अब्राम लोतून कापाळांतोर
14
1 अव रोजकुने सिनार देसेम पोर्रो अम्रापेल राजाल, एल्लासार एरियापोर्रो अर्योक राजाल, एलाम एरियापोर्रो कदोर्ला ओमेर राजाल आनि गोयिम एरियापोर्रो तिदाल इनना राजाल राज्येम एलसेके मत्तोर. 2 ई राजालोर सदोम सहरता बेरा राजाल, गमोरा सहरता बिर्सा राजाल, अदमा एरियाता सिनाब राजाल, सबोयिम एरियाता सेमेबेर राजाल आनि बेला इत्ते सोअर एरियाता राजालोरतोनि लडाइ कीतुर. 3 ईर अंटोर राजालोर ओरा सिपाइल्कुन पीसि सिद्दिम इनना लोद्दि जेगाते कलियतुर. (सिद्दिम इत्ते होव्वोर समुद्रम.) 4 ई राजालोर पन्नेंड वर्सनदाका कदोर्ला ओमेर इनना राजाना सेवा कीसेके मत्तुर गानि पदामुडोव वर्साते ओना विरोदमते मर्लाबळतुर. 5 अदुनहाटीं पडनालूंगो वर्साते, कदोर्ला ओमेर राजाल ओना बाजुने मत्ता राजालोरतोनि कलियसि अस्टरोत-करनइम इनना एरियाते मनना रेपायिम लोकुल्कुनतोनि, हाम इनना एरियाते मनना जुजिम लोकुल्कुनतोनि, सावे किरियाताइम इनना एरियाते मनना एमिम लोकुल्कुनतोनि लडाइ कीसि ओर्कुन ओळिस्तोर. 6 ईरकुने आयका होरी इनना लोकुल्कुनगुडा ओरा सेईर गुट्टाने ओळिच्चि, केडाकु दग्गेरा मनना एल-पारान इनना एरियादाका गेदमिसीतुर. 7 पजा अगटाल मल्सि एन-मिस्पात इनना जेगाते होत्तुर (इदुन कादेसगुडा इंतुर.). अगा होंचि अमालेकि इनना अंटोर लोकुल्कुन ओळिस्तुर, हससोन-तामार इनना जेगाते मनना अमोरी लोकुल्कुनगुडा ओळिस्तुर. 8 अस्के सादोमता राजाल, गमोराता राजाल, अदमाता राजाल, सबोयिमता राजाल आनि बेला इते सोअरता राजाल. ईर अंटोर उंदासि, पगातोरतोनि लडाइ कियालय सिद्दिम लोद्दितगा होत्तुर. 9 ई हेय्युर राजालोरा लडाइ, एलामता कदोर्ला ओमेर राजाल, गोयिमता तिदाल राजाल, सिनारता अम्रापेल राजाल आनि एल्लासारता अर्योकल ई नालुर राजालोरतोनि आता. 10 आनि सदोम, गमोराता राजालोर वित्तुर. आ सिद्दिम लोद्दिते मनना पोक्कां अंता डांबरतोनि निंडिस मत्तां. सगोम मंदि आ पोक्काने अरतुर, मिगुल्तोर बारे गुट्टनहेंके वित्तुर. 11 पजा ओरा पगातोर सदोम, गमोराते मत्ता संपत्तितुन, तिंडिता वस्तुकुन जमा कीकुत्तुर आनि ओरा हर्रि पीसि ओर होत्तुर. 12 अब्रामुना तम्मुना मर्रि लोतू सदोमतेन मनुंदुर. ओन, ओना संपत्तितुनगुडा पीसि होत्तुर.13 अस्के ओरा कय्दाल तप्पिच्कुत्ता वरोर मनकल, इब्रानि जातिता अब्रामुनगा होंचि जर्गतदंता वेहतोर. अब्राम, अमोरि जातिता माम्रे इनानोना