पेनू अब्रामुनतोनि करार किंता
15
1 इव पोल्लेंअंता आसोत्तंका, पेन अब्रामुंक दर्सन हीसि, “अब्राम निमे वेरियमा, नना नीकु डालुनलेह्का मंतन. नीवाहाटीं वेल्लेन पेद्दा पलम मंता,” इंचि इत्ता. 2 अस्के अब्राम, “हे सामि, पेनबाबा! निमे नाकु बतल हीसि अयना बता पायदा? नाकु अय्ते पिलाल्के हिल्लुर. आनि नावा लोता वारसत्वमहाटी दमिस्क सहरता एलियाजर मंतोर,” इंचि पेनदुन इत्तोर. 3 अब्राम मर्रा, “हुळा! निमे अय्ते नाकु संतानम हिया हिल्लिन. आनि नावा लोते पुटता वरोर दासुना मर्रि नावा वारसदार आयानुर,” इंचि इत्तोर. 4 अस्के सामि, “आ मनकल नीवा वारसदार आयोर. नीवा सतता मर्रे नीवा वारसदार आंतोर,” इंचि अब्रामुन इत्तोर. 5 पजा सामि अब्रामुन पलाते पीसि वासि, “ आ मब्बुनेके हूळा, आ सुक्कन निमे लेक्का परानय्ते लेक्का. अल्हे नीवा वंसमगुडा बोरे लेक्का पर्रुर, अच्चोर आयार,” इंचि इत्तोर. 6 अब्राम सामिनपोर्रो विस्वासम इरतोर. आनि सामि ओना विस्वासमतुन उंदि निति कबळता लेक्काते इरतोर. 7 पजा सामि अब्रामुन, “इद बूमितुन नीकु हियनाहाटीं, कसदि लोकुल्कुना ऊर सहरताल नीकुन पीसि वाता सामिन ननाने आंदुन,” इंचि इत्तोर. 8 गानि अब्राम मात्रम, “हे सामि, पेनबाबा, इद बूमि नावद आयार, इंचि नाकु बल्हा तेळियार?” इंचि इत्तोर. 9 अस्के पेन, “मूळ वर्सानद उंदि पड्डा पेय्या, मूळ वर्सानद उंदि एटी पोरि, मूळ वर्सानद उंदि गोर्रे पोतू, उंदि गुव्वा, उंदि पावरेम पीसि नहगा वा,” इंचि अब्रामुन इत्ता. 10 अस्के अब्राम अव अन्निटवुन पीसि वातोर. वासि उंद-उंदान रोंडु-रोंडु तुकडें कीसि, आ तुंकडन उंदान मुन्ने उंदि इल्हा इरतोर. गानि पिट्टेन मात्रम रोंडु तुकडें किया हिल्लोर. 11 उंदि गद्दल आ कोय्सि इरता हव्विन तिनालय वाता अय्ते, अब्राम अदुन तेह्चि गेदिमसीतोर.12 पोळ्द होनना वेला आतास्के अब्रामुंकु इरगा निद्रा वाता. आनि अस्के हुळा! पेद्दे हिर्रु हीकट ओन मुच्का होत्ता. 13 अस्के यहोवा अब्रामुनतोनि, “निमे उंदि पोल्ले तेल्पिच्कुन, नीवा वंसमतोर पराय देसेमते होंचि परायतोर आसि मनांतुर, अगा आ देसेमतोर नीवा वंसमतोर्कुन दासुल्क कीसि नालूं नुह्कुना(400) वर्सनदाका दुक्कमते इर्रानुर. 14 अल्हा दासुल्क कीसि इरता जातिना न्यायम कीसि ओर्क नना सिक्सा हीकन. अदंता आतंका नीवा वंसमतोर वेल्लेन संपत्तितुन पीसि, अगटाल पलाते अर्रानुर. 15 निमे अय्ते सांतिते नीवा ताता-मुत्ताल्कुनगा दाकिन. निमे वेल्लेन मातरल आतस्के नीकु हामुर वासि नीकुन बोंदा तासमळ जर्गंता. 16 नीवा वंसमताल नालूंगो पीळितोर मर्रा इद बूमिते वायानुर. बारित्ते अदवेरका अमोरि लोकुल्कुना पापाल्क सिक्सा दोर्कनालायक पुरागा आया हिल्लें.
17 पोळ्द होंचि हीकट आतास्के बतल आता इत्ते, कोय्सि मत्ता जिवरासिना हव्विना तुकडाना नड्डुमताल, बगा-बगा पोत्सेके, पोया होळ्सेके उंदि कूटेल अगटाल होत्ता. 18 अदे रोजु सामि अब्रामुनतोनि उंदि करार कीतोर. कीसि, “मिसर देसेमते मनना बेरेडतगटाल अय्ते, युप्राटिस इनना पेद्दा बेरेडदाका बच्चुंग अय्ते देसेल्क मंतांगो, 19 इत्ते केनिनुल्कुना देसेम, कनिज्जियुल्क, कदमोनिल्क, 20 हित्तियुल्क, पेरिज्जियुल्क, रेपाइमिल्क, 21 अमोरियुल्क, कनानियुल्क, गिर्गासियुल्क आनि येबुसियुल्क इनना जातिता लोकुल्क मनना देसेल्क नीवा वंसमतोर्क हीतन,” इंचि इत्तोर.