वेर-वेरे बाषाना सुरुवात
11
1 अद कालमते बूमिपोर्रो उंदे बाषा,
वळ्कमड मत्ता.
2 आ लोकुल्क पोळद पेय्सनेके होनालय दल्गुतुर.
होनेंके-होनेंके ओर सिनार देसेमता,
उंदि बीडने आगिस अगाने जेगा पीतुर.
3 ‘तकट!
मनम इटकें कीकोम,’
इंचि वरोंक-वरोर इनकुतुर आनि इटकें कीसि बेस बोळस्तुर.
इटकें बोळसि,
लोह्कु दोहनाहाटीं बंडां दोसनगा इटकें आनि सुन्ना दोसनगा बारे डांबर दोसमड सुरु कीतुर.
4 अस्के लोकुल्क इत्तुर गदा,
‘दट,
मनाहेंका उंदि शहर दोहकोम आनि मब्बुंक एव्वानच्चोटा उंदि पेद्दा गोपुरम दोहकोम.
मनम इल्हा कियनाय्ते मनाकु पेद्दा पोर्रोल वांता.
इंका मनम सिल्लर-सिल्लर आसि पूरा बूमिपोर्रो पाइसि होनाकुंटा उंदे जेगाते मनांतोम,’
इत्तुर.
5 अस्के यहोवा पेन,
लोकुल्क दोहाना शहरतुन आनि गोपुरमतुन हूळालय बूमिपोर्रो रेय्सि वाता.
6 इंका ओर्कुन हुडसि यहोवा पेन,
“हुडाट!
ईर कियाना कबडगुडा उंदि आसि कीसेक मंतुर.
ईरा अंटुरद उंदे बाषा मंता.
इद अय्ते ओर कियाना कबाटा मोदोले आंद.
आनि बिराने इर बतल अय्ते कियालय दल्गुतुरो,
अदुन तप्पकोंटा किया परांतुर.
7 तकट,
मनोम हिळु रेय्सि ओर्क वरोन पोल्ले वरोंक तेडियाकुंटा बाषाते गडबड किकोम,”
इंचि इत्ता.
8 इल्हा यहोवा पेन लोकुल्कुन पूरा बूमिअंता बय्यर कीता.
अदुनहाटीं ओर अगा शहर दोहामड़ होळसितुर.
9 इदे जेगाते यहोवा पेन दुनियाता बाषातुन पूरा गडबड़ कीता.
आनि पेन लोकुल्कुन दुनियांता पैलांचता.
दानाहाटीं इद जेगाक बाबेल इंचि पोर्रोल अर्ता.
सेमुना संतानम
10 सेमुना संतानम इल्हा मंता:
कम्मुड वासि रोंडु वर्सां आसि होत्तारित्ते सेमु नूर वर्सानोर आतोर.
अस्के ओन्कु वरोर अर्पक्षदल इनना मर्रि पुटतोर.
11 अर्पक्षदल पुटतारित्ते सेम इंका हेयुं नुह्कुना वर्सां पिस्तोर.
आ तूकुल्कुने ओन्कु इंका मर्क-मियाह्कु आतुर.
12 अर्पक्षदल मुप्पै-हेयुं वर्सानोर आतास्के,
ओन्कु सेलाह इनना मर्रि पुटतोर.
13 सेलाहल पुटतारित्ते अर्पक्षदल इंका नालुं नुह्कुना मूंड वर्सां पिस्तोर.
आ तूकुल्कुने ओन्कु इंका मियाह्कु-मर्क आतुर.
14 पजा सेलाहल मुप्पै वर्सानोर आतास्के,
ओन्कु एबेरल इनना मर्रि पुटतोर.
15 एबेरल पुटतस्के सेलाहल इंका नालुं नुह्कुना मूंड वर्सां पिस्तोर.
आ तूकुल्कुने ओन्कु इंका मर्क-मियाह्कु आतुर.
16 एबेरल मुप्पै-नालुं वर्सानोर आतास्के,
ओन्कु पेलेग इनना मर्रि पुटतोर.
17 पेलेग पुटतस्के एबेरल इंका नालुं नुह्कुना मुप्पै वर्सां पिस्तोर.
आ तूकुल्कुने ओन्कु इंका मर्क-मियाह्कु पुटतुर.
18 पेलेग मुप्पै वर्सानोर आतास्के,
ओन्कु रेऊ इनना मर्रि पुटतोर.
19 रेऊ पुटतस्के पेलेग,
इंका रोंडु नुह्कुना तोम्मिद वर्सां पिस्तोर.
आ तूकुल्कुने ओन्कु इंका मर्क-मियाह्क पुटतुर.
20 रेऊ मुप्पै-रोंडु वर्सानोर आतास्के ओन्कु वरोर मर्रि पुटतोर.
ओन पोर्रोल सरुग.
21 सरुग पुटतस्के रेऊ रोंडु नुह्कुना एडूं वर्सां पिस्तोर.
आ तूकुल्कुने ओन्कु इंका मर्क-मियाह्कु पुटतुर.
22 सरुग मुप्पै वर्सानोर आतास्के,
ओन्कु नाहोर इनना मर्रि पुटतोर.
23 नाहोर पुटतारित्ते सरुग रोंडु नुह्कुना वर्सां पिस्तोर.
आ तूकुल्कुने ओन्कु इंका मर्क-मियाह्कु पुटतुर.
24 नाहोर इरवै तोम्मिद वर्सानोर आतास्के,
ओन्कु तेराह इनना मर्रि पुटतोर.
25 तेराहल पुटतारित्ते नाहोर नुटा-पंदोम्मिद वर्सां पिस्तोर.
आ तूकुल्कुने ओन्कु इंका मर्क-मियाह्कु पुटतुर.
26 तेराहांकु डेब्बै वर्साना लोप्पो अब्राम,
नाहोर आनि हारान इनना मर्क पुटतुर.
तेराहना संतानम
27 तेराहना संतानम इ परकारम मंता:
तेराहांकु अब्राम,
नाहोर आनि हारान ईर मर्क पुटतुर.
हारानुना मर्रिन पोर्रोल लोतू आंदु.
28 आनि हारान कसदिया देसेमता ओर पुटुता ऊर शहरते होंचि ओना बाबोकंन्ना मुनेन हासोत्तोर.
29 अब्राम आनि नाहोर इर इवुरु मरमीं आतुर.
अब्रामुना मुत्तोन पोर्रोल साराय,
आनि नाहोरुना मुत्तोन पोर्रोल मिल्का आंदु.
मिल्का इदु हारानुना मिय्यड आंदू.
हारान इरु मिल्काना आनि इस्काना बाल आंदुर.
30 साराय गोडमुरे मत्ताहेंका दान्कु मर्क-मियाह्कु आया हिल्लुर.
31 तेराहल ओना मर्रि अब्राम आनि ओना तंगमर्रि लोतू(हारानना मर्रि),
आनि ओना कोडियड़ साराय(अब्रामना मुत्तो).
इर्कुन अंटोर्कुन पीसि कसदियाता ऊर शहर होड्सिसि कनान देसेम होनालय पेय्सतोर.
गानि हारान पोर्रोलता देसेमते एव्सि अग्गेन मनालय दल्गतोर.
32 अस्के तेराहना वयम रोंडु नुह्कुना हेयुंग वर्सानोर आसि ओर हारान देसेमतेन हासोत्तोर.