मनकल पापमते अरमड
3
1 यहोवा पेन तयार कीता केडा जिवरासिनाल तरास बागा उसार मत्ता.
अय्ते तरास मुर्ताटुन पूसकीता गदा,
“बगिचाताल बदन्ना मराता पंडिं तिनमटु इंचि पेन मीकु निजमे वेहताना?”
इंचि पूसकीता.
2 अस्के,
“बगिचाता बवन्ना मराकुना पंडिं मोमोट तिना वच्चु.
3 गानि बगिचाता नट्टा-नड्डुम मनना मराता पंडिंन मात्रम तिनमटु,
अवुन इटमटुगुडा.
इल्हा कीते मिमेट हासि दांतिट,
इल्हा पेन वेहता,”
इंचि मुरतळ तरासुंक जवाब हीता.
4 अस्के तरास,
“मिमेट हायेने हायिर.
5 बारित्ते मिमेट अव पंडिं तिनानय्ते मीवा कळ्क तेरियसि पेनदा लेसिंग मंचि-सेड्डातुन एरपाट कियानोर आंतिट इंचि पेंन्दुक एरपाट मंता.”
इंचि मुर्तड्कु वेहता.
6 मुरतळ आ पंडितुन हूळसि इन्कुत्ता गदा,
"इद अय्ते बेस दिससंता,
तित्ते तियगा आनि इन्कुत्ताप तेल्वी हियानदानलेह्का मंता."
अस्के अद आ मराता पंडितुन कोयसी तित्ता.
अगा दाना मुय्दो मत्ताहाटीं ओन्कु हीता.
ओर इंका तित्तोर.
7 तित्तारित्ते ओरा इव्वुरा कळकु जग्गु वेळतां.
आनि “मनम कुळकें मंतोम” इंचि ओर्क तेडियसोत्ता.
तेडियतारित्ते ओर इव्वुर अंजिर मराता आकिं कुटसि गोसि दोसकुत्तुर.
8 नुल्पेटा वेलाकु यहोवा पेन बगिचाते ताकसेक मत्ता अल्किर आदाम आनि ओना मुत्तोंक केंजा वाता.
अस्के ओर बगिचाता मराकुन नड्डुम मकतुर.
9 अस्के यहोवा पेन आदामुन केय्सि,
“निमे बगा मंतिन?,”
इंचि पूसकीता.
10 अस्के ओर,
“बगिचाते नि अल्किर केंजतन अय्ते नना कुळकें मंतन इंचि वेरियसि मकतन,”
इंचि जवाब हीतोर.
11 पजा,
“निमे कुळकें मंतिन इंचि नीकु बोर वेहतुर?
नना बा मराता पंडिंन अय्ते तिनुमा इंचि नीकु हुकूम हीतनो,
आ मराता पंडिंन तित्तिना?”
इंचि पेन पूसकीता.
12 अस्के,
“नातोनि कलियसि मनालय निमे हीता मुर्तडे आ मराता पंडि कोय्सि नाकु हीता.
अय्ते नना तित्तन,”
इंचि आदाम जवाब हीतोर.
13 अस्के यहोवा पेन,
“निमे इद बतल कीतिन?,”
इंचि मुर्तटुन पूसकीता.
अस्के “तरास नाकुन बोंकिस्ता आनि नना तित्तन,”
इंचि मुरतळ इत्ता.
14 अस्के यहोवा पेन,
“निमे इल्हा कीताहाटीं
नाटे मनानव इंका केडाते मनानव अन्नि जिवरासींनाल नीकु एक्को सापनेम दल्गुता.
निमे पीट पोर्रो बेंगसेकेa पिसकिन
आनि पिस्त्तचुं रोजकु तोड़ी तिंचि पिसकिन.
15 नीकुन आनि मुर्तटुन,
मीकु वरोंक वरोर दुश्मन कींतन.
मीवा इव्वुरा संतानम नड्डुम
बस्केळ्क पगा इरांतन.
ओर नि तल्लातुन पिच्ची-पिच्ची कींतोर
आनि निमे ओना मळमेतुन कस्कंतिन.”
इंचि आ तरासुन इत्ता.
16 अस्के पेन,
“निमे पीटे मननेंके आनि एरपूरनेंके नीकु बागा नोप्पीं वायानु.
निमे इरगा बादाते मियाह्क-मर्कुन कन्नांतिन.
अय्नागानि नि पावरम मुय्दोन हेकेने मनंता
आनि ओर नि पोर्रो हक्कु ताकसानुर,”
इंचि मुर्तटुन इत्ता.
17 अस्के आदामुन,
“निमे नि मुत्तोना पोल्ले केंजसि नना तिनुमा इंचि हुकूम हीता मराता पंडितुन तित्तिन.
अदुनहाटीं निहेंदाल बूमिकु सापनेम दल्गुता.
निमे पिसतच्चुं रोजकु कस्टम कीसि दाना पंटा तिनकिन.
18 बूमि निहाटीं हाहकुना मराकु आनि अल्लम मोलियागोटंता.
आनि निमे नेदा पंटा तिंतिन.
19 निमे हरा-हरा कस्टम कीसि,
सेमटा पोंगा गोटते नीकु गाटो दोर्कंता.
निमे तोड़ीताल तयार कीतोन आंदिन,
निमे तोड़ी आंदिन,
मर्रा आ तोड़ीतेने होंचि कलियंतिन.”
इंचि पेन इत्ता.
20 आदाम ओना मुत्तोन पोर्रोल हव्वाb इंचि इरतोर.
बारित्ते मनकलोर्कुन लोप्पो तोलसूर तल्लुर अदे आंद.
21 यहोवा पेन आदामुंकु आनि ओना मुत्तो हव्वांक तोलदा कपडिं तयार कीसि ओर्क केराहता.
22 अस्के यहोवा पेन इत्ता गदा,
“हुडाट!
मनकल मंचि-सेड्डाता तेल्वी एत्सि मनाव्टेटाल वरोना समानम पुटतोर.
इंदके ओर इदे बगिचाते मंचि कय हाह्चि पिस्वर हियना मराता पंडितुन कोय्सि तिना हियामन्नि,
तित्ते बस्केडके जिवाते मनानुर,”
23 इंचि ओर बा बूमिताल अय्ते तयार आतोरो अदे बूमिते होंचि अगा नेली कियालय यहोवा पेन ओर्कुन एदेन बगिचाताल पलाते पेचाह्ता.
24 पेचाह्तारित्ते पिस्वर हियना मराताहेके होंदाना हरदुन कापाडलय बगिचाक पोळ्दु पेय्सनहेके "करुबो" इनना पेनदा दूतन आनि बगिचा सुट्टु पोतसेक तिरियना उंदि पेद्दा-कसेटुन कावेल इरता.