मराकुनगा ओना डेरा वाटसि मनुंदुर. माम्रे, एस्कोल, अनेर ईर मुव्वुर तम्मुह्क-तादलोर आंदुर. ईर मुव्वुरगुडा अब्रामुनतोनि कलियसि वरोंक-वरोर सहायम कीकुनना इंचि कय कल्पीसि मत्तुर. 14 तम्मुना मर्रिन दोर्का पीसि ओतुर इंचि तेळियतस्के अब्राम, ओना लोन पुट्सि बेर्सि, लडाइ कियाना बेस टेरनिंग येतता ओना मूड नुह्कुना पद्देनमिदि मंदितुन पीकुंचि, दान इनना सहरदाका पगातोरा पज्जोने होत्तोर. 15 होंचि अगा ओना मनकलोर्कुन गँगुल्क-गँगुल्क कीसि, अदे नर्का ओरतोनि लडाइ कीसि ओर्कुन गेल्सतुर. गेल्सि ओर्कुन दमिस्क इनना नाटेना पडमटा दिक्कुनेके मनना होबा इनना सहरदाका गेदमिसोतुर. 16 पजा अब्राम पगातोर दोसकुंचि ओता अन्नि संपत्तितुन, ओना दादाना मर्रि लोतून, ओना संपत्तितुन आनि ओनतोनि मत्ता मुर्ताह्क-मांडसातुन अंटोर्कुन पीसि वातोर.
मेल्किसेदेक राजाल अब्रामुंक आसिर्वादम हींतोर
17 कदोर्ला ओमेर राजान आनि ओना दंटाता राजालोर्कुन गेल्सि तिरियसि वायनेंके, अब्रामुंक कलियनाहाटीं सदोमता राजाल, सावे लोद्दि इत्ते राजालोरा लोद्दि इनना जेगादाका होत्तोर. 18 ओरे आयका सालेम सहरता राजाल मेल्किसेदेकल हारीं आनि अंगुर पानकम पीसि अब्रामुंक कलियालय वातोर. ई मेल्किसेदेक, अन्निट्कन्ना पेद्दा पेनदा पेर्मल मत्तोर. 19 मेल्किसेदेक अब्रामुंकु आसिर्वादम हीसि, “अन्निट्कन्ना पेद्दा पेन, बद अय्ते स्वर्गमतुन आनि बूमितुन कीता, अद अब्रामुंक आसिर्वादम हिय्यि. 20 नीवा पगातोर्कुन नीवा कय्दुक अप्पाजेप्ता, आ अन्निट्कन्ना पेद्दा पेनकदुक दन्यवाद,” इंचि इत्तोर. पजा अब्राम बतल अय्ते गेल्सि तत्तोरो, अव्टेटा पदि हिस्सानाल उंदि हिस्सा मेल्किसेदेकुंक हीतोर. 21 अस्के सदोमता राजाल, “ई संपत्तितुनंता निमेन इर्कुन, पगातोरा कय्दाल इळबळिच्चि तत्ता नावा मनकलोर्कुन नाकु हीम,” इंचि अब्रामुन इत्तोर. 22-23 गानि अब्राम, “‘अब्रामुन ननाने सिरमंत कीतन,’ इंचि निमे वेह्कुना परंतिन, अदुनहाटीं नना निहागटाल सिन्ने दारम आयि, बूटुना नोंडे आयि, इंका निवद बदे आयि, नना इर्कुन्नोन इंचि, स्वर्गम आनि बूमितुन तयार कीता, अन्निट्कन्ना पेद्दा पेनदागा ओट्टु तिंचि मत्तन. 24 नना बतले येतोन. सिराप ई लेय्युर तित्ता तिंडितुने ओप्कुंतन. अल्हेने नातोनि वातोर्कुंक ओरा हिस्सा ओर्क हीम. अनेर, एस्कोल, आनि माम्रेनगुडा ओरा हिस्सा ओर्कुन येता हीम,” इंचि सदोमता राजांक जवाब हीतोर.