काइन आनि हेबेल
4
1 पजा आदाम ओना मुत्तो हव्वानतोनि कलियतारित्ते अद नेला तप्सि काइन इनना मर्रिन कन्ता.
पजा अद,
“यहोवाना सहायमते नाकु वरोर मर्रि पुटतोर,”
इंचि इत्ता.
2 पजा अद काइनुना तम्मुर हेबेलुन कन्ता.
हेबेल पेद्दा आसि एटीं,
गोर्रें मेहानोर पुटतोर.
काइन बारे नेलि कियाना कास्तकरी मनकल पुटतोर.
3 इच्चूं रोजकुना पज्जो काइन यहोवांक मोळ्कलय ओना पंटाताल इच्चुं पेडेक पीसि वातोर.
4 आनि हेबेल गुडा ओना एटीं गोर्रेना मंदाताल तोल्सूर पुटताव्टेटाल बेस बल्स्तादुन यहोवांक मोळकलय पीसि वातोर.
हेबेलुन आनि ओना मोक्कुन यहोवाल मेच्कुत्ता.
5 गानि काइनुन आनि ओना मोक्कुन मात्रम यहोवाल मेच्कुना हिल्ले.
इंचि काइनुंक बागा होंग वासी ओना मोकम हीडतुक रेयता.
6 अस्के यहोवा,
“नीकु होंग बारी वासे मंता?
नि मोकम हीडतुक बारि रेयता?
7 निमे बेसता कबड कीसि मत्ते नि मोक्कुन नना कबुल किया कोन्नेना?
बेस कबाह्क कियाकोंटे मात्रम पापम नि गल्मा पोर्रेन एदुर हूळसेक मनंता,
अद नीकुन दाना मनसुने अराहलय हूळंता,
गानि निमे मात्रम दान्कु हर्रि हियानायो,”
इंचि काइनुनतोनि इत्ता.
8 काइन ओना तम्मुर हेबेलुन,
“दा!
मनम नेदहेके दाकोम.”
इंचि इत्तोर.
ओर इव्वुर नेदे मत्तस्के काइन ओना तम्मुनपोर्रो अर्सि हव्कतोर.
9 अस्के यहोवा,
“नि तम्मुर हेबेल बगा मंतोर रो?,”
इंचि काइनुन पूसकीता.
अस्के,
“बारंगो,
नाकु एर्का हिल्ले,
नना बतल ना तम्मुंक कावेल मंताना?”
इंचि काइन जवाब हीतोर.
10 अस्के यहोवा,
“अरे,
निमे इद बतल कीतिन?
नि तम्मुना नेत्तुर बूमिताल नाहेके वरगेयसेक मंता.
11 इंका नि कय्दाल पोंगगोटुता नि तम्मुना नेत्तुटुन ई बूमि उट्टा.
अदुनहाटी बूमिपोर्रो नीकु सापनेम दल्गुता.
12 इगेटाल निमे ई बूमिते नेली कियिना गानि अद नीकु दाना पंटा हिय्यो.
निमे देसेल्कुन पीसि तिरीयाना देसे दिरुगुडोन आंतिन.”
इंचि काइनुन इत्ता.
13 अस्के काइन,
“नाक हीता सिक्सा इच्चोर पेद्देदी गदा दान नना आपा पर्रोन.
14 हुडा,
इय्यला निमे नाकुन इ एरियाताल पेचाह्ची गेदिमसंतिन,
इंका नि मोकोम नाकु बस्केन हूळालय दोर्को.
नना देसे दिरुगुडोन आंतन,
इंका नना बोर्कन्ना कलियते ओर नाकुन हव्कानुर,”
इंचि यहोवानतोनि इत्तोर.
15 अस्के यहोवा,
“हिल्ले,
काइनुन बोरन्ना हव्कानय्ते ओन्कु एडुं अंताल्कुनदाका सिक्सा हींतन,”
इंचि जवाब हीता.
आनि काइन बोरकन्ना कलियते ओन बोरे हव्का मनि इंचि यहोवा काइनपोर्रो उंदि एर्का दोस्ता.
काइनुन वंशम
16 अस्के काइन यहोवान मुन्नेटाल पेय्सि होंचि,
एदेन बगिचाता पोळ्द पेयस्नेके नोद इनना एरियाते मनालय दल्गुतोर.
17 काइन ओना मुत्तोनतोनि कलियतारित्ते अद नेला तप्सि दांक हनोक पुटतोर.
काइन उंदि शहर दोहातोर.
आ शहरता पोर्रोल इंका ओना मर्रिन पोर्रोल पोर्रोटाले हनोक इंचि इरतोर.
18 हनोकुंक वरोर मर्रि पुटतोर,
ओन पोर्रोल इराद.
इरादुंक महुयेल इनना मर्रि पुटतोर,
महुयेलुंकु मतुसेल इनना मर्रि पुटतोर आनि मतुसेलुंकु लामेक इनना मर्रि पुटतोर.
19 लामेक रोंडु मुर्ताहकुनतोनि मरमीं आतोर,
उंदाना पोर्रोल आदा आनि इंकुंदान पोर्रोल सिल्ला.
20 आदांकु वरोर मर्रि पुटतोर,
ओन पोर्रोल याबल.
ओर डेरां वाटसि मननोरा आनि गोडकु-एटीं मेहनोरा मोदोटा बाबो पुटतोर.
21 ओना तम्मुन पोर्रोल युबल.
ओर डोल्क-बाजेंग तननोरा मोदोटा बाबो पुटतोर.
22 लामेकुना रेंडोव मुत्तो सिल्लांक तुबल-काइन पुटतोर.
ओर इत्तोडतां-कच्चितां मर्सुक-कसेक इसंटा अन्नि तीरकुना वस्तुक तयार कियनोर पुटतोर.
आनि तुबल-काइनुंक उंदि हेलाड मत्ता,
दान पोर्रोल नामा.
23 लामेक ओना मुत्तोह्कुनतोनि,
“आदा आनि सिल्ला नना वेहानद केंजट,
ना मुत्तोह्कुनिटा ना पोल्लेतुन केव्वु दोस्सि केंजट,
वरोर मनकल नाकु नोप्पि कीतोर,
ओन नना हव्कतन.
आ लेय्योड ना पोर्रो कय तेहतोर.
दानहाटीं नना ओन हव्कतन,
24 काइनुन हव्कतोंक एडुं अंताल्कुना सिक्सा आते,
नाकुन हव्कतोंक डेबै एडुं अंताल्कुना सिक्सा तप्पो,”
इंचि लामेक इत्तोर.
सेतुना संतानम
25 आदाम ओना मुत्तोनतोनि मर्रा कलीयतस्के,
दान्क इंका वरोर मर्रि पुटतोर.
ओना पोर्रोल सेतु इंचि इरतुर.
“काइन हेबेलुन हव्कताहेंका पेन हेबेलना जेगाते इंका-वरोन मर्रिन हीता,”
इल्हा आदामना मुत्तो इत्ता.
26 सेतुंक इंका वरोर मर्रि पुटतोर,
ओना पोर्रोल एनोस इंचि इरतुर.
अस्केटाले लोकुल्क पेनदा पोर्रोलते पारतनाa कियालय दल्गतुर.