पेन अब्राहामुन ओना मर्रिना मोक्कु हीम इंता
22
1 इव अन्नि पोल्लें आसि होत्तारित्ते, पेन अब्राहामुना उंदि परिक्सा येतता: पेन अब्राहामुन, “अब्राहाम,” इंचि केयता. अस्के अब्राहाम, “नना इगे मंतन,” इंचि जवाब हीतोर. 2 पेन ओन, “नीवा वरोर आता वरोर पावरमगल्ला मर्रि इसाकुन पीसि निमे मोरिया इनना एरियाते होन. अगा नना नीकु वेहना गुट्टापोर्रो नीवा मर्रिन ओसि ओना होमबलि हीम,” इंचि वेहता. 3 अय्ते अब्राहाम हक्केरेन तेदतोर, तेदसि बलि हियालय कट्टें तच्चि ओना गाडदितुन सवरिच्चि दाना पोर्रो वाटतोर. ओना जीतागाह्कुनाल इव्वुर लेय्युर्कुन आनि ओना मर्रि इसाकुन पीसि, ओन्कु पेन वेहता जेगाक होत्तोर. 4 मूडोव रोजुननाड अब्राहाम तला तेह्चि पेन वेहता अद जेगातुन लक्कुटाल हूळतोर. 5 आनि ओना जीतागाह्कुन, “मिमेट इग्गेन गाडदितगा मंटु. नना आनि ई पेड़ल अगडदाका होंचि पेनदुक मोळ्कीसि मर्रा मिहगा मल्सि वांतोम,” इंचि वेहतोर. 6 पजा अब्राहाम बलि हियनाहाटीं कट्टें ओना मर्रि इसाकुना पोर्रो वाटतोर आनि ओर बारे कय्दे उंदि किस कूटेल आनि कासेर पीसि इव्वुर कलियसि होनालय पेय्सतुर. 7 इसाक ओना बाल अब्राहामुन, “नावा बाबा” इंचि इत्तोर. अस्के, “इगे मंतन कोको,” इंचि अब्राहाम जवाब हीतोर. अस्के इसाक, “हुळा! कट्टे आनि तडमि अय्ते मंता गानि बलि हियालय गोर्रे बगा मंता?” इंचि पूसकीतोर. 8 अस्के अब्राहाम, “बलि हियनाहाटीं पेन कुद्दे गोर्रेतुन एव्विचि हींता कोको,” इंचि जवाब हीतोर. इल्हा ओर इव्वुर कलियसि होत्तुर.9 पेन वेहता जेगाक बस्के अय्ते ओर येवतुर अस्के, अगा अब्राहाम उंदि बलि पीटम दोह्चि, दानपोर्रो कट्टें तारतोर. तारसि, ओना मर्रि इसाकुन दोह्चि आ कट्टेन पोर्रो मींडिंस्तोर. 10 पजा अब्राहाम ओना मर्रिन कोय्यालय कय हाह्चि कासेर पीतोर. 11 गानि यहोवाना उंदि दूता स्वर्गमताल ओन, “अब्राहामु, अब्राहामु,” इंचि केयता. अस्के अब्राहाम, “नना इगे मंतन,” इंचि ओर इत्तोर. 12 आ दूता, “आ पेडानेके नीवा कय ओयमा आनि ओन निमे बतले कियमा. निमे पेनदुक वेरियानोन इंचि नाकु इंदके तेळियता. बारित्ते निमे नीवा वरोर आता वरोर मर्रिनगुडा नाहाटीं बलि हियालय पजोळ्क होना हिल्लिन,” इंचि इत्ता. 13 अस्के अब्राहाम तला तेह्चि पजोळ्क हूळतोर अय्ते, पोर्का पोदाते उंदि गोर्रे पोतु कोह्कु हिरकीसि मत्तद ओन्कु दिसता. अस्के अब्राहाम होंचि दान पीसि वातोर आनि ओना मर्रिना बलि हिय्यना जेगाते आ गोर्रे पोतुन बलि हीतोर. 14 अय्ते अब्राहाम अद जेगाक, “यहोवा ईरे” इंचि पोर्रोल दोसतोर. इंदकेळ्कगुडा लोकुल्क, “यहोवाना गुट्टापोर्रो यहोवाले हींतोर,” इंचि इंतुर.
15 आनि येहोवाना दूता रोंडोव मल्का स्वर्गमताल अब्राहामुन केय्सि इल्हा इत्ता: 16 “यहोवाल इल्हा इंचंता गदा, निमे नाहाटीं नीवा वरोर आता वरोर मर्रिनगुडा हियालय पजो-मुन्ने आया हिल्लिन. अदुनहाटीं नना कुद्दु नावा ओट्टु तिंचि पोल्ले हीसेक मंतन, 17 नना नीकु तप्पाकोंटा आसिर्वादम हींतन. मब्बुने मनना सुक्कानच्चोन आनि समुद्रमते मनना उस्केतच्चोन नीवा वंसमतुन बेर्सागोट्टंतन. आनि नीवा वंसमतोर ओरा पगातोर्कुना सहरकुन येतकुंतुर. 18 आनि नीवा वंसमतोराहेंदाले बूमिपोर्रोटा अन्नि जातिनोर्क आर्सिवादम दोर्कंता. बारित्ते निमे नना वेहताप ताकतिन.” 19 अस्के अब्राहाम ओना जीतागाह्कुनगा मल्सि वातोर. ओर अंटोर कलियसि, बेरसेबा मल्सि होत्तुर. आनि अब्राहाम अग्गेन बेरसेबाते मनालय दल्गतोर.
नाहोरना वंसम
20 इव अन्नि पोल्लें आसि होत्तारित्ते, अब्राहामुंक, “हूळा! नीवा तम्मुर नाहोरनाहेंदाल ओना मुत्तो मिल्काल पिलाल्कुन कंता. 21 अद ऊसल(पेद्दा मर्रि), बूजल(ऊसलना तम्मुर), केमुयेल(ईर अरामुना बाबो आंदुर), 22-23 केसेदल, हजोल, पिल्दास, यिद्लाप आनि बेतुयेल(ईर रेबेकाना बाबो आंदुर), इल्हा एनमिदि मंदितुन मिल्काल अब्राहामुना तम्मुर नाहोरनाहेंदाल कंता,” इंचि कबुर वाता. 24 इच्चोने आयका, नाहोरुंक इरकुत्तद रूमा इनना मुत्तोगुडा मत्ता. अद तेबह, गहम, तहस आनि माका इनानोर्कुन कंता.