अब्राहाम आनि अबिमेलेक
20
1 अस्के अब्राहाम अगटाल नेगेब इनना राज्येमते होत्तोर. होंचि कादेस आनि सूर सहरकुना नड्डुम मनना गेरार इनना सहरते मनालय दल्गतोर. 2 अब्राहाम ओना मुत्तो साराना बारेमते, “इद ना हेलड आंद,” इंचि वेहतोर अय्ते, गेरारता राजाल अबिमेलेक ओना सिपाइल्कुन लोहचि सारान ओनगा पीसि वाया वेह्तोर. 3 गानि नर्काटा वेलाते पेन अबिमेलेकना कलाते वासि ओन्कु, “हूळा! निमे बा मुरताटुन अय्ते लोन तच्चि इरतिनो, अद वरोर मनकना मुत्तो आंदु, वेरेतोना मुत्तोन तच्चि इरतादान्कु निमे हासि दांतिन,” इंचि वेहता. 4 अदवेरदाका अबिमेलेक सारानतोनि मींडा हिल्लोर. अय्ते अबिमेलेक पेनदुन, “ सामि, दोसेम हिलुवा लोकुल्कुन इंका निमे हव्कंतिना? 5 ‘इद ना हेलड इंचि,’ ओरे कुद्दु नाकु वेहा हिल्लोरा? आनि अदगुडा, ‘ईर ना दादाल,’ इंचि वेहता. इद नना इमानदार मनसुने आनि दोसेम हिलुवा कयकुने कीतन,” इंचि इत्तोर. 6 अस्के पेन कलाते अबिमेलेकुनतोनि, “हो, निमे निजमे नीवा इमानदार मनसुने इद कबळ कीतिन इंचि नाकु एर्के मंता. आनि ननागुडा नावा विरोदमते निमे पापम कियाकोंटा नीकुन आपतन. इदुनाहाटींगे नीकुन सारान इट्टा हिया हिल्लेन. 7 इंदके निमे ओना मुत्तोन ओन्कु ओसि अप्पजेप्पा. बारित्ते ओर वरोर पेनदा कबुरतोर आंदुर. ओर निहाटीं पारतना कियनुर अस्के निमे पिस्सि मंदकिन. गानि ओक्कला निमे ओना मुत्तोन ओन्कु अप्पजेप्पाकोंटे, निमे, निवोर अंटोर लोकुल्क तप्पाकोंटा हांतिर, इद निमे एरपाट कीकुन,” इंचि वेहता.8 अय्ते अबिमेलेक हक्केरेन तेच्चि, ओना अंटोर सेवाकुल्कुन केयतोर. केय्सि जर्गतदंता अन्नि ओर्कु वेहतोर अय्ते ओर इरगा वेरियतुर. 9 अस्के अबिमेलेक अब्राहामुन केय्सि, “निमे मावातोनि इल्हा बारि कीतिन? नना नीकु बतल पापम कीताहेंके, निमे नावा पोर्रो आनि नावा राज्येमपोर्रो इच्चोन पेद्दे पाप गंडम वायानाल कीतिन? निमे नावातोनि बतल अय्ते कीतिनो, अद बेस किया हिल्लिन,” इंचि इत्तोर. 10 मर्रा अबिमेलेक अब्राहामुन, “असल बतल इन्कुंचि निमे इल्हा कीतिन?” इंचि पूसकीतोर. 11 अस्के अब्राहाम, “इद जेगाते पेनदा वेर्रे बोनके हिल्ले. आनि नावा मुत्तोनाहाटीं इगेटा लोकुल्क नाकुन हव्कानुर इंचि नना इल्हा कीतन. 12 इच्चोने आयका अद नाकु निजमे हेलड आंता. अद नावा यावाना मिय्यड अय्ते आयो, गानि नावा बाबाना मिय्यड आंदु. ननाने दान तुंगतन. 13 पजा बतल आता इत्ते, नावा बाबाना लोताल पेय्सालय पेन नाकु आदेस हीसि मत्ता. अस्के नना दान्कु, ‘ मनम बद-बद जेगाते होनिना गानि अगा निमे, नावा बारेमते, “ईर नावा दादल आंदुर,” इंचि नावा पोर्रो दया कीसि वेहा,’ इल्हा वेहचि मत्तन,” इंचि अबिमेलेकुंक वेहतोर. 14 अस्के अबिमेलेक अब्राहामुना मुत्तो सारान अब्राहामुनगा ओसि अप्पजेप्तोर. अल्हेन एटीं-गोर्रें, गोळ्क-कोंदां आनि दासि-दासुर्कुनगुडा हीतोर. 15 हीसि, अबिमेलेक, “हुळा! नावा बूमि-जेगा नीवा मुन्ने मंता, नीकु बगा पसंद वाते अगा होंचि मन्नु,” इंचि अब्राहामुंक वेहतोर. 16 अस्के अबिमेलेक सारान, “हुळा, नीवा दादांकु नना वेय एंडि बंडिं हीतन. इव बंडिं नितोनि मत्ता अंटोरा कळ्कुना मुन्ने निमे कसुर हिलुवा मुरतटुन इंचि हुप्संतां. आनि इदुनहेंदाल वेल्लेन लोकुल्कुंक तेळियार गदा, निमे बतले तप्पु किया हिल्लिन इंचि,” इंचि इत्तोर. 17 अस्के अब्राहाम राजानाहाटीं आनि राजाना कुटुंबमहाटीं यहोवांकु पारतना कीतोर. अस्के यहोवाल अबिमेलेकुन, ओना कुंटुबमतुन इंका दासिह्कुन बेस कीता. अस्के अबिमेलेकुना रानिह्कुंक आनि ओना दासिह्कुंक पिलाल्क आयालय दल्गतुर. 18 बारित्ते अब्राहामुना मुत्तो सारानहेंका यहोवाल अबिमेलेकुना लोता मुर्ताह्कुंक पिलाल्क आयाकोंटा कीसि मत्ता.