साराना हामुर
23
1-2 साराल नूटा इरवै एडूं वर्सानद आतास्के, अद कनान देसेमता हेब्रोन इत्ते किर्यतर्बा इनना नाटे हासोत्ता. अय्ते अब्राहाम सारानाहाटीं वेल्लेन दुक्कमते अळतोर. 3 पजा अब्राहाम ओना मुत्तोना पिनगुनगटाल तेदसि, हित्ति जातिता लोकुरगा होत्तोर. होंचि ओर्कुन, 4 “नना मीवा नड्डुम वरोर परायतोन आनि पेय्सि वातोन आंदुन, आनि नावा मुत्तोन बोंदा तासालय नाकु इग्गे जेगा हिल्ले. अय्ते ना मुत्तोना गति कियनाहाटीं नाकु जेगा हीते नना नावा मुत्तोन बोंदा तासंतन,” इंचि इत्तोर. 5 अस्के हेत्ति लोकुल्क अब्राहामुन, 6 सायाबु मोमोट वेहानद केंजा, मावा नड्डुम निमे पेनदा पेद्दा मनकनलेसीं मंतिन. मावा बोंदाने नीकु बद नच्चुते अद बोंदाते निमे नीवा मुत्तोना गति किया परंतिन. मावाव्टेटाल बोरे ओना बोंदातगा निमे नीवा मुत्तोना गति कियनेंके बतल इन्नोर आनि नीकुन बोरे आपोर. 7 अस्के अब्राहाम तेदसि नित्तोर आनि अद देसेमता लोकुल्क, इत्ते हित्ति लोकुल्कुंक दंडम दोस्तोर. 8 दोस्सि ओर्कुन, “नना नावा मुत्तोना गति कियमळ मीकुगिंटा इस्टम आते, नना वेहनद केंजट, सोअर इनानोना मर्रि एप्रोन इनानोनगा होंचि विनंति कीम्टु गदा, 9 मकपेलातगटा ओना नेदा गेट्टुंक मंदना बोंदाकु बच्चोन दरा आंता अचोने कोत्तां मीवा अंटोर मुन्नेन तेंडकुंचि नाकु हिय्यिर,” इंचि इत्तोर. 10 अद वेलाते एप्रोनगुडा हित्ति लोकुल्कुनतोनि नाटेना दोराटंबाल्कुनगा उद्दिस मत्तोर. अदुनहाटीं ओना नाटेना लोप्पो होळियाना हित्ति लोकुल्कुंक केंजा वायनाल ओर अब्राहामुन, 11 मन्नि सायाब, नना वेहनद केंजा. आ नेदुन, आ नेदे मनना बोंदातुन नावा जातिता लोकुल्कुना मुन्ने नीकु हींतन. अगा पीनगुन बोंदा दोस्सा,” इंचि वेहतोर. 12 अस्के अब्राहाम आ देसेमता लोकुल्कुंक दंडम दोस्तोर. 13 आ देसेमता लोकुल्क केंजसेके मन्नेंकेन अब्राहाम एप्रोनुन, “गानि ओक्कला निमे इल्हा इनकुनानय्ते, नना इनानद केंजा, अद नेदा कोत्तां नना नीकु हींतन, ना कोत्तां येततेन नना नहगा मनना पीनगुन अगा गति कींतन,” इंचि इत्तोर. 14 अस्के जवाबुने एप्रोन, 15 “सायाबु, नना वेहानद केंजा. अद जेगाता दरा नालूं नुह्कुना एंडि रूपें मंता, नीवा नावा नड्डुम अल्हा बतल हिल्ले, निहगा मनना पीनगुना गति कीम,” इंचि अब्राहामुन इत्तोर. 16 अब्राहाम एप्रोनना पोल्लेतुन ओप्कुंचि, हित्ति लोकुल्क केंजनेंके अद नेदा दरा बच्चोन अय्ते वेहतोरो, अच्चूं एंडि रूपें जोकसि अब्राहाम एप्रोनुंक हीतोर. 17-18 इल्हा हित्ति लोकुल्क आनि अद नाटेना वेल्लेन लोकुल्कुना मुन्ने, एप्रोनुना नेलि, बद अय्ते, मम्म्रेता पोळ्द पेयसना बाजुंकु मनना मकपेलातगा मत्ता, अब्राहामुनद आता. आ नेलितोनि, अव्टे मत्ता बोंदा, नालूं मुलांक मत्ता मराकु, अन्निगुडा अब्राहामुनव आतां. 19 अद आतंका कनान देसेमता मकपेलातगटा नेदे मनना बोंदाते, अब्राहाम ओना मुत्तो साराना गति कीतोर. ई मकपेला इनना जेगा मम्रे इत्ते हेब्रोन इनना नाटुक दग्गेरा मत्ता. 20 इल्हा अद नेलि आनि अव्टे मनना बोंदा हित्ति लोकुल्कुनहेंदाल, हातोरा गति कियाना जेगाहाटीं अब्राहामुना कबजते वाता.