हागार आनि इस्माएल
16
1 अब्रामुना मुत्तो सारायंकु पिलाल्क आया हिल्लुर. सारायंकु उंदि दासोतड मत्ता, दान पोर्रोल हागर. अद मिसर देसेमतद आंद. 2 अय्ते साराय अब्रामुन, “हुळा! सामि अय्ते नाकुन पिलाल्क कनाकोंटा कीतोर. निमे नावा दासिनगा होन, दानहेंदाल अय्ना नावा कुटुंब तयार आयार,” इंचि इत्ता. अस्के अब्राम सारायना पोल्ले केंजतोर. 3 इल्हा साराय मिसर देसेमता दाना दासि हागरुन, दाना मुय्दो अब्रामुंक मुत्तो कीकुन इंचि अप्पाजेप्ता. इदंता, अब्राम कनान देसेमते वासि पदि वर्सां मत्ता पज्जो जर्गतद आंद. 4 अब्राम हागारनगा होत्तस्के अद नेला तप्ता. नेला तप्ता इंचि तेळियतस्केटाल हागर दाना मालकिन सारायन सिन्ना नदरते हूळालय दल्गता. 5 अस्के साराय अब्रामुन, “नाकु जर्गता अपमानम, नीकु जर्गि. नावा दासिन नीकु नना नितोनि मींडालय हीतन. इंदके नेला तप्ता इंचि तेळियतस्केटाल अद नाकु सिन्ने नदरते हूळसंता. मना इव्वुरा न्यायम सामिए किय्यिर,” इंचि इत्ता. 6 गानि अब्राम, “हुळा! नीवा दासि नीवा कय हिळु मंता. नीकु बल्हा बेस अनपिच्ते अल्हा निमे दानतोनि कीम,” इंचि सारायन इत्तोर. अस्के साराय हागरुन बादा कियालय दल्गता, अय्ते हागर दानागटाल पेय्सि वित्ता.7 आनि हागर केडाते, सूर इनना एरियाकु होनना हर्दे मनना उंदि एता ऊटातगा मत्ता. अस्के सामिना उंदि दूताकु अद दोर्कता. 8 हूळसि, “ ए हागर, सारायना दासि, निमे बगाटाल वातिन आनि बेके होंचंतिन?” इंचि आ दूता पूसकीता. अस्के हागर, “नना नावा मालकिन सारायनगटाल पेय्सि विच्चंतन,” इंचि जवाब हीता. 9 अस्के सामिना आ दूता, “निमे नीवा मालकिननगा मल्सि होन. होंचि अद वेहताप केंजा. 10 इंका नीवा वंसमतुन इच्चोन वेल्ले बेर्सागोटंतन गदा, दान बोरे लेक्का दोस्सा पर्रुर. 11 हुळा! निमे इंदके पीटे मंतिन, मर्रिन कनंतिन. निमे ओना पोर्रोल इस्माएल इर्रा. बारित्ते सामि नीवा अळमळतुन केंजतोर.a 12 ओर केडा गाडदितसंटोर आयानुर, ओना कय अंटोरा विरोदमते तेदार आनि अंटोरा कय ओना विरोदमते तेदार. इंका ओर ओना अंटोर जीवातोरा विरोदमते तेदानुर,” इंचि हागरुंक वेहता. 13 अस्के हागर, दानतोनि वळ्कता सामिंक, “निमे हूळना पेनदुनb” इंचि पोर्रोल दोसता. बारित्ते, “नाकुन हूळता पेनदुन नना निजमे हूळतना!” इंचि अद इत्ता. 14 अदुनहाटीं अगाटा कुहिकु “बीर-लहय-रोई” इंचि पोर्रोल अर्ता. इद कुहि, कादेस आनि बेरेद इनना सहरकुना नड्डुम मंता. 15 इल्हा हागर अब्रामुंकु वरोर मर्रिन कंता. अब्राम, हागर कंता ओना मर्रिंकु इस्माएल इंचि पोर्रोल इर्तोर. 16 हागर अब्रामनाहेंदाल इस्माएलुन कंतास्के, अब्राम एनबै हारूं(86) वर्सानोर मत्तोर.