कम्मुड तेंडमड
8
1 गानि पेन नोहान इंका ओनतोनि डोंगाते मत्तव अन्नि केडा जिवरासीं आनि नाटेन जीवराशीन मति मर्गा हिल्ले.
आनि बूमिपोर्रो वडि लोहता,
अस्के एर तक्को आयालय सुरु आता.
2 आनि पेन लोतु समुद्रमता जलां आनि मब्बुना तल्पुक बंद कीता.
दानहेंदाल पिर्रु वायनद इंका आगता.
3 इल्हा नूटा एबै रोजकु आतारित्तेने बूमिपोर्रोटा एरू उंदेतीर इन्कुता.
4 आनि एडूंगों नेलाता पदीहेडुव रोजुन नाडु आ डोंगा उंदि अरारत पोर्रोलता गुट्टा कोस्सापोर्रो होंचि आगता.
5 इंगें ई एरू दगेर-दगेरा पदि नेलकुनदाका उंदेतीर इन्कसेक होत्ता.
इल्हा पदो नेलाता मोदाटा रोजून नाडु गुट्टना कोस्सां इचोर-इचोर दिसालय दल्गतां.
6 नल्पै रोजकु आता पजा नोहल ओर कीता डोंगाता किडकि तेंडतोर.
7 तेंडसि ओना डोंगाते मत्ता पिट्टेनाल,
काकाटुन पलाते होळ्सीतोर.
अय्ते आ काकाडु बूमिपोर्रोटा एर इनकनदाका होनुड-वायुड कीसेक मत्ता.
8 पजा नोहल,
ओनगटाल उंदि पावरेम पिट्टेतुन बूमि पोर्रोटाल एर इन्कुतनो इन्का हिल्लेनो जाळा कियालय पलाते होळसीतोर.
9 गानि अद पावरेम पिट्टे हेके-हीके तिरियता अद मल्सि नोहनगेन डोंगाते वाता.
बारित्ते बोत्तिगा एरे मत्ताहेंका दान्कु बगा उद्दालय जेगा दोर्का हिल्ले.
दानहाटीं वापस वातस्के नोहल दान कय हाहचि ओनगा डोंगाता लोप्पो एतकुत्तोर.
10 इंका एडूं रोजकु आगिसि आ पावरेम पिट्टेतुन इंकुंदि मल्का नोहल डोंगाताल पलाते होळ्सीतोर.
11 आ पावरेम पिट्टे नूल्पेट पोळ्दुंकु ओनगा तिरियिस वाता.
हुडा!
दाना तोडदे जैतुन मराता उंदि पच्चटा आकी नोहांक दिसता.
दान हूळसि नोहल,
‘ई बूमिपोर्रोटा एर इन्कुता,’
इंचि इन्कुत्तोर.
12 अस्के एडूं रोजकु आगिस पावरेम पिट्टेतुन मर्रा होडसितोर.
अय्ते अद मल्सि ओनेके वापस वाया हिल्ले.
13 नोहाना वयम हारुं नुह्कुना उंदि वर्सा आता.
अदे वर्साता मोदाटा नेलाता मोदट रोज बूमि पोर्रोटद एर पुरा वतिस होंचि मत्ता.
अय्ते नोहाल डोंगाता कप्पु तेंडिसि पलाते नदर वाटतोर.
अस्के ई बूमिपोर्रोटा एर पुरा बिक्सोत्ता इंचि ओन्कु दिसता.
14 इदे वर्साता रोंडोव नेलाता इरवय एडोव रोजुन नाडु बूमिपोर्रोटा एर पुरागा बिक्सोत्ता.
15 अस्के पेन नोहानतोन बतल वेहता इत्ते,
16 “निमे ई डोंगाताल नि मुत्तोन,
नि मर्कुन,
नि कोडयाह्कुन पीसि पलाते पेय्सि वा.
17 इंका नितोनि मत्ता पिट्टें,
जिवरासीं आनि अन्नि तीरकुना बेंगना जिवरासीं,
बव अय्ते जीवाते मंतंगों अवुन पीसि निमे पलाते वा.
अव ई बूमिपोर्रो वासि वेल्लेन पोरिह्क कीसि,
कंचि-पेंचि,
ई बूमिअंता निंडिस होनिंकंटी.”
18 अस्के डोंगाताल नोहल ओना मर्कुन,
मुत्तोन आनि कोडियाह्कुन पीसि पलातुक वातोर.
19 अन्नि जिवरासीं,
बेंगना जिवरासीं,
पिट्टें,
बव अय्ते जिवरासीं बूमिपोर्रो ताकुंदु-वेलियुंदु,
अव अन्नि जातिं-जातिने उंदान-पजो उंदि आ डोंगाताल पलातुक वातां.
20 अस्के नोहाल यहोवा पेंदाहाटी उंदि गद्दे तयार कीतोर.
मोक्कुंक ओज्जना अन्नि जिवरासींनाल आनि मोक्कुंक ओज्जना पिट्टेनाल,
इच्चूक जिवरासीं आनि इचुक पिट्टें तेंडतोर आनि मोक्कु हीसि गद्देपोर्रो बोळ्सतोर.
21 अस्के यहोवा पेन आ मोक्कुनाल बेसता गब्बु एतसि,
मनसुने इन्कुत्ता गदा,
‘मनकलोरहाटीं नना बस्केने बूमिक सापनेम हिय्योन.
बारित्ते मनकलोर्कुंक सिन्नास्केटाले ओरा मनसुने सेड्डा विचाराल्क वासेक मनंतां.
अय्नागानि इंदके बल्हा अन्नि जिवराशीन नासडेम कीतन अल्हा नना मर्रा बस्केन किय्योन.
22 इंदकेटाल बदवेरदाका अय्ते ई बूमि मंतनो,
अदवेरदाका ई बूमिपोर्रो एद्दुमड,
कोयमड,
पीनि-एद्दी इंका एंडाकालम,
पीनि कालम,
नर्का आनि पिय्यल बस्केळ्क आसेक होचेंकेन मनंता.’
इंचि इत्ता.