कतना इद करारता सिन्हा आंद
17
1 अब्राम टोंबै तोम्मिद(99) वर्सानोर आतस्के सामि ओन्कु दर्सनम हीसि दर्सनमते, “नना वेल्लेन ताकतवार पेनदुन आंदुन, नावा मुन्ने निमे पापम कियाकोंटा ताकसेके मन. 2 आनि नना नीवा-नावा नड्डुम उंदि करार कींतन, इंका नीवा वंसम वेल्लेन बेर्सागोटंतन,” इंचि इत्तोर. 3 अस्के अब्राम बूमिपोर्रो बोकबोर्लें अर्सि दंडम तासतोर, पजा पेन ओनतोनि इल्हा वळ्कालय दल्गता: 4 हुळा! नना नीवातोनि करार कीतन, निमे वेल्लेन देसेल्कुना लोकुल्कुंक बाबाल आकिन. 5 इंदकेटाल नीवा पोर्रोल अब्राम आयो गानि अब्राहाम इंचि मनंता. बारित्ते, नना नीकुन वेल्लेन देसेल्कुना लोकुल्कुंक बाबाल कीतन. 6 नना नीकुन इरगा पलिंचानाल कींतन, कीसि निहेंदाल वेल्लेन जातिं तयार कींतन, नीवा वंसमताल राजालोर पुट्टानुर. 7 इंका पीळि-पीळिनाहाटीं नना नीवा-नावा नड्डुम आनि नीवा वंसमतोरा नड्डुम उंदि करार कींतन. नीवाहाटीं आनि नीवा पज्जोटाल वायना नीवा वंसमतोराहाटीं बस्केळ्क ननाने पेन मनंतन. इदे मीवाहाटीं नावा युगा-युगाल्कुना करार आंद. 8 इच्चोने आयका, निमे इंदके बद कनान देसेमते परायतोनलेह्का मंतिनो, आ पूरा कनान देसेम नीकु, नीवा पज्जो नीवा वंसमतोर्कुगुडा हींतन आनि युगा-युगाल्कुनदाका अद ओरदे मनंता. इंका नना ओरा पेन आसि मनंतन.”9 इंका पेन अब्राहामुनतोनि इल्हा वळ्कालय दल्गता: “निमे अय्ते नावा करार परकारम ताकापींता. अल्हेन नीवा पज्जोटाल वायना नीवा वंसमतोर ओरा पीळि-पीळिनदाका नावा करारतुन पीसि ताकाना. 10 नीवा-नावा नड्डुम आनि नीवा पज्जोटाल वायना नीवा वंसमतोर पीसि ताकाना करार बतल इत्ते, मीवा हरेक मांड्साता कतना तप्पकोंटा किये पींता. 11 कतना aकीते, अद नीवा-नावा नड्डुम आता करारता चिन्ह आंद. 12 पीळि-पीळिनाल नीवा लोते पुट्ता मांड्सा पेडाना कतना एनमिदो रोजुननाड कियाना. ओर मीवा लोते पुट्तोर आयि, हिलाकोंटे कोत्तां हीसि अस्सि तत्ता परायतोरा पेडल आयि, अल्हेन कतना किय्ये पींता. 13 नीवा लोते पुटतोनद आनि कोत्तां हीसि अस्तोनद इव्वुरदगुडा तप्पकोंटा कतना किया पींता. इल्हा नावा करार नीवा मेंदुल्ते बस्केळ्ताहाटीं चिन्ह आसि मनंता. 14 बोर मांडसा मनकल अय्ते कतना कियाकोंटा मनंतोरो, आ मनकन ओना लोकुल्कुनाल पेच्हागोम. ओर नावा करारतुन नेम्हातोर.” 15 इंका पेन अब्राहामुनतोनि इल्हा वळ्कता: “नीवा मुत्तो साराय, दान निमे साराय इंचि केयमा, बारित्ते इंदकेटाल दाना पोर्रोल साराल आंद. 16 नना दान्कु आसिर्वादम हींतन, हीसि दानहेंदाल नना नीकु वरोर मर्रिन हींतन, आनि दानकु नना इल्हा आसिर्वादम हींतन गदा, अद वेरे-वेरे देसेल्कुना लोकुल्कुंक तल्लुर आयार, अचोने आयका, दानाहेंदाल पुटतोरे वेरे-वेरे लोकुल्कुना राजालोर आयनुर. 17 अस्के अब्राहाम बोकबोर्लें अर्सि मुसा-मूसा कव्सेके ओनद ओरे, “नुरु वर्साना मातरंकु पिलाल्क आंतुरा? इंका टोम्बै वर्साना साराल पिलाल्क कनंतना!” इंचि ओना मनसुने इत्तोर. 18 अस्के अब्राहाम पेनदुन, “सरे! इस्माएल नीवा नदरते मत्ते अचोने सालू,” इंचि विनंति कीतोर. 19 अस्के पेन, “हिल्ले, नीवा मुत्तो साराल नीवाहाटीं मर्रिन कनंता आनि ओन्कु निमे इसाक इंचि पोर्रोल दोस्सा. नना ओनतोनि युगा-युगाल्कुना दाकाता करार कींतन, अद करार ओन्कु आनि ओना वंसमतोराहाटीं पीळि-पीळिनदाका मन्नार. 20 इस्माएलना बारेमतेगुडा नना नीवा विनंतितुन केंजतन. केंजा, ओन्कु नना आसिर्वादम हींतन, हीसि ओना वंसमतुन वेल्लेन बेर्सागोटंतन. ओर पन्नेंड राजालोरा बाबो आंतोर, आनि नना ओने पेद्दे देसेम तयार कींतन. 21 गानि वायना वर्साते इनकुत्ता टाइमुंक साराल कनना, इसाकुनतोने नना नावा करारतुन कींतन,” इंचि वेहता. 22 पेन अब्राहामुनतोनि वळ्कामळ महाचि ओनागटाल होत्ता.
23 पजा अब्राहाम ओना मर्रि इस्माएलुन आनि ओना लोते पुट्ता ओना अंटोर दासुल्कुन इंका कोत्तां हीसि अस्कुत्ता अंटोर मांड्सातुन जमा कीसि, पेन ओन्कु वेहताप अदे रोजु अंटोरा कतना कीतोर. 24 अब्राहामुना कतना आतस्के ओन्कु टोम्बै तोम्मिद(99) वर्सां मत्तां. 25 आनि ओना मर्रि इस्माइलना उळकानगटा कोस्सा तोलुन कोय्सि कतना कीतस्के ओर पदामुड वर्सानोर मत्तोर. 26 इल्हा अब्राहाम आनि ओना मर्रि इस्माइलना कतना उंदे रोज आता. 27 ओरतोनि ओना लोते मत्ता अंटोर मांड्सा, ओना लोते पुट्ता ओना अंटोर दासुल्क इंका कोत्तां हीसि वेरे देसेमताल अस्कुंचि तत्ता अंटोर मांड्सा इल्हा अंटोरा कतना आता.