Hatiya di emitay yunkulay, di etaamay yunkulay
21
Ban nijuu'joon hatiya di emitay yunkulay, di poop etaamay yunkulay; mata hatiya di emitay êtiyaaray, di poop etaamay êtiyaaray, ehulhe ban, kasama poop kulee'ban. 2 Ña înje Joŋ, nijuk êsukay yanapaay yaamom Jerusaleŋ yunkulay, ya Emitay ewalellom hatiya di emitay, ban di êsangeni non âbutuwa aaraaw akayem ki kupam di apañoorool. 3 Ña nijam hurimahu hata anaw hatiya di hulhikahu habaam sembe hammi: “Mowme hukinahu hata Emitay hohu ta ejamaatay kemmi, ma mbi ekin tanor di buko, di kuga êsukay yata yo, di yêemi poop di buko, ma ega Emitay yatayiil. 4 Di ebees mukulamu di kûkilaku katayiil poomo, mata eketay yetinki ebaj, palimo hulhooŋooro, palimo ñikul, palimo poop hûsonja, mata wahaw wâtiyaaraw uhulhe ban.”5 Ña anaw umu aleehom di hulhikahu nâanul: “Mowme ma iga wahaw peh wunkulaw!” Ban naanom: “Uŋiic eloba'uye, mata yoo elobay elhegenumaayay, ban ejoone ma êyneni.” 6 Ban naanom joon: “Wahaw poowo ugawi ban. Moo, înje igam Alpha, niga poop Omega, aamom Hûcukumahu, di Hûbanumahu. Moo, anaw a basibenabu busoom, niwulool mumelamu asiben mata di enkoloŋay yata eroŋay bancaamut. 7 Moo, anaw ahaatum, mbi awuli wahaw uwe peh, ma înje iga Emitay yatawool, oo naga añoolom. 8 Be bukanaku kâkoohiyaaku, di kaaku kâynentum Emitay, di kaaku kâgawikoorem, di buŋaalaabu, di kaaku kakayem kâmooraaku, di bulaakabu, di buwaasenaabu, di poop bucalaabu peh, mbi kuraaci di husunahu hata sambunasu sâluwem sata ensoophri, dagam eketay egabutay.”
Jerusaleŋ yunkulay
9 Ña amalaakaw aahu ata di kumalaakaku hutok di egabaay, aamom aakum siboolasu hutok di sigaba sammi huc hubirikahu hûbanumahu, nâlobul d'înje ma aanom: “Bila ma îyisi âbutuwaaw aamom apañoor Êgaraniinaay.” 10 Ña naŋarom di buynumabu be di hurimbiliŋahu hâamak, ban di hubalh, ma âyisom êsukay yanapaay haaneyim Jerusaleŋ, ya Emitay ewalellom hatiya di emitay. 11 Be êsuka'uyu ebaje majaaŋaamu mata Emitay. Ma ya êjeel non kuwaaliisaku kaseeraaku, di enaamoor non kuwaaliisaku kaaneyim jaaspi, di ejaaŋ poop non kajukoorum kagawe walhalhalh. 12 Ban di egawi hukalahu ma huŋoomen yo hâraagim noon, ban di hubaj sîtingaasu kunŋen di sigaba, di kumalaakaku kunŋen di egaba di êtingawotinga, ban di kuŋiic di sîtingaa'usu uñaaŋaw wata sîbajoorumasu kunŋen di sigabaasu sata Israyel. 13 Ma ega sîtingaasu sîhaaji silako karebaku ba jaley âcaalhumewuum, sîhaaji poop di silako karebaku kaaku ba jaley alowumem, saasu sîhaaji poop di silako karebaku kûriraku, sîhaaji poop di silako karebaku kumayaku. 14 Hukalahu hata êsuka'uyu poop hubaje kuwaaliisaku keemo kunŋen di kugaba kata hutandahu, be di hutandoohutand, di kuŋiic dô uñaaŋaw wata kumakaaku kunŋen di egabaay kata Êgaraniinaay.
15 Be amalaakaw umu a ya aloom d'înje, oo di hunjaamahu hata ûuru ha mbi aliikum êsuka'uyu, di sîtingaasu sata yo, di poop hukalahu hata yo. 16 Be êsuka'uyu urebaw ubakiiraw wata yo wowu ma urem, mata maballhamu mata yo, di mawuŋaamu mata yo, momu ma murem. Ña nâliikum yo hunjaama'uhu sikilometrasu seemo sînjunnaasu sigaba, di sîteemeerasu sibakiir (2.400) sata maballhamu mata yo, di mawuŋamu mata yo, di poop mâraagiyaamu mata yo. Mata yoo pooyo yoyu ma erem. 17 Ban amalaakaw umu, naliik poop hukalahu, ña di hubaj simeeterasu saalim sîriiŋ kîyyaku kûhaaji, di kunŋen di yanor (71), di baliker bata ajamaat.
18 Hukala'uhu di huteepumi kuwaaliisaku kaaneyim jaaspi; êsuka'uyu poop di eteepumi ûuru yâpiiray, yanaamoorum non ujukoorum wagam walhalhalh. 19 Kutandaku kata hukalahu kata êsuka'uyu, koku ma kûsangenumim kuwaaliisaku peh kaseeraaku. Hutandahu hûtiyaarahu hoo hata jaaspi, hugabutahu hata Saphiira, hûhaajutahu hata kalsedooniya, hubakiirenahu hata esmeraalda, 20 haahu hutokenahu hata sardoonika, haahu hagakom hutok di hanor hata saardiw, haahu hagakom hutok di kugaba hata krisoolitu, haahu hagakom hutok di kûhaaji hata berilu, haahu hagakom hutok di kubakiir hata topaasiw, haahu hagakom kunŋen hata krisooprasu, haahu hagakom kunŋen di hanor hata jasintu, haahu poop hagakom kunŋen di kugaba hata ametiista. 21 Sîtingaa'usu saamom kunŋen di sigabaasu, soo sigam peerola saamom kunŋen di sigaba, mata êtinga woo êtinga peerola yanor êcookoorumim. Hâkijahu hata êsuka'uyu, di hucookoormi ûuru yâpiiray, yanaamoom non kajukoorum kagam walhalhalh.
22 Di êsuka'uyu, ijukut dô eluupay yata Emitay, mata Ata Emit aamom Emitay Yakiim Sembe Peh, di Êgaraniinaay, buko kugam eluupay yata Emitay yata êsuka'uyu. 23 Mata êsuka'uyu, ejoonut ebaj jaley, di hulheeŋ ma ejaaŋ, mata Emitay egam majaaŋaamu mata yo, Êgaraniinaay di ega ehikitenumay yata yo. 24 Ma âmbasuk peh mbi kurees di majaaŋaamu mata yo, kîyyaku poop kata di etaamay di kûŋarul husaanumahu hatayiil be dô. 25 Moo, sîtingaasu sata êsuka'uyu setubi sibabureri, mata dôo bajut busonna. 26 Âmbasuk peh mbi kûŋarul husaanumahu hatayiil be di êsuka'uyu ma nki kuwuu'yo kasalaku. 27 Mata di êsuka'uyu, wah wakeel waseme, di an akeel agawem wahaw wâpuñunenim, palimo poop an acalem aatubi anebee'dô, be mbi nebee'dô keb bukanaku ka uñaaŋaw watayiil wemmi ma uŋiicim di êliibray yata eroŋay yata Êgaraniinaay.