नल्पै रोजकुना पेद्दा कम्मुड़
7
1 यहोवा पेन नोहन इत्ता गदा,
“ई पीडिता लोकुल्कुने केवलम निमे वरोने सत्तेमंतुड ना नदरते दिसेके मंतिन.
दानहाटीं निमे नि लोतोर्कुन अंटोर्कुन पीसि डोंगाते एक्का.
2 निमे मोक्कुंक ओज्जना जिवरासिनाल एडुं-एडुं जोडीं तल्लुह्कु-पोतुकु आनि मोक्कुंक ओज्जुवा जिवरासींनाल रोंडु-रोंडु तल्लुह्कु-पोतुकु पीसि होन.
3 अन्नि तीरकुना पिट्टेनाल एडुं पोतु पिट्टें आनि एडुं तल्लुर पिट्टें पीसि होन.
इवुनहेंदाल बूमिपोर्रो अवुना विज्जा नित्तार.
4 इयाटाल एडुं रोजुक आतारिते नल्पै रोजकु (नर्का-पिय्यल) पोदंदाका-पल्हीनाल उंदेतीर पेद्दा पिर्रु वायागोटंतन.
आनि नना बूमिपोर्रो कीता जीवा मत्तव अन्निन नाशडेम कींतन,”
इंचि यहोवा पेन वेहता.
5 अस्के नोहल पेन हीता हुकुम परकारमे अन्नि कीतोर.
6 बूमिपोर्रो पेद्दा कम्मुड वातस्के नोहल हारुं नुह्कुना वर्सानोर मत्तोर.
7 आ कम्मुटा एताल पिसालय नोहल ओना मर्कुन,
मुत्तोन आनि कोडयाह्कुन पीसि डोंगाते एकतोर.
8 बूमि पोर्रोटां ओज्जना जिवरासीं,
ओज्जुवा जिवरासीं,
पिट्टें आनि बूमितुन पीसि बेंगानव अन्नि जीव जंतुल्कु
9 अव जोडीं जोडीनतोनि पोतु-तल्लुर इल्हा नोहांक पेन हीता हुकुम परकारम डोंगाते होत्तां.
10 एडूं रोजकु आतारित्ते कम्मुटा एर बूमिपोर्रो उंदेतीर वायमड सुरु आता.
11 नोहाल हारुं नुह्कुना वर्सानोर पुटतोर अस्के,
रेंडोव नेलाता पदहेडवो रोजुननाड लोतु समुद्रमता जलां अंता पेय्तां आनि मब्बुंक बोंगां अरताप पिर्रु वायलय दल्गुता.
12 आनि नल्पै रोजकु नर्का-पिय्यल बूमिपोर्रो उंदितिर पिर्रू वासेक मत्ता.
13 अदे रोजुने नोहल,
ओना मर्क सेम,
हाम,
यापेत आनि ओना मुत्तो,
मूडु कोडियाह्कु अंटुर डोंगाते होळियतुर.
14 ओरतोनि उंदि-उंदि जातिता केडा जिवरासीं,
उंदि-उंदि जातिता नाटेन जिवरासीं,
उंदि-उंदि जातिता बूमितुन पीसि बेंगना जिवरासीं,
उंदि-उंदि जातिता पिट्टें आनि उंदि-उंदि जातिता परियना पुडकु इव अन्नि डोंगाते होत्तां.
15 जीवा मत्तव अन्नि जातिना जिवरासिनाल पोतु-तल्लुर इल्हा जोडीं जोडीने नोहनतोनि डोंगाते होत्तां.
16 नोहांक पेन हीता हुकुम परकारम अन्नि जिवरासींनाल उंद-उंदि पोत-तल्लुर जिवरासीं डोंगाता लोप्पो होडियतां.
अस्के यहोवा पेन आ डोंगाता तल्पु पलाताल वाटता.
17 अस्के बूमिपोर्रो नल्पै रोजकुनदाका उंदेतीर पिर वासेक मत्ता.
आ पिर्रू इचोन वाता गदा,
एर बेरसि डोंगातुन बूमिताल पोर्रोड्क तेहता.
18 एर बेरसता कमाना एर बूमिपोर्रो वेल्लेन निंडता आनि आ डोंगा बूमि पोर्रोटाल एतपोर्रो तेलसेके होंचेक मत्ता.
19 बूमिपोर्रो एर इच्चोर बेरसता गदा,
मब्बुन हिळता अन्नि एत-एत्तु गुट्टां इंका मुडुगिस होत्तां.
20 इल्हा अन्नि गुट्टांकन्ना एत्तु गुट्टाना पोर्रोटाल पदहेन कुटाना एत्तुनाल एर मत्ता.
21 इल्हा बूमिपोर्रोटा पिट्टें,
नाटेना जिवरासीं,
केडा जिवरासीं,
बूमितुन पीसि बेंगानव जिवरासीं आनि बूमिपोर्रो बव अय्ते निंडिस मत्तां अव अन्नि आनि मनकलोर इंका हासोत्तुर.
22 इंका बूमिपोर्रो जीवा मत्तव अन्नि हातां.
23 इल्हा बूमिपोर्रोटा अन्नि जिवरासीं नासडेम आतां.
मनकलोर,
जिवरासीं,
बेंगना जिवरासीं,
मब्बुने परियाना पिट्टें आनि बव अय्ते बूमिपोर्रो मत्तंगो अन्नि नासडेम आतां.
गानि सिराप नोहल,
ओना परिवार आनि बच्चुं जिवरासिं ओनतोनि डोंगाते एकतंगो अव अन्नि पिसतां.
24 आ कम्मुटा एर नूटा एबै रोजकुनदाका बूमितुन मुडाहचि इरता.