मनकलोरा जेस्टातनाल्कु
6
1 बूमिपोर्रो जनम वेल्लेन बेर्सालय दल्गुता.
अव्टेने ओर्क मियाह्क आतां.
2 पेंदा मर्कुनाa नदर ई मनकलोरा मियाह्कुन पोर्रो अर्ता.
बारित्ते अव दिसालय सुंदर मत्तां.
अदुनहाटीं ओर्क मनसुंक बव अय्ते वातांगों,
अवुन ओर मुत्तोह्क कीकुत्तुर.
3 इदु हूळसि पेन इन्कुत्ता गदा,
“इंगें इंदकेटाल ना आत्मातुन ई लोकुल्कुने बस्केळ्क मना हिय्योन.
बारित्ते ई मनकल केवलम उंदि मेंदुले आंद.
अय्नागानि इनकु एक्कोते एक्को नना नूटा इरवै वर्सानादाका वय्सु हींतन,”
इंचि इन्कुत्ता.
4 अवे तूकुल्कुने बूमिपोर्रो नेपिलीम्कुb मनुंदुर.
पजा ई पेंदा मर्क,
आ मनकलोरा मियाह्कुनगा मींडतस्के अव नेलां तप्पिसी अवुगुडा मर्क-मियाह्कुन कनलय दल्गुतां.
ई मर्क-मियाह्कगुडा मरि शूरवीरुल्कु आतुर.
लडाई कियानव्टे हुशार मनकलोर आतुर.
आनि ओर बागा पोर्रोल होत्तोर,
ओरा लडाईं कियाना ताकति इदवेरदाकागुडा बागा मंदिक एर्के.
5 बूमिपोर्रो मनकलोरा सेड्डातनाल्क बागा बेर्सि होत्तां.
ओरा मनसुनाल बव अय्ते विचाराल्क पलाते अर्रांतंगो अव बस्केळ्क सेड्डाये मत्तां,
इदंता यहोवा पेन परमेर्का कीसि हूळता.
6 यहोवा पेन ई बूमिपोर्रो मनकन पुटिस्तादान्कु बागा पस्चातापम कीता.
आनि दाना मनसुने बागा दुखम वाता.
7 अस्के यहोवा पेन मनसुने विचारम कीता गदा,
“नना ई मनकन बोन अय्ते ई बूमिपोर्रो पुटिस्तनो ओन ई बूमि पोर्रोटाल सर्वानाशडेम कींतन.
अचोने आयका मनकलोर्कुनतोनि जिवरासीं,
बेंगना जिवरासीं इंका परियाना पिट्टें इव अन्निटवुन नाशडेम कींतन.
बारित्ते बूमिपोर्रो इवुन पुटिस्तादान्कु नाकु बागा पश्चातापम आसंता.”
इंचि इत्ता.
8 गानि नोहान पोर्रो यहोवा पेंदा दया मत्ता.
नोहाल डोंगा दोहांतोर
9 नोहान वंशम ई परकारम मंता:
अस्केटा पीडिता लोकुल्कुने ओर वरोर नितीमंतुड आनि सत्तेमंतुड मत्तोर.
अचोने आयका ओर पेंदतोन ताकुंदुर.
10 ओन्कु सेम,
हाम आनि यापेत इनना पोर्रोलतोर मुव्वुर मर्क मत्तुर.
11 पेन बस्के अय्ते बूमितेके हूळतनो अस्के बूलोकम पुरागा कराब कबाह्कुने आनि जुलुमते निंडिस मत्ता.
12 अचोने आय्का ई बूमिपोर्रो मनना प्रति जिवराशी,
मनकल ओरा पिस्वरतुन पूरा कराब कीसि पोस्ताप,
पेन्दुक दिसता.
13 अस्के पेन नोहनतोनि इल्हा वळ्कता गदा,
“ई बूमिपोर्रोटा अन्नि जिवरासिन हव्कना विचारम ना मनसुने वाता.
बारित्ते ई जिवरासींन हेंदाले ई बूमिपोर्रो जुलुम वाता.
हुडाट!
बूमितोटि अवुन अंटावुन इंका नासडेम कींतन.
14 इवुनतोनि निमेगुडा नाशडेम आयामन्नि इंचि निमे मिवाहाटीं गोपेर जातिता मराता उंदि पेद्दा डोंगाc तयार कीकुन.
अंटे वेरे-वेरे अर्रां कीसि,
लोप्पोटाल-पलाताल बोत्तिगा डांबर मेत्ता.
15 आ डोंगातुन निमे इल्हा तयार कीम गदा,
दाना पोडगु मूड नुह्कुना कूटां इर्रा आनि नेरवु बारेनो एबै कूटां इर्रा.
आनि एत्तु मुप्पै कूटां इर्रा.
16 आ डोंगाक उंदि किडकि इर्रा.
आ किडकि आनि पोर्रोटा कप्पुंकु उंदि कूटामेड अंतर इर्रा,
आनि पूरा डोंगाक उंदे हर्रि इर्रा.
डोंगाते पूरा मूडु इल्हा अंतराल्क इर्रा.
17 हुडा!
नना बूमिपोर्रो पेद्दा पिर्रु वायागोटंतन.
जीवा मत्तव अन्नि जिवरासींन मब्बुना हिळु हिलाकुंटा नासडेम कींतन.
बूमिपोर्रो बतल अय्ते मंता अद नासडेम आयार.
18 गानि नितोनि नना ना करार कींतन.
निमे नि मर्कुन,
नि मुत्तोन आनि कोडयाह्कुन पीसि डोंगाते एक्का.
19 इंका नितोनि निमे ई बूमित पोर्रोटा जिवरासीं जीवाते मनालय उंदि-उंदि जोडी इत्ते उंदि तल्लुर उंदि पोतु इल्हा अवुन डोंगाते ओम.
20 पिट्टें,
जिवरासीं,
बूमिपोर्रो बेंगानव इव अन्नि जीवाते मनालय जोडीं-जोडीं इत्ते उंदि तल्लुर उंदि पोतु निहागडकु वांतां,
अवुन बोत्तिटवुन जमा कीसि नितोनि इर्रा.
21 अचोने आय्का रका-रकाल्कुना तिंडि आनि मेता निहगा जमा कीसि इर्रा.
बारित्ते कर्वेस्तस्के तिनालय मीकु,
अवुंक ओज्जंतां.”
22 नोहल पेन हीता हुकूम परकारमे अन्नि कीतोर.