अब्राम कनान देसेम मल्सि वायमळ
13
1 अस्के अब्राम ओना संपत्तितुनंता पीकुंचि, ओना मुत्तो आनि लोतूनतोनि कलियसि मिसर देसेमताल नेगेब इनना जेगाते होत्तोर. 2 अद वेलाते अब्रामुनगा एटीं-गोर्रें, गोडकु-गोदाल्कु, एंडि-बंगाराल्क वेल्लेन मत्ताहेंका ओर सिरमंत मत्तोर. 3 पजा अब्राम नेगेबताल पेय्सि, मुन्ने बगाय्ते डेरा वाटसि मत्तोरो, अदे बेतेल आनि आय सहरता नड्डुम जेगाते वातोर. 4 इदे जेगाते अब्राम मोट्टा मोदाला बलि पीटम दोह्चि सामिंक आरादना कीसि मत्तोर. 5 अब्रामुनतोनि मत्ता लोतूनगागुडा एटीं-गोर्रें, गोडकु-गोदाल्कुना मंदां, दासि-दासुल्क आनि डेरां मत्तां. 6 ओर इव्वुर कलियसि संसारम कियनाहाटीं अद देसेमते जेगा हालाकोंटा आता. बारित्ते ओरगा वेल्लेन संपत्ति मत्ता. 7 अय्ते अब्रामना एंटी-गोडकु मेहानोर्कुंक आनि लोतूना एटीं-गोडकु मेहानोर्कुंक जगडाल्कु आसि मत्ता. अव रोजकुने अद जेगाते कनानि आनि परिज्जि लोकुल्क मनुंदुर. 8 अस्के अब्राम लोतून, “मनम अय्ते जीवा कलियसि मत्तोरमे आंदुम. अदुनहाटीं नीवा नावा नड्डुम आनि नीवा नावा मेहानोरा नड्डुम जगडाल्क आयामन्नि. 9 नीवा मुन्ने ई पूरा देसेम मंता. नहागटाल निमे वेरे आम. निमे ओक्कला डेमा बाजुंकु होननय्ते नना तिना बाजुंकु दांतन, निमे तिना बाजुंक होननय्ते नना डेमा बाजुंक दांतन,” इंचि इत्तोर. 10 अस्के लोतू तला तेह्चि योर्दन बेरेड पक्का पीसि मनना लोद्दिनेके नदर वाटतोर. ओन्कु अदंता एर पोंगसेक मत्ताप दिसता. (सामि सदोम, गमोरा सहरकुन नासडेम कियका मुन्ने, आ जेगांअंता सामिना बगिचालेह्का मनुंदु. इंका मिसर देसेमते सोअर इनना जेगातगा वातस्के दिस्सना एरियालेह्का दिस्सुंदु.) 11 अय्ते लोतू योर्दन बेरेटा पक्का पीसि मत्ता लोद्दिन पेरकुत्तोर आनि पोळ्द पेय्सें (तूर्पू) दिक्कुंकु होनालय दल्गतोर. इल्हा ओर इव्वुर वेरे-वेरे आतुर. 12 अब्राम अय्ते कनान देसेमतेन जेगा आतोर. गानि लोतू बारे आ लोद्दिं पीसि मत्ता सहरकुनाल सदोम इनना सहरता दग्गेरा डेरा वाटसि मनालय दल्गतोर. 13 सदोम सहरता लोकुल्क वेल्ले लंगाल्क मत्तुर, सामिना विरोदमते ओर वेल्लेन पेद्दा पापिर्क मत्तुर.14 लोतू अब्रामनगटाल वेरे आतंका, सामि अब्रामुन, “निमे निच्चि मत्ता जेगाताल उत्तेरा, दक्सेना, तूर्पू आनि पडमटा इल्हा नालूं मूलां तला तेह्चि हूळा. 15 बारित्ते नीकु दिस्सना जेगातुनंता युगा-युगाल्कुनाहाटीं नीकु, नीवा वंसमतोर्कु नना हींतन. 16 इच्चोने आयका, नीवा वंसमतोर्कुन बूमिपोर्रोटा दुब्बाता सिने-सिने लेक्का पर्रुवा कनाल्कुनलेह्का वेल्लेन कींतन. ओक्कला बोरन्ना बूमिपोर्रोटा दुब्बाता कनाल्कुन लेक्का परतेन, नीवा वंसमतोर्कुन लेक्का परनुर. 17 तेदा! तेद्सि, अड्डम-निल्वु, ई पूरा बूमिअंता वेलियसि हूळा, बारित्ते दीन नना नीकु हींतन. 18 अस्के अब्राम ओना डेरातुन कुल्हाचि, हेब्रोन सहरता दग्गेरा मनना मम्रे इनना पेद्दा मराकुना दग्गेरा होंचि मनालय दल्गतोर. अगा सामिनाहाटीं उंदि बलि पीटम दोहतोर.