Esatanaay di egenki ujaañaw ênjunni
20
Ña nijuk amalaakaw awalowulom hatiya di emitay, oo ma asoom ekulhulumay yata husunahu hâlahaahu, di poop kuseelaku kâamak, 2 ban nasoh dragoŋ yaamom elunay yapiyaay yaaneyim Diyaabu, di yeene poop Satanaas, ma agenk yo ujaañaw ênjunni (1.000). 3 Ban naraac yo di husunahu hâlahaahu ma akullh yo dô, ban nakanen êtingaay, ma yetinki ebunten joon bukanaku kata bâsukabu, be na mbi etooken ujaañaw ênjunni (1.000). Ban mbi ewalheni etaŋay yinŋet.4 Ban nijuu'joon kulhikaku, be bukanaku kaleehom di ko, koo ma kuwulim sembaasu ma kuga batalenabu. Nijuu'poop sâaroorasu sata bukanaku kaŋaalim mata ma ya kuñaaŋemmi bukanaku mata Jesus, di poop mata elobay yata Emitay, di poop mata ma kûbinkentum beesta, palimo poop ebandapaaray yata yo, kaamom kâbikutim di kûriiŋaku, di poop uŋenaw; di kûlhaalowul di kuketaaku ma kuroŋ ma kulako di manor di Kristu di kâyyaku katawool ujaañaw ênjunni (1.000). 5 Be bukaaku kakeem kulhaalowuloot ma kuroŋ be kaŋ na ujaañaw ênjunni (1.000) ubawom. Moo, ûde jalhaalaaju jata di kuketaaku jâtiyaaraju. 6 Momakiimom bukanaku ka mbi kûlhaalowul di kuketaaku kâtiyaar, kubaje hûpiira, mata eketay egabutay ebajut ban di buko sembe, mata mbi kuga bumaaŋenaabu bata Emitay, di poop bata Kristu, ma kulako di manor d'oo di kâyyaku katawool ujaañaw ênjunni (1.000).
Esatanaay di ehaati
7 Be na mbi ujaañaw ênjunni (1.000) ugam ubawe, Esatanaay mbi ewallheni di ekullhay, 8 ña mbi ekay ki ebunten bukanaku kammi di ujimaw ubakiiraw wata di etaamay kata âmbasuk peh baaneyim Googi, di Magoogi; ma kûmeboor ma kutiik, hutiikahu ha bukanaku kumemmi non hulhuus hata kasamo. 9 Ña bukana'uku di kukay be tiŋ peh tata di etaamay ma kuŋoomen tiŋatu ta bukanaku kata Emitay kemmi, di poop êsukay ya Emitay eboolaatum, be sambunasu di sîcaalhumul hatiya di emitay ma sîbuyiil. 10 Ña Diyaabu yabunteniim, di esohi ma eraaci di husunahu hata sambunasu sata ensoophri daamom da beesta, di poop buñaaŋenaabu bata kûboñaku kagawutum kalhegenumaayaku, mbi kulesi tutulay, di busonna be nanoonan.
Batalenabu bûbanumabu
11 Ban nijuk hulhikahu hâamak, ban di hûtumpaay, be anaw âleehodom, etaamay, di hatiya di emitay di siteyool, ña tiŋ takeel tibajut be bata so joon. 12 Nijuu'poop bukanaku kakeem, yahaanay di balaabu, koo ma kujummi kayooŋ hulhika'uhu. Ña di kûbabul sîliibrasu. Yaayu yagam yata Eroŋay di êbabuli. Ña bukanaku kakeem, di kugawi batalenabu bata wahaw wa kugam, non ma demmi ma ŋiicim di sîliibra'usu. 13 Ña kasamaaku di kûcaalhenul bukanaku kâkeedom. Eketay, di tiŋatu tata eketay, di tîŋaruu'poop bukanaku kândom ki kuwul. Ma ânoowan agawi batalenabu bata wahaw wa agam. 14 Ban eketay, di tiŋatu tata eketay, di tiraaci di husunahu hata sambunasu. Moo, husuna'uhu hata sambunasu, hoo hugam eketay egabutay. 15 Moo, anaw a kañaaŋaku katawool kuleem di êliibra'uyu yata eroŋay, mbi araaci di hunkoloŋa'uhu hata sambunasu.