21
1 पेन सारांकु वेहता परकारमे, अद हीता दाना पोल्लेतुन पुरागा कीता. 2 अद बल्हा इत्ते, बरोबर पेन इत्ता वेलातेन, साराल नेला तप्सि अब्राहाम मातरल आसि मनिना गानि ओनाहाटीं वरोर मर्रिन कंता. 3 अब्राहाम, सारानहेंदाल पुट्ता ओना मर्रिंक इसाक इंचि पोर्रोल दोसतोर.a 4 पेन अब्राहामुंक हीता आदेस परकारम ओर ओना मर्रि इसाकुना कतना ओर पुट्ता एनिमिदो रोजुननाड कीतोर. 5 इसाक पुटतस्के अब्राहाम नूर वर्सानोर मत्तोर. 6 अस्के साराल, “पेन नाकुन कुसिते कव्वानाल कीता. इद पोल्ले केंजना हरेक मनकल नातोनि कुसिते कव्वनुर,” इंचि इत्ता. 7 इंका मुन्ने, “साराल पिलाल्कुंक पाल उहांता इंचि बोरन्ना अब्राहामुन इंचि मत्तुरा? गानि नना मात्रम ओना मातिरतनमतेगुडा ओनाहाटीं मर्रिन कंतन,” इंचि साराल इत्ता.हाजिरन आनि इस्माएलुन लोताल पेच्हामळ
8 इसाक पेद्दा बेर्सि पाल मति मरुंगतोर. इसाक पाल उनमळ मरुंगता रोजु अब्राहाम उंदि पेद्दा बोजनम हीतोर. 9 अस्के अब्राहामुंक आनि मिसर देसेमता हागार इनना मुरतळ्कु पुट्ता मर्रि, इसाकुन कारेड्डाल्क कियनेंके साराल हूळता. 10 हूळसि, “ई दासिन आनि दीना मर्रिन पलाते पेच्हा. नावा मर्रि इसाकुनतोनि ई दासिदाना मर्रि पालिगाड आयामन्नि,” इंचि अब्राहामुंक वेहता. 11 साराल इत्ता पोल्लेहेंदाल अब्राहामुंक वेल्लेन दुक्कम अन्पिस्ता. 12 गानि पेन मात्रम अब्राहामुन, “नीवा दासि आनि दाना मर्रिना बारेमते निमे बादा अरमा. साराल वेहताप निमे कीम. बारित्ते नीवा वंसम इसाकुनाले मनंता. 13 इंका नीवा दासिना मर्रि, नीवा वंसमतोरे आताहाटीं ओनाहेंदालगुडा उंदि जातितुन तयार कींतन,” इंचि वेहता. 14 इंकुंदि रोजु अब्राहाम हक्केरेन तेदसि इच्चुं हारीं आनि तोलबुर्राते एर दोस्सि, हागरना हट्टक कळाह्तोर. कळाह्चि दान दाना पेडनतोनि सार्ला कीतोर. अस्के अद मुरतळ बेरसेबा इनना बय्लि जेगाते तिरियसेके मत्ता. 15 तोलबुर्राता एर मारतस्के, अद आ पेडन उंदि पोदा हिळु इरता. 16 पजा अद, पेडानागटाल गिचचो लक्कु होंचि, आ पेडानेके तिरियसि उद्दिस, “नना नावा पेडाना हामुर हूळा पर्रोन,” इंचेके इरगा अळता. 17 पेन आ पेडाना अळमळतुन केंजता. अस्के स्वर्गमताल पेनदा उंदि दूता हागरुन केय्सि, “हागर नीकु बतल आता? निमे वेरियमा. बारित्ते पेडल बगाय्ते मंतोरो अगटाल पेन ओना लेंगुन केंजता. 18 तेदा, होंचि पेडन नीवा कय्दे एतकुन. ओनाहेंदाल नना उंदि पेद्दा जातितुन तयार कींतन,” इंचि इत्ता. 19 पजा पेन, हागरना कळ्कुंक, एर मत्ता उंदि कुहि दिस्सानाल कीता. अस्के अद होंचि तोलबुर्राते एर निहता आनि तच्चि पेडांक उह्ता. 20 पेन आ पेडनतोनि मत्ता. आ पेडल अवे बय्लि जेगाने पेद्दा बेर्सि, बानम तन्नुटे हुसार आतोर. 21 ओर पारन इनना बय्लि जेगाते मननेंके, ओना यावल ओनाहाटीं मिसर देसेमताल उंदि पोरिन तच्चि ओना मरमिं कीता.
अबिमेलेक राजानतोनि अब्राहाम करार कींतोर
22 आ कालमते बतल आता इत्ते, अबिमेलेक राजाल ओना कमांडर पिकोलुनतोनि अब्राहामुनगा होत्तोर. होंचि ओन, “निमे बता कबळ किय्यिना, अव्टे पेन नीकु तोड़ मंता. 23 अदुनहाटीं नना नीवा पोर्रो दया हुपिस्ताप, निमेगुडा इंदके, नातोनि, नावा वंसमतोरतोनि इंका निमे मंतिन इद देसेमतोनि बस्केन दोका किय्योन, इंचि पेनदा पोर्रोलते ओट्टु तिन,” इंचि इत्तोर. 24 अस्के अब्राहाम, “नना ओट्टु तिंतन,” इत्तोर. 25 उंदि रोजु अबिमेलेकुना जीतागाह्कु अब्राहामुना उंदि कुहितुन जबरदस्ति कीसि तेंडकुंचि मत्तुर. इदुना बारेमते अब्राहाम अबिमेलेकुनगा रिपोट कीतोर. 26 अस्के अबिमेलेक, “इल्हा बोर कीतुरो, नाकु एर्का हिल्ले. निमेगुडा नाकु वेहा हिल्लिन. आनि नना इदवेरदाका दीना बारेमते बस्केन केंजिंका हिल्लेन,” इंचि इत्तोर. 27 अस्के अब्राहाम, गोर्रें-एटीं आनि गोड्क-कोंदां तच्चि अबिमेलेकुंक हीतोर. इल्हा ओर इव्वुरा नड्डुम उंदि करार आता. 28 अब्राहाम आ मंदाताल एडूं गोर्रे मर्का पोरिह्कुन वेरे कीसि इर्तोर. 29 अस्के अबिमेलेक अब्राहामुन, “इल्हा एडूं गोर्रे मर्का पोरिह्कुन वेरे कीसि इर्रानदान्कु अर्तम बतल?” इंचि पूसकीतोर. 30 अस्के अब्राहाम, “इद कुहितुन नना तोरतन, इंचि निमे गवाइ मननाहाटीं, निमे इव एडूं गोर्रे मर्का पोरिह्कुन नावा कय्दाल येता,” इंचि इत्तोर. 31 अद जेगाते ओर इव्वुर उंदि ओट्टु तित्ताहाटीं अद जेगाकु, बेरसेबा इंचि पोर्रोल अर्ता. 32 इल्हा बेरसेबातगा करार्क कियमळ आतारित्ते, अबिमेलेक आनि ओना कमांडर पिकोल, अगटाल तेदतुर आनि पलिस्तिल्कुना देसेमकु तिरियसि होत्तुर. 33 अस्के अब्राहाम बेरसेबातगा झाऊ इनना उंदि मरा वाटतोर. वाटसि बस्केळ्क मंदना पेन, यहोवांकु आरादना कीतोर. 34 पजा अब्राहाम पलिस्तिल्कुना देसेमते वेल्लेन रोजकुनदाका परायतोनलेह्का मत्तोर.