस्तोर. इल्हा पेन दाना दयाते येसुन किरिस्तुन विस्वासम कियानोर्कुन अंटोर्कुन सत्तेमंतुल्क कीता. दीनाहाटीं मनम पेनदुक बतल हियना अव्सरम हिल्ले. 25-26 मना पापाल्कुना सिक्सातगा मोक्कु आयालय पेन येसुन लोह्ता. येसु किरिस्तु मना पापाल्कुनाहाटीं मोक्कु आतोर इंचि मनम विस्वासम कीसि ओप्कुनगोम. दीनहेंदाल येसुनपोर्रो विस्वासम कीतोर्कुन पेन सत्तेमंतुल्क कींता. इदवेरदाका बोरय्ते पापम कीतुरो, ओर्क सिक्सा हियाकोंटा पेन ओप्के पीसि मत्ता. इल्हा अद सत्तेमंतुड इंचि हुपिस्ता. 27 अदुनहाटीं मनम पेनदुक दग्गेटोरम इंचि गर्रा किया मन्नि. मनम पुन्नेम कबाह्क कीतोम इंचि पेन मनाकुन सत्तेमंतुल्क कीतना? हिलाकोंटे मूसाना नियम पोर्रो ताकताहेंकेना? हिल्ले. विस्वासम कीताहेंकेन मनम सत्तेमंतुल्क आतोम. 28 मूसाना नियमते मत्ताप ताकताहाटीं पेन मनाकुन सत्तेमंतुल्क इना हिल्ले, गानि येसु किरिस्तु सामिन पोर्रो विस्वासम कीताहेंकेन सत्तेमंतुल्क इत्ता. 29 अय्ते दीना अर्तम मिमेटे विचारम कीसि वेहाट. पेन सिराप यहुदिल्कुनदेना? यहुदि आयवोर्कुनद आयोना? हिल्ले. पेन यहुदि आनि यहुदि आयवोर, इव्वुरदगुडा आंद. 30 अद बल्हा इत्ते, पेन उंदे आंद. यहुदिर आयिर, यहुदि आयवोर आयिर, इव्वुर्कुन इंका पेन ओरा विस्वासमहेंदाले सत्तेमंतुल्क कींता. 31 “अल्हा अय्ते, विस्वासम कीताहेंका मनाकु मूसाना नियमता अक्केर हिल्ले, इनकुंचंतिरा?” अल्हा आयो. विस्वासमहेंदाले मूसाना नियमते मनम बेस ताका परंतोम.