Kâsuumaayaku hatiya di emitay
19
Ban na câatom, ña nijam hurimahu hatiya di emitay habaam sembe alhoom non hata buyooŋ bata bukanaku ha ya hammi:“Aleluya!
Emitay yatoolaal, yoo ekiim kapakaku,
di êriibiinaay,
di poop sembaasu,
2 mata batalenabu bata yo, boo balhegenumaayabu, ban di bucol;
momakiimom ma êgawummi batalenabu añakanaw agam êkusumay yâmakaay,
aamom akajemmi etaamay mata kâmooraaku ka akayem.
Emitay ma elesumoom,
mata ma eyaa'bugalen mata hûsimahu hâhipim hata bugorooraabu bata yo.”
3 Ban di kêenul joon:
“Aleluya!
Ekooliitay yata yo mbi
eŋool be nanoonan.”
4 Ña yahaana'uyu kaamom anabawo di ebakiir, di poop wahaw ubakiiraw waroŋaaw, di ûtiigen ma ûbinken Emitay yammi ma eleehom di hulhikahu ma ya wêenul:
“Amiin! Aleluya!”
Bûyababu bata Êgaraniinaay
5 Ña hûrimahu di hûcaalhumul di hulhika'uhu ma ya hêenul:
“Jisal Emitay yatoolaal,
miwuul peh jagam bugorooraabu bata yo,
jaamom jâkoliyeyom,
balaabu, di poop yahaanay.”
6 Ban nijam hurimahu halhoom non hata buyooŋ bata bukan, nijam haahu halhoom non baweler bata mumel mayeje mammi ma muteyem, nijam poop haahu halhoom non uraranjuun wabaje sembe ha ya hammi:
“Aleluya!
Ata Emit, aamom Emitay Yakiim Sembe Peh, oo ammi ma aleehom di kâyyaku.
7 Moo, ûririgenaal ma umaayooraal,
ma usalaalool,
mata bûyababu bata Êgaraniinaay bûriiŋe,
mata âbutuwaaw atawool nabandoore ban.
8 Moo, nawuli ban bûjupaabu bata ehulay yagam bururur, ban di ega wajwaj.”
Mata ehulay yagawaay bururur, yoo egam bugoroorabu bacolaabu bata bukanaku kanapaaku.
9 Ña amalaakaw naanom: “Uŋiic eloba'uye: Bukanaku kâwoollim be bûyababu bata Êgaraniinaay kubaje hûpiira.” Ban nanoonan joon: “Hurima'uhe, hurimahu halhegenumaayahu hata Emitay.”
10 Ña nîtiigen di ûkandumaw watawool ma îbinkenool, be naanom: “Jijaa, aatuba ugawom ume, mata înje poop injumu di bugoroorabu bata Emitay non aw, di poop kutiyi kammi ma kusoom elobay yata Jesus ma ya kûbinken Emitay. Mata buynumabu bata Jesus, buwulem elobay buñaaŋenaabu bata kûboñaku kata Emitay.”
Kristu nahaate ban beesta
11 Ban hatiya di emitay di bâbulo, ña nijuk anaw ma ageelom epilinjay êtumpaay. Be anaw umu kañaaŋaku katawool ya keeni, Âynenaayaw, di Alhegenumaayaw. Mata oo ya atiik, natalen poop di malhegenumaayamu. 12 Kûkilaku katawool di kûjeel non kâlelemp kata sambun, di hûkuwahu hatawool sînkuuhaasu sata bûgaalabu soo dôo lhay. Ban kañaaŋaku di kuŋiici d'oo ka an âmirutum, ma oo kaŋ keb âmiikom. 13 Nagayoor poop humantaahu hâpuujenumim hûsimahu, kañaaŋaku kata ho ya keeni Elobay yata Emitay; 14 Ban nijuu'poop esellooraay kata hatiya di emitay kasoolhelloom, koo ma kugeelowulom sipilinjasu sâtumpaayasu, di kûjupo poop wañaw ûpiiraw wâtumpaayaaw, ban di uga bururur. 15 Di butumabu batawool di câalhumuu'dô kajaasiyaaku kayabum noon, ka mbi ya atiikum sîsukasu ma ahaat so; ban naŋar hujinkumahu hata muhaañaayamu ma asohumii'ho, ban nayokos ûuba di hûbarikahu hata hubirikahu hata Emitay Yakiim Sembe Peh. 16 Di humantaa'uhu hatawool, di poop huboŋahu watawool, dôdu ma ŋiicim kañaaŋa'uke: “Âyyaw ata kîyyaku, di Ata Emit ata atamitii.”
17 Nijuu'poop amalaakaw aahu ma ajummi di jaley, ma ya âŋaaŋulo basuwaabu bâytem be hatiya di emitay ma aan bo: “Jîkayil ma jîmeboor be bata kâlundaayaku kâmakaaku kata Emitay, 18 ma nki jitokoñ eluway yata kîyyaku, di yata yahaanay yata esellooraay, di yata bukanaku kabajaaku sembaasu, di yata sipilinjasu, di yata kaaku kageelosom, di yata bukanaku peh kagawutum emiikeel, di kaaku kagam emiikeelay, di yata bukanaku kagam bukanaku kinŋet, di poop yata kaaku kagam bukanaku kâmakaaku.”
19 Nijuu'poop beesta, di kîyyaku kata di etaama'uye, di esellooraay katayiil, ma kûmeboorum ma nki kutiik di anaw umu ammi ma ageelom epilinjay, di poop esellooraay yatawool. 20 Be beesta uyu, di poop añaaŋenaaw ata kûboñaku agawutum ata Emitay, a ya agam êmanjumay kayooŋ beesta uyu ma ya abunten bukanaku kagawim êmanjumay yata beesta, di kusohi buko egabaay ma kuraaci di baroŋerabu di husunahu hata sembunasu sâluwem sata ensoophri. 21 Bukan kaaku poop kakatunom, di kûbujumi kajaasiyaaku ka ya kâcaalhumulom di butumabu bata âynaaw umu ageelom epilinjay. Ña basuwaabu di butokoñ eluway yatayiil poopii di bupooñ.