आदामना वंशम
5
1 आदामना वंशम इल्हा मंता:
पेन मनकन तयार कीतस्के कुद्दु दानलेसिंगे कीता.
2 पेन ओर्कुन मांडसा-मुरतळ इल्हा कीसि पुटिस्ता.
पेन ओर्क आसिर्वादमम हीसि ओरा पोर्रोल ‘आदाम’ इत्ते ‘मनकल’ इंचि दोस्ता.
3 आदाम नूटा मुप्पै वर्सानोर आतारित्ते सुद्दु ओनसंटोरे ओन्कु वरोर मर्रि पुटतोर.
आदाम ओना पोर्रोल सेतु इंचि दोस्तोर.
4 सेतु आतंका आदाम एन्मिद नुह्कुना वर्सां पिस्तोर.
अव रोजकुने ओन्कु इंका मर्क-मियाह्कु आतुर.
5 इल्हा बोत्तिगा तोम्मिद नुह्कुना मुप्पै वर्सानोर आतारित्ते आदाम हासोत्तोर.
6 सेतु नूटा हेय्युं वर्सानोर आतास्के ओन्कु एनोस पुटतोर.
7 एनोस आतंका सेतु एन्मिद नुह्कुना-एडुं वर्सां पिस्तोर.
अव रोजकुने सेतुंक इंका मर्क-मियाह्कु आतुर.
8 इल्हा बोत्तिगा तोम्मिद नुह्कुना-पन्नेंड वर्सां आतारित्ते सेतु हासोत्तोर.
9 एनोस टोंबै वर्सानोर आतास्के ओन्कु केनान पुटतोर.
10 केनान आतंका एनोस एन्मिद नुह्कुना-पदहेन वर्सां पिस्तोर.
अव रोजकुने एनोसुंक इंका मर्क-मियाह्कु आतुर.
11 इल्हा एनोसुंक बोत्तिगा तोम्मिद नुह्कुना-हेयुं वर्सां आतां.
अस्के ओर हासोत्तोर.
12 केनान डेब्बै वर्सानोर आतास्के ओन्कु महलेल पुटतोर.
13 महलेल आतंका केनान एन्मिद नुह्कुना नल्पै वर्सनदाका पिस्तोर.
अव रोजकुने केनानुंक इंका मर्क-मियाहकु आतुर.
14 इल्हा केनान बोत्तिगा तोम्मिद नुह्कुना-पदी वर्सनदाका पिस्तोर.
पजा ओर हासोत्तोर.
15 महलेल अरवै-हेयुं वर्सानोर आतास्के ओन्कु यारेद पुटतोर.
16 यारेद आतंका महलेल एन्मिद नुह्कुना-मुप्पै वर्सां पिस्तोर.
अव रोजकुने ओन्कु इंका मर्क-मियाह्कु आतुर.
17 इल्हा महलेल बोत्तिगा एन्मिद नुह्कुना टोंबै-हेयुं वर्सां पिस्तोर.
अस्के ओर हासोत्तोर.
18 यारेद नूटा अरवै-रोंडु वर्सानोर आतास्के ओन्कु वरोर मर्रि पुटतोर,
ओन पोर्रोल हनोक.
19 हनोक पुटतारित्ते यारेद एन्मिद नुह्कुना वर्सां पिस्तोर.
अव रोजकुने यारेदुंक इंका मर्क-मियाह्कु आतुर.
20 इल्हा यारेद बोत्तिगा तोम्मिद नुह्कुना अरवै-रोंडु वर्सानोर आतारित्ते हासोत्तोर.
21 हनोक अरवै-हेयुं वर्सानोर आतास्के ओन्कु मतुसेल पुटतोर.
22 मतुसेल पुटतारित्ते हनोक मूड नुह्कुना वर्सां पेनतोनि ताकतोर.
ओन्कु इंका मर्क-मियाह्कु आतुर.
23 इल्हा हनोक बोत्तिगा मुड नुह्कुना अरवै-हेयुं वर्सां पिस्तोर.
24 हनोक पेनतोनि ताकुंदुर.
उंदि रोज ओर गायप आतोर बारित्ते पेन ओन तेहाकुंचि ओता.
25 मतुसेल नूटा एनबै एडुंग वर्सानोर आतास्के ओन्कु लामेक पुटतोर.
26 लामेक आतंका मतुसेल एडुं नुह्कुना एनबै-रोंडु वर्सां पिस्तोर.
अव रोजकुने ओन्कु इंका मर्क-मियाह्कु आतुर.
27 इल्हा मतुसेल बोत्तिगा,
तोंम्मिद नुह्कुना अरवै-तोम्मिद वर्सां पिस्सि पजा हातोर.
28 लामेक नूटा एनबै-रोंडु वर्सानोर आतास्के वरोर मर्रि पुटतोर.
29 ओना पोर्रोल ओर नोहा इंचि दोस्तोर.
“बूमिक यहोवा सापनेम हीता.
अय्ते आ बूमिते मनाकु काया कस्टाल्क किया पींता.
गानि नोहाल माकु सुकम हींतोर,”
इंचि लामेक इत्तोर.
30 नोहाल पुटतारित्ते लामेक हेयुं नुह्कुना टोम्बै-हेयुं वर्सां पिस्तोर.
लामेकुंक इंका मर्क मियाह्कु आतुर.
31 इल्हा लामेकुंक बोत्तिगा एडुं नुह्कुना डेब्बै-एडुं वर्सां आतारित्ते ओर हासोत्तोर.
32 नोहाल हेय्युं-नुह्कुना वर्सानोर आतोर.
अस्के ओन्कु मुव्वुर मर्क आतुर,
ओरा पोर्रोलीं सेम,
हाम आनि यापेत इल्हा इरतोर.