अब्राहामुनगा मुव्वुर मनकलोर वायमळ
18
1 मम्रे इनना जेगाते मनना पेद्दा मराकुनगा सामि अब्राहामुंक मरुंदि मल्का दर्समनम हीतोर. मंचि एद्दि वेलाते, अब्राहाम ओना डेराता गलमाते उद्दिस मत्तोर. 2 अब्राहाम अल्हा नदर तिराह्चि हूळतोर अय्ते, हूळा! अगा ओना मुन्ने मुव्वुर मनकलोर नित्तिसि दिसतुर. ओर ओर्कुन हूळता हूळुळे ओर्क कलियालय ओना डेरातगटाल विच्चि होंचि ओर्कु बोकबोर्लें अर्सि दंडम तासतोर. 3 आनि, “ना सामि, नना मीवा दासुन आंदुन, ओक्कला मीवा दया नावा पोर्रो मत्ते, मिमेट मीवा दासुनगटाल होन्मट. 4 नना येर तच्चि हींतन, काल्क नोर्सि इद मरा हिळु आराम कीम्टु. 5 नना मीहाटीं इच्चुं हारीं तर्रांतन. अव तित्ता पज्जो गोडच्चो कर्वु आरतंका मुन्नेळ्क दाकिट, मिमेट इदुनाहाटींगे मीवा दासुनगा वातिर,” इंचि ओर्कुन इत्तोर. अस्के ओर, “निमे बतल इंचेक अल्हे कीम,” इंचि इत्तुर. 6 अस्के अब्राहाम बिरान्ना लोप्पो सारानगा होंचि, “निमे मूळ हेराना पिंडि पिस्कीसि बिराना हारीं कीम,” इंचि वेहतोर. 7 पजा अब्राहाम ओना गोळकुना मंदातेके वित्तोर, वित्सि उंदि बेस बल्स्ता कुर्रातुन तच्चि ओना जीतागांक हीतोर, ओर अदुन कोय्सि बिराना कुसिर कीतोर. 8 पजा अब्राहाम पेर्गु, पालु, ओर किया वेह्ता हव्विना कुसिर पीसि ओसि ओरा मुन्ने दोसतोर. ओर तिननेंके अब्राहाम ओरा दग्गेरा मरा हिळु नित्तिसि मत्तोर.9 अस्के ओर अब्राहामुन, “नीवा मुत्तो साराल बगा मंता?” इंचि पूसकीतस्के, “अद डेरा लोप्पो मंता,” इंचि अब्राहाम वेहतोर. 10 अस्के ओरागटाल वरोर, “वायना वर्सा इदे वेलाते नना तप्पाकोंटा मर्रा वांतन, अस्के नीवा मुत्तो साराल, वरोर मर्रिन कंचि मनंता,” इंचि वेहतोर. अस्के साराल अब्राहामुना पज्जो मत्ता डेराता तल्पुनगटाल केंजसेके मत्ता. 11 अस्के अब्राहाम, साराल इव्वुर वेल्लेन मातिर आसि मत्तुर. सारांक अय्ते पलाते आयमळगुडा बंद आसि मत्ता. 12 अय्ते साराल दानद-अदे, “नना इच्चोन मातरिन आतन. ना मुय्दोगुडा मातरल आतोर. अय्ते नाकु इसोंटा सुकम दोर्कारा?” इंचि इत्ता. 13 अस्के सामि अब्राहामुन, “साराल कव्सेके, ‘नना अय्ते मातरिन! नाकु मर्रि पुट्टनुरा?’ इंचि बारि इत्ता? 14 सामि किया परवसोंटद बतलन्ना मंतना? इन्कुत्ता वेलाक नना निहगा तप्पाकोंटा वांतन, अस्के सारांक वरोर मर्रि मनंतोर,” इंचि इत्तोर. 15 गानि साराल वेरियसि, “नना कव्वा हिल्लेन,” इंचि तप्पिच्कुत्ता. अय्ना सामि, “हिल्ले, निमे कव्सि मत्तिन,” इंचि इत्तोर.
अब्राहाम पेनदुन वेल्लेन सवाल्क पूसकींतोर
16 अद आतंका, आ मनकलोर सदोम सहरतेके नदर वाटसेके, अगटाल होनालय पेय्स्तुर. अब्राहामगुडा ओर्कुन सार्ला कियालय ओरतोनि पेय्स्तोर. 17 अस्के सामि ओनद-ओरे, “इंदके नना कियाना कबळता बारेमते अब्राहामुनाल मक्किच्चि इरकाना? 18 अब्राहामुनाहेंदाल अय्ते उंदि पेद्दे ताकतवार देसेम तयार आयार, आनि बूमिपोर्रोटा अन्नि देसेल्कुना लोकुल्कुंक ओनाहेंदाल आसिर्वादम दोर्कार. 19 मक्किचि इर्रोन. बारित्ते, ओर ओना पिलाल्कुंक आनि ओना पज्जो मिगिल्सि मनना ओना परिवारतोर्कुंक, ‘निति आनि न्यायम कीसेके सामिना हर्दे ताकाना’ इंचि आदेस हियानुर इंचि नना ओन पेरतन. ओर अल्हा वेह्चेके मत्ते, नना अब्राहामुंक हीता पोल्लेतुन पुरागा कींतन,” इंचि इत्तोर. 20 पजा सामि अब्राहामुनतोनि, “बारित्ते, सदोम, गमोरा सहरतोरा पापाल्क इरगा मुदिरसि होत्तां, ओरा पापाल्कुना वजन वेल्लेन बेर्सोत्ता. 21 नाकु केंजा वाता अल्किर परकारम ओर कीतुरा, किया हिल्लुरा? हिळु रेय्सि होंचि एरपाट कीसि हूळंतन,” इंचि इत्तोर.
22 अस्के आ मनकलोर अगटाल सदोमतेके होनालय पेय्स्तुर. गानि अब्राहाम मात्रम सामिना मुन्नेन नित्तिसि मत्तोर. 23 अस्के अब्राहाम सामिना दग्गेरा होंचि, “निमे पापि लोकुल्कुनतोनि नितिमंतुल्कुनगुडा निजमे नासडेम कींतिना? 24 ओक्कला अद सहरते एबै मंदि नितिमंतुल्क मनानय्ते, आ सहरते मनना एबै मंदि नितिमंतुल्कुनाहाटीं आ जेगातुन नासडेम कियाकोंटा होळसिना? 25 पापिल्कुनतोनि नितिमंतुल्कुनगुडा नासडेम कियानय्ते, पापिल्क आनि नितिमंतुल्क इव्वुर्कगुडा उंदे सिक्सा आंता. गानि निमे नितिमंतुल्कुन तप्पाकोंटा कापाळंतिन. बारित्ते बूमिपोर्रो मनना अंटोरा सत्तेम न्यायम कियानोन निमेन गदा!” इंचि इत्तोर. 26 अस्के अब्राहामुन सामि, “सदोम सहरते नाकु ओक्कला एबै नितिमंतुल्क दोर्कानय्ते, ओराहाटीं नना आ पूरा जेगातुनंता नासडेम कियाकोंटा होळसींतन,” इंचि इत्तोर. 27 जवाबुने अब्राहाम, “हूळा! नना अय्ते बुळ्दि, दुब्बातसंटोरन आंदुन. अय्नागानि हिम्मत कीसि नीकुन सवाल पूसकीसंतन. 28 ओक्कला अगा एबै मंदि नितिमंतुल्कुनाल हेय्युर तक्को कीते, आ हेय्युराहाटीं पूरा सहरतुन नासडेम कींतिना?” इंचि पूसकीतोर. अस्के सामि, “नाकु अगा नल्पै हेय्युर नितिमंतुल्क दोर्किना नना अद सहरतुन नासडेम किय्योन,” इंचि इत्तोर. 29 मर्रा अब्राहाम, “ओक्कला नल्पै मंदि दोर्किना?” इत्तस्के, “आ नल्पै मंदिहाटीं नना अल्हा किय्योन,” इत्तोर. 30 अस्के अब्राहाम, “सामि, नना इंकुंदि मल्का पूसकींतन, ना पोर्रो होंग आयमा. ओक्कला अगा मुप्पै मंदि मनानय्ते?” इंचि इत्तस्के, “आ मुप्पै मंदिहाटीं नना अद सहरतुन नासडेम किय्योन,” इंचि सामि इत्तोर. 31 मर्रा अब्राहाम, “सामि केंजा! नना मरुंदि मल्का नितोनि वळ्कंतन. अगा ओक्कला इरवै मंदि नितिमंतुल्क दोर्कानय्ते?” इत्तस्के, “आ इरवैहाटीं नना आ जेगातुन नासडेम किय्योन,” इंचि सामि इत्तोर. 32 मर्रा अब्राहाम, “सामि नीकु होंग वायाकोंटे, आकिरते सिराप उंदि मल्का पूसकींतन. ओक्कला अगा पदि मंदि नितिमंतुल्क दोर्कानय्ते?” इत्तस्के सामि, “आ पदि मंदिहाटीं नना अद सहरतुन नासडेम किय्योन,” इत्तोर. 33 अब्राहामुनतोनि वळ्कामळ आतारित्ते, सामि अगटाल पेय्सि होत्तोर. आनि अब्राहाम ओना जेगाते ओर मल्सि होत्तोर.