नोहानतोनि पेंदा करार
9
1 नोहन आनि ओना मर्कुन,
“कंचि-पेंचि,
पलिंचट आनि बूमितुन निहाट,”
इंचि पेन आशीर्वादम हीता.
2 “बूमिपोर्रोटा अन्नि जिवरासीं,
अन्नि परियाना पिट्टें,
बूमितुन पीसि बेंगना अन्नि जिवरासीं,
समुद्रमता अन्नि जिम्मां इवन्नि मीकु वेरियंतां आनि इवुन नना मीवा कय्दा हिळु अप्पजेपतन,”
इंचि ओर्क वेहता.
3 “मुन्नेटा कालमते आकिं-अल्लमकु मीकु तिनालेइ हीतन.
अल्हेने ताकानव-तिरियानव जिवरासीं मिवा तिंडि आयानुं.
इंदके इव अन्नि इंका मीकु हींतन.
4 नेत्तुर इत्तेने जीवा आंदु,
दानहाटीं मिमेट नेत्तुर्क नेत्तुरे हव्वीं तिनमटु.
5 ओक्कला बोरन्ना इंकावरोन हव्कानय्ते ओना हामुरता बदला नना तप्पाकोंटा एतांतन.
बदन्ना जिवरासि मनकन हव्कानय्ते ओना जीवाता बदला नना एतांतन.
बोरन्ना मनकल ओना पक्कातोन हव्कानय्ते ओना जीवाता बदला नना एतांतन.
6 “पेन दाना रुपमतेने मनकन तयार कीताहाटीं,
बोरय्ते मनकन हव्कीसि नेत्तुर पोंगागोट्टंतोर ओन इंका हव्कीसि ओना नेत्तुर पोंगागोट्टुमड़ जर्गंता.”
7 मिमेट मात्रम कंचि-पेंचि,
पलिंचि,
बूमिपोर्रो वेल्ले पिलाल्कुन कन्निस बूमितुन निहाटु,”
इंचि पेन इत्ता.
8 अस्के पेन नोहन आनि ओना मर्कुनतोनि इत्ता,
9 “हुडाट,
नना मीकु आनि मीवा पज्जो पुट्टना वंशमतोनि,
उंदि करार कींतन.
10 अल्हेन मितोनि मत्तव इत्ते डोंगाताल पलाते पेय्स्तव पिट्टें,
नाटेना जिवरासीं,
बूमिपोर्रोटा अन्नि तीरूकुना जिवरासीं इव अन्नि जिवरासींतोनि नना ना करार कीसेक मंतन.
11 आनि मीतोनि नना इद करार कींतन गदा,
अन्नि जिवरासीं एता कम्मुडतोनि बस्केन नासडेम आयों.
आनि बूमितुन नासडेम कियालय इंका बस्केन कम्मुड वायो.”
12 आनि पेन इत्ता,
“नना मीवातोनि आनि मीवातोनि मनना पूरा जिवराशीनतोनि युगा-युगाल्कुनहाटीं करार कींतन,
अद करारता निसान इदे आंदु:
13 नना मब्बुने नावा सिंगिडीतुन इरतन.
अद सिंगिडी इत्तेने नाकु आनि बूमिता नड्डुम करार कीता निसान आंद.
14 नना बस्के अय्ते बूमिपोर्रो मब्बु तेरपेन तर्रांतन,
अस्के मब्बुने सिंगिड दिस्सार.
15 अस्के मीतोनि आनि बूमिपोर्रोटा पूरा जिवराशीनतोनि कीता करारतुन मति कींतन.
आनि अन्नि जिवराशीन नासडेम कियानसोंटा कम्मुड बस्केन वायो।
16 बस्के अय्ते मब्बुने सिंगिड दिसंता,
दान हूळसि मीतोनि आनि बूमिपोर्रोटा अन्नि जीवाते मत्तव जिवराशीनतोनि नना कीता युगा-युगाल्कुना करार नाकु मति वांता.
17 आ सिंगिडी इत्ते नावा आनि मीवा इंका बूमिपोर्रोटा अन्नि जीवा मत्तव जिवराशीनतोनि करार आता निसान आंद,”
इंचि पेन नोहन इत्ता.
नोहाल आनि ओना मर्क
18 नोहाना मर्क सेम,
हाम,
यापेत डोंगाताल पलाते वातुर.
हामुना मर्रि कनान.
19 इरे नोहना मुव्वुर मर्क.
ईरा वंशमताल पुटता लोकुल्के बूमि पोर्रोटुर अंटुर आंदुर.
20 अस्के नोहल कास्तकरी कियुंदुर.
ओर उंदि अंगुर बगिचा कीतोर.
21 उंदि रोज नोहाल अंगुर पंडीना कल्लु उंचि ओना डेराते कुळकेंगे केलीं हिलाकुंटा अर्सि मत्तोर.
22 नोहाना सिना मर्रि इत्ते कनानुना बाबल हाम इनानोर ओन हूळतोर.
पलाते होंचि बाल कुळकें मंतोर इंचि ओना दादालोर्कुंक वेहतोर.
23 अस्के सेम आनि यापेत उंदि कपडी ओरा हट्टा पोर्रो वाटकुंचि,
पजोळ्क-पजोळ्क होंचि ओरा बाबाना बरमेंदुलतुन मुचतुर.
ओर पजोळ्क-पजोळ्क होत्ताहाटीं ओरा बाबल कुळकें मत्तद हूळा हिल्लुर.
24 नोहाना रिम्मा रेय्सि तेल्वि अर्तास्के,
ओना सिना मर्रि हाम ओनतोनि बतल कीतोर अद तेडियता.
25 दानहाटीं नोहल इत्तोर,
“कनानुंक सापनेम दल्गंता.
ओना दादालोरा दासुल्कुनाल अंटोरकन्ना सिन्ना दासुड आंतोर.”
26 मर्रा नोहाल इल्हा इंका इत्तोर,
“सेमुना यहोवा पेंन्दुक स्तूतुल्कु!
कनान ओना दासुड आयिर.
27 पेन यापेतुंक वेल्लेन बूमि-जेगा हींता.
इंका यापेत सेमुना डेराते मनांतोर.
कनान ओना दास आयिर.”