अब्रामुन पेन केयमळ
12
1 पजा यहोवा अब्रामुंक, “निमे नीवा देसेमताल, नीवा जीवातोर्कुन नीवा बाना लोतुन होळसि, नना नीकु हुपिचना देसेमते होन. 2 नना नीवाहेंदाल उंदि पेद्दे जाति तयार कींतन, कीसि नीकु आसिर्वादम हीसि, नीवा पोर्रोलतुन पेद्दा कींतन. अस्के निमे आसिर्वादम हियानोन आकिन. 3 नीकु आसिर्वादम हियानोर्कुंक नना आसिर्वादम हींतन. नीकु सापनेम हियानोर्कुंक नना सापनेम हींतन. आनि निहेंदाल बूमि पोर्रोटां अन्नि जातिनोर्कु आसिर्वादम दोर्कार,” इंचि वेहतोर. 4 यहोवा वेहताप अब्राम पेय्सि होत्तोर. ओर होननेंके ओनतोनि लोतूगुडा होत्तोर. अब्राम हारान इनना सहरताल पेय्तस्के डेब्बै हेय्युं वर्सानोर मत्तोर. 5 अब्राम ओनतोनि ओना मुत्तो साराय, तम्मुना मर्रि लोतू, ओर संपलिस्ता संपत्ति, हारानते ओर दक्किच्कुत्ता मनकलोर्कुन पीकुंचि कनान देसेम होनालय पेय्सतोर आनि एवतोर. 6 एव्सि मुन्नेळ्क दाटसि होनंनेके अब्राम, सेकेम इनना सहरता मोरे इनना पेद्दा मरातगा एवतोर. अद कालमते अगा कनानि लोकुल्क मनुंदुर.7 अस्के यहोवा अब्रामुंकु दर्सन हीसि, “नीवा वंसमतोर्कु नना ई बूमि हींतन,” इंचि इत्तोर. अदुनहाटीं अब्राम ओन्कु दिसता सामिनाहाटीं अगा उंदि बलि पीटम दोह्तोर. 8 पजा अब्राम अगटाल पेय्सि बेतेल इनना सहरता तूर्पूनेके मनना गुट्टा दग्गेरा होंचि डेरा वाटकुत्तोर. अब्राम डेरा वाटता जेगाता पळमटा बाजूंक बेतेल सहर मत्ता. आनि तूर्पू बाजुंक आय इनना सहर मत्ता. अगागुडा अब्राम सामिनाहाटीं उंदि बलि पीटम दोह्चि सामिंक आरादना कीतोर. 9 इंका अब्राम अगटाल पेय्सि मुन्नेळ्क नेगेब इनना जेगातेके होंचेके मत्तोर.
अब्रामु मिसर देसेमते होनमळ
10 अस्के आ कनान देसेमते कर्वु आर्सि मत्ता. आ कर्वु वेल्लेन बेरस्सेके मत्ताहाटीं अब्राम कोन्नि रोजकुनाहाटीं मिसर देसेमते होत्तोर. 11 बस्के अय्ते ओर मिसर देसेम सर्दुनगा एव्तुर अस्के अब्राम, “हूळा! निमे अय्ते वेल्लेन सोक मत्ता मुर्ताटुन इंचि नाकु एर्के. 12 आनि मिसर देसेमता लोकुल्क नीकुन हूळतस्के, “इद ईना मुत्तोना!” इंचि इनानुर. पजा नाकुन अय्ते हव्कानुर गानि नीकुन जीवाते इर्रानुर. 13 अदुनहाटीं निमे ओर्क, नावा सेल्लेन आंदिन इंचि वेहा. अस्के नाकु निहेंदाल बेस जर्गंता, इंका निहेंदाले नावा जीवागुडा पिस्संता,” इंचि ओना मुत्तो सारायन इत्तोर. 14 अब्राम मिसर देसेमते होत्तस्के, अगाटा लोकुल्क ओना मुत्तो, सारायन हूळसि इरगा सोक मंता इत्तुर. 15 परोन इनानोना इच्चुर अदिकारिर्कगुडा दान हूळतुर. हूळसि ओर परोनुंक होंचि, “अद इरगा सोक मंता,” इंचि वेहतुर. अदुनहाटीं दान परोनना राजवाडाते ओतुर. 16 सारायनहेंका आ परोन अब्रामुन बेस हूळकुत्तोर. ओन्कु गोर्रें-एटीं, गोड्क-कोंदां, पोतु गाडदीं, दासुल्क, दासिह्कु, तल्लुर गाडदी आनि लोटापेटां दोर्कतां. 17 गानि परोन अब्रामुना मुत्तो सारायन ओनगा इरताहाटीं, यहोवा परोनुन, ओना लोतोर अंटोर्कुन पेद्दा-पेद्दा बिमार्कुने अराहचि वेल्लेन बादा-बादा कीता. 18 अदुनहाटीं परोन अब्रामुन केया वेह्चि, “निमे नाकु इल्हा बारि कीतिन? इद नीवा मुत्तो इंचि नाकु बारि वेहा हिल्लिन? 19 नीवा मुत्तोन नीवा हेलड इंचि बारि वेहतिन? नना दान नावा मुत्तो कीकुननाहाटीं दग्गेर कीकुत्तन. अय्ते इदे नीवा मुत्तो! इंदके दीन पीकुंचि होन,” इंचि इत्तोर. 20 परोन ओना मनकलोर्कुंक अब्रामुन सार्ला कियाना बारेमते आदेस हीतस्के, ओर अब्रामुन, ओना मुत्तोन आनि ओना अन्नि संपत्तितुन जमा कीसि सार्ला कीतुर.