पेनदा दूतां सदोम सहरते होनमळ
19
1 नुल्पेटा वेलाक रोंडु पेनदा दूतां सदोम सहरते होत्तां, अस्के लोतू सदोम सहरते होळियाना हर्दागा उद्दिस मत्तोर. लोतू अव दूतान हूळसि अवुंक कलियनाहाटीं तेदतोर, आनि बूमिपोर्रो बोक्बोर्लें अर्सि अवुंक नमस्कारम कीतोर. 2 कीसि, “नावा सायाबु! नना मीवा दासुन, नावा लोन वटु इंचि नना मीकु विनंति कींतन. काल्कु नोर्सि इय्यला नर्कळ्क इग्गेन आराम कीम्टु. नाळि हक्केरेन तेदसि मीवा हर्रि मिमेट होंटु,” इंचि इत्तोर. अस्के आ दूतां, “हिल्ले, मोमोट इद नर्का ई हर्देन आराम कींतोम,” इत्तां. 3 गानि लोतू इरगा बातिमलाडताहाटीं आ दूतां ओनतोनि ओना लोन होत्तां. अस्के ओर अवुनाहाटीं गाटो इंचि होयवा पिंडिता हारिं कीतोर, अव तित्तां. 4 गानि ओर मींडालय आसेकेन मत्तुर, अच्चोटेन सदोम नाटेनोर लेय्योर, मातरालोर अंटोर लोकुल्क नालूं मूलानाल वासि लोतूना लोन सुट्टु आतुर. 5 आनि ओर लोकुल्क लोतून केय्सि, “नर्का निहगा वाता मनकलोर बगा मंतुर? ओर्कुन पलाते तच्चि माकु अप्पजेप्पा, माकु ओरतोनि मींडना मंता,” इंचि इत्तुर. 6 अस्के लोतू तल्पुनगा पलाते वातोर आनि पजोटद-पज्जेन पलाताल गोल्सु वाटतोर. 7 वाटसि, “अरे नावा तम्मुह्क-दादालोरिटा, नना मीकु विनंति कींतन इसोंटा कराब कबळ कियमटु. 8 केंजाट! बोरे मनकल इट्टुवा नाकु रोंडु मिय्याह्क मंतां, अवुन मीकु तच्चि हींतन, अवुनतोनि मिमेट मीकु इस्टम वाताप कीकुंटु, गानि ई मनकलोर्कुन बतल कियमटु, बारित्ते ईर नावा लोन वातुर,” इंचि इत्तोर. 9 गानि सहरतोर, “अरे, निमे पजोळ्क जर्गा! वेरे बगाटालो वासि इग्गे मनानोन, माके न्यायम वेहंतिना? इंदके ओरकन्ना एक्को नीकुने कराब कींतोम आगा,” इंचेके लोतून इरगा गट्टिगा अद्मिसि पीसि तल्पुन पैहालय तल्पुना दग्गेर्क होत्तुर. 10 गानि लोता लोप्पो मत्ता मनकलोर लोतून अस्केन लोप्पो ओरगा इग्गुकुत्तुर, आनि लोप्पोटाल तल्पु बंद कीतुर. 11 पजा लोता पलाते मनना पिलाल्क, पेद्दाल्क अंटोरा कळ्कुना नदरतुन बंद कीतुर. अस्के ओर लोकुल्क तल्पुन पह्कीसि-पह्कीसि केदनायकोंटा आतुर.12 पजा आ मनकलोर लोतूंक, “इद सहरते निवोर इंका बोरन्ना मंतुरा? नीवा हडेर्क, मर्क, मिय्याह्क इंका निवोर बोरे आयिर मत्ते, ओर्कुन इग्गेटाल पलाते पीसि होन. 13 बारित्ते मोमोट इद सहरतुन नासडेम कींतोम. इद सहरता पापम एक्को आतद सामिंक केंजा वाता. अदुनहाटीं इद सहरतुन नासडेम कियालय सामि माकुन लोहतोर,” इंचि वेहतुर. 14 अदुनहाटीं लोतू पलाते पेय्सि ओना मिय्याह्कुन मर्मिं आयना हाडेर्कुनतोनि, “सामि इद सहरतुन नासडेम कियाना मंता. तेदाट! इद सहरताल पलाते दाकोम,” इंचि इत्तोर. गानि ओना हडेर्क इद पोल्ले कारेड्डम इन्कुत्तुर. 15 पंगा आतारित्ते, आ दूतां लोतून गाबर कीसेके, “तेदा! निमे नीवा मुत्तो, इग्गे मनना नीवा रोंडु मिय्याह्कुन पीकुंचि पलाते होन, हिलाकोंटे निमेगुडा इद सहरता सिक्साते बूळ्दि आसि दांतिन,” इंचि वेहतां. 16 गानि लोतू अग्गेन दीर्गाल्क कीसेके मत्तोर. अदुनहाटीं आ इव्वुर मनकलोर लोतून, लोतूना मुत्तोन आनि ओना रोंडु मियाह्कुन कय पीसि सहरता पलाते ओतुर. इल्हा पेन लोतूनपोर्रो दया हुपिस्ता. 17 ओर्कुन पलाते ओतस्के उंदि दूता, “मीवा जीवातुन कापाळकुननाहाटीं मिमेट इग्गेटाल वित्ताट. पज्जो तिरियसि हूळमट, इंका इद लोद्दिते बग्गेन आगमट. गुट्टानेके वित्ताट, हिलाकोंटे मिमटेगुडा नासडेम आंतिर,” इंचि इत्ता. 18 अस्के लोतू, हे सामि! अल्हा आयामन्नि. 19 हुळा, नीवा दासुड आता नावा पोर्रो नीकु दया वाता. नाकुन पिसागोटनाहाटीं निमे नावा पोर्रो वेल्लेन दया हुपिस्तिन. गानि नना गुट्टानपोर्रो वित्ता पर्रोन, गुट्टानेके वित्तनेंके अगा एव्वाका मुन्नेन, आ गत्तरा नावा पोर्रो अर्सि नना हांतानो बतलो. 20 हुळा! नना वित्तुते एव्वनलायक दग्गेरा अद सिन्ना सहर मंता, नाकुन अगा होना हीम. अद सिन्ना सहरते होत्ते नावा जीवा पिसा पर्रंता,” इंचि इत्तोर. 21 अस्के अव दूतां ओन, “सरे! नीवा इद पोल्लेतुनगुडा नना ओप्कुंतन. निमे इत्ता सहरतुन नना नासडेम किय्योन. 22 गानि मिमेट अगा बिराना वित्तट, बारित्ते मिमेट अगा एवनदाका नना बतले किया पर्रोन,” इंचि इत्तां. अदुनाहाटींगें अद सहर पोर्रोल सोअर इंचि अर्ता.
23 लोतू सोअर सहरते एवता एव्वुडे बूमिपोर्रो पोळ्द पेय्सता. 24 अस्के यहोवा पेन सदोम आनि गमोरा सहरकुन पोर्रो, स्वर्गमताल गंदकa आनि तळमितुन पिर्दालेसीं अराहता.b 25 इल्हा अव सहरकुन, पूरा लोद्दिन, अगा मत्तोर्कुन आनि अगाटा बूमिपोर्रो बेर्सतवुन अन्निटवुन पेन नासडेम कीता. 26 गानि लोतूना मुत्तो ओना पज्जो वायनेंके पज्जोळ्क मल्सि हूळता अय्ते, अद अग्गेन होव्वोरता कंबा आता. 27 आनि अब्राहाम हक्केरेन, बगा अय्ते ओर पेनतोनि वळ्कीसि मत्तोरो अद जेगाते होत्तोर. 28 होंचि सदोम, गमोरा आनि आ लोद्दिं पीसि मत्ता अन्नि एरियानेके नदर वाटसि हूळतोर. अस्के, उंदि पेद्दा बट्टिताल बगा-बगा पोत्तना तळमिते पेय्सना पोयालेह्का, आ एरियानाल पोया पेय्सानद ओन्कु दिसता.
29 इल्हा लोतु बव सहरकुने अय्ते मनुंदुरो आ लोद्दिं पीसि मत्ता सहरकुन पेन नासडेम कियनेंके अब्राहामना मति कीसि, लोतून कापाळता.
लोतू आनि ओना मिय्याह्क
30 पजा लोतू सोअर सहरते मनालय वेरियतोर. अदुनहाटीं ओर सोअर सहर होळसीतोर आनि ओना रोंडु मिय्याह्कुन पीसि गुट्टापोर्रो होंचि उंदि सोर्रेते मनालय दल्गतोर. 31 उंदि रोजू ओना पेद्दा मिय्यड सिन्ना मिय्याटुन, “मना बाबल अय्ते मातरल आसंतोर. आनि दुनियाते मरमिं आताप मनाकुन मरमिं आयनाहाटीं इद बूमिपोर्रो बोरे मनकल हिल्लोर. 32 अदुनहाटीं वा! मनम मना बानकु केलीं तप्पानाल अंगुर कल्लु उह्कोम. ओर केलीं तपतस्के ओनतोनि मींडकोम. इल्हा कीसि मना बाबानहेंदाल मनम मना वंसमतुन निल्हा पर्रांतोम,” इंचि इत्ता. 33 इल्हा अदे नर्का अव अवुना बाबोंकु इरगा अंगुर कल्लु उह्तां. मुन्ने पेद्दा मिय्यड लोप्पो होंचि दाना बानतोनि मींडता. अद ओनगा बस्के मींडसि, बस्के तेदसि होत्तनो, लोतूंक बतले तेळिया हिल्ले. 34 इंकुंदि रोजु हक्केरे तक्कल हेलाटुन, “हूळा! नना निन्ने नर्का बानतोनि मींडतन. इय्यला नर्कळ्कगुडा ओन्कु इरगा अंगुर कल्लु उह्कोम. पजा निमे लोप्पो होंचि ओनतोनि मींडा. इल्हा मनम मना बानाहेंदाल मना वंसमतुन निल्हाकोम,” इंचि इत्ता. 35 इल्हा अद नर्कागुडा अवुना बाबोंकु इरगा अंगुर कल्लु उह्तां. आनि सिन्ना मिय्यड लोप्पो होंचि बाबोनतोनि मींडता. अद ओनगा बस्के होंचि मींडसि, बस्के तेदसि होत्तनो, लोतूंक बतले तेळिया हिल्ले. 36 इल्हा लोतूना रोंडु मिय्याह्कगुडा लोतूनहेंदाल नेला तप्तां. 37 पेद्दा मिय्यड वरोर मर्रिन कंता, आनि ओन्कु मोअब इंचि पोर्रोल दोस्ता. इंदकेटदाकागुडा मनना मोआबि जातिता लोकुल्कुंक ओर मोदाटा मनकल आतोर. 38 सिन्ना मिय्यडगुडा मर्रिन कंचि ओन्कु बेनम्मि इंचि दोस्ता. इंदकेटदाका मनना अम्मोनि जातिता लोकुल्कुंक ओर मोदाटा मनकल आतोर